ସହିଦ ନଗର ହାଟ ନିକଟ ମିକ୍ସଚର୍ ଦୋକାନରେ ଭୟାବହ ଅଗ୍ନିକାଣ୍ଡ

ଭୁବନେଶ୍ଵର: ସହିଦ ନଗର ସ୍ଥିତ ଏକ ଦୋକାନରେ ଭୟଙ୍କର ନିଆଁ ଲାଗିଛି । ଏସ୍‌ବିଆଇ ନିକଟ ଏକ ନମକିନ୍ ଦୋକାନରେ ଅଗ୍ନିକାଣ୍ଡ ହୋଇଛି । ଘଟଣା ସ୍ଥଳରେ ଅଗ୍ନିଶମ ବାହିନୀର ୨ରୁ ଅଧିକ ଦଳ ପହଞ୍ଚି ନିଆଁ ଆୟତ୍ତ ପାଇଁ ଉଦ୍ୟମ କରୁଛି । ନିଆଁ ଲାଗିଥିବା ଦୋକାନରେ ମିକ୍ସଚର ପ୍ରସ୍ତୁତ କରା ଯାଇଥାଏ । ତେବେ ମିକ୍ସଚର ଦୋକାନରେ କିଭଳି, କେଉଁ ପରିସ୍ଥିତିରେ ନିଆଁ ଲାଗିଲା ତାର କାରଣ ଅସ୍ପଷ୍ଟ ରହିଛି ।

ମିଳିଥିବା ସୂଚନା ଅନୁସାରେ, ଭୋର୍ ୫ଟା ସମୟରେ ମୁଖରୂଚି ମିକ୍ସଚର ଓ ମିଠା ଦୋକାନରେ ନିଆଁ ଲାଗିଥିଲା । ଏହା ପରେ ଅଗ୍ନିଶମ ବାହିନୀ ପହଞ୍ଚି ନିଆଁ ଆୟତ୍ତ ପାଇଁ ଉଦ୍ୟମ କରୁଛି । ତେବେ ନିଆଁ କେମିତି ଲାଗିଲା ? ସର୍ଟସର୍କିଟ୍‌ରୁ ହୋଇଛି କି ଅଗ୍ନିକାଣ୍ଡ ? ନା ସେଠାରେ ମିକ୍ସଚର ଓ ମିଠା ଆଦି ସାମଗ୍ରୀ ପ୍ରସ୍ତୁତ ହେଉଥିବାରୁ ଚୁଲିରୁ ନିଆଁ ଲାଗିଛି କି ? ତାହା ସ୍ପଷ୍ଟ ହୋଇପାରି ନାହିଁ ।

ସହିଦ ନଗର ହାଟ ନିକଟ ମିକ୍ସଚର ଦୋକାନରେ ନିଆଁ ଲାଗିଥିବା ବେଳେ ଅଞ୍ଚଳ ଧୂଆଁମୟ ହୋଇ ଯାଇଛି । ଏକାଧିକ ଦୋକାନ ଲାଗି ଲାଗି ରହିଥିବା ବେଳେ ପାଖରେ ରହିଛି ଏକାଧିକ ଆପାର୍ଟମେଣ୍ଟ । ତେଣୁ ସବୁର ସୁରକ୍ଷାକୁ ଧ୍ୟାନ ଦିଆ ଯାଉଛି । ସକାଳୁ ସକାଳୁ ଖୋଲା ରହିଥିବା ଦୋକାନକୁ ବନ୍ଦ କରିବା ଲାଗି ପ୍ରଶାସନ ଅନୁରୋଧ କରୁଛି ।