ପୁରୀ: ଆଜି ଛତିଶାନିଯୋଗର ଗୁରୁତ୍ବପୂର୍ଣ୍ଣ ବୈଠକ । ଅପରାହ୍ନ 5ଟା30ରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀଙ୍କ ଅଧ୍ୟକ୍ଷତାରେ ବସିବ ଛତିଶାନିଯୋଗ ବୈଠକ । ରତ୍ନଭଣ୍ଡାର ମରାମତି ନେଇ ତାରିଖ ଓ କେତେ ଘଣ୍ଟା ଏଏସଆଇ ରତ୍ନଭଣ୍ଡାର ମରାମତି କରିବ ସେନେଇ ଚୂଡାନ୍ତ ନିଷ୍ପତ୍ତି ନିଆଯିବ । ଆସନ୍ତା 16 ତାରିଖ ଠାରୁ ଶ୍ରୀଜୀଉଙ୍କ ପହିଲିଭୋଗ ନୀତି ଆରମ୍ଭ ହେବାକୁ ଥିବାରୁ ରତ୍ନଭଣ୍ଡାର ମରାମତି ପାଇଁ ଏହା ଉଚିତ୍‌ ସମୟ ବୋଲି କୁହାଯାଉଛି ।  

ଶ୍ରୀଜୀଉଙ୍କ ପହିଲିଭୋଗ ପାଇଁ ନୀତିନିର୍ଘଣ୍ଟ ହେବାସହ ଆସନ୍ତା ଜାନୁୟାରୀ 13 ତାରିଖରେ ଶ୍ରୀମନ୍ଦିରରେ ଅନୁଷ୍ଠିତ ହେବାକୁଥିବା ଦେବାଭିଷେକ ପୂର୍ଣ୍ଣିମା ନୀତିନିର୍ଘଣ୍ଟ ଉପରେ ମଧ୍ୟ ଛତିଶାନିଯୋଗ ବୈଠକରେ ଆଲୋଚନା ହେବ । ଏହାସହ ଆସନ୍ତା ଜାନୁଆରୀ 14 ତାରିଖରେ ମକରସଂକ୍ରାନ୍ତି ନୀତିନିର୍ଘଣ୍ଟ ନେଇ ମଧ୍ୟ ବୈଠକରେ ଆଲୋଚନା ହେବ । ବୈଠକରେ ଛତିଶାନିଯୋଗ ମହାନାୟକଙ୍କ ସମେତ ସମସ୍ତ ନିଯୋଗର ସେବକ ପ୍ରତିନିଧି, ପୁରୀ ଜିଲ୍ଲାପାଳ ତଥା ଶ୍ରୀମନ୍ଦିର ଉପମୁଖ୍ୟ ପ୍ରଶାସକ,ଏସପି, ଓ ଶ୍ରୀମନ୍ଦିର ପ୍ରଶାସନିକ ଅଧିକାରୀ ମାନେ ଉପସ୍ଥିତ ରହିବେ ।