ଜଳିଗଲା ବିସ୍କୁଟ ଫ୍ୟାକ୍ଟେରୀ । କଟକ ଜଗତପୁର ଶିଳ୍ପାଞ୍ଚଳରେ ଥିବା ବିସ୍କୁଟ କାରଖାନାରେ ହଠାତ୍ ଲାଗିଥିଲା ନିଆଁ । ଅଗ୍ନିଶମ ବାହିନୀର ଦୀର୍ଘ ଅଧ ଘଣ୍ଟାର ଅକ୍ଲାନ୍ତ ପରିଶ୍ରମ ପରେ ଆୟତ୍ତ ହେଲା ନିଆଁ । ନିଆଁ ଲିଭା କାର୍ଯ୍ୟରେ ୩ ଟି ଅଗ୍ନିଶମ ବାହିନୀର ଟିମ୍ ସାମିଲ ହୋଇ ଏହି ନିଆଁକୁ ଆୟତ୍ତ କରିଛନ୍ତି ।

ଆଜି ସକାଳ ପାଖାପାଖି ୧୦.୧୫ ରୁ ୧୦.୩୦ ମଧ୍ୟରେ ଲାଗିଥିଲା ଏହି ନିଆଁ । କାରଖାନାରେ ପ୍ଲାଷ୍ଟିକ ପଲିଥିନ ଓ ଖାଇବା ତେଲ ଥିବାରୁ ନିଆଁ ଅଧିକ ମାତ୍ରାରେ ବ୍ୟାପିଥିଲା । ଏହି ନିଆଁକୁ ଆୟତ୍ତ କରାଯିବା କାରଣରୁ ପାଖରେ ଥିବା ଅନ୍ୟ କାରଖାନା ସବୁ ଅଳ୍ପକେ ବାର୍ତ୍ତିଗଲେ । ତେବେ ନିଆଁ ଲାଗିବାର କାରଣ ଅସ୍ପଷ୍ଟ ରହିଥିବାବେଳେ ଯାଞ୍ଚ କରୁଛି ଅଗ୍ନିଶମ ବାହିନୀ ଟିମ୍ ।

ଅନ୍ୟପଟେ ଲକ୍ଷାଧିକ ଟଙ୍କାର କ୍ଷୟକ୍ଷତି ହୋଇଥିବା ନେଇ ଅନୁମାନ କରାଯାଉଛି ବୋଲି କହି ଦୁଃଖରେ ଭାଙ୍ଗି ପଡ଼ିଥିବା କହିଛନ୍ତି କାରଖାନା ମାଲିକ ।