ଢେଙ୍କାନାଳରେ ମାତିଛନ୍ତି ଶିକାରୀ । ବନ ବିଭାଗ କର୍ମଚାରୀଙ୍କୁ ଟାର୍ଗେଟ କରି ଆକ୍ରମଣ କରୁଛନ୍ତି । ଗତକାଲି ବିଳମ୍ବିତ ରାତିରେ ହିନ୍ଦୋଳ ରେଞ୍ଜ କଇ ରିଜର୍ଭ ଫରେଷ୍ଟ ତଣ୍ଟିଚିରା ନିକଟରେ ପାଟ୍ରୋଲିଂ ବେଳେ ମୁହାଁମୁହିଁ ହୋଇଥିଲେ ବନ କର୍ମଚାରୀ ଓ ଶିକାରୀ ।

ବେଆଇନ ଭାବେ ଜଙ୍ଗଲ ଭିତରେ ପ୍ରବେଶ କରିଥିବା ଶିକାରୀଙ୍କୁ ପ୍ରତିରୋଧ କରିବା ପରେ ଘଟଣାସ୍ଥଳରେ ଉତ୍ତେଜନା ଦେଖାଦେଇଥଲା । ବନ କର୍ମଚାରୀଙ୍କ ଠାରୁ ବର୍ତ୍ତିବା ପାଇଁ ଶିକାରୀ କରିଥିଲେ ଫାଇରିଂ । ଆଉ ଏହି ଫାଇରିଂର ଶିକାର ହୋଇ ଥିଲେ ୩୭ ବର୍ଷ ବୟସ୍କ ଫରେଷ୍ଟ ଗାର୍ଡ ପ୍ରହ୍ଲାଦ ପ୍ରଧାନ । ତାଙ୍କ ପେଟରେ ଗୁଳି ବାଜିଥିବାରୁ ଚିକିତ୍ସା ପାଇଁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପାଟୋଲିଂ କରୁଥିବା ବନ କର୍ମଚାରୀ ଚାରି ଶିକାରୀଙ୍କୁ କାବୁ କରିବା ସହ ସେମାନଙ୍କ ଠାରୁ ବନ୍ଧୁକ ଜବତ କରାଯାଇଛି ।

ଶିକାରୀଙ୍କ ଗୁଳିରେ ମୃତ୍ୟୁ ହୋଇଥିବା ବନ କର୍ମଚାରୀଙ୍କ ମୃତ୍ୟୁରେ ଗଭୀର ଦୁଃଖ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଦିବଙ୍ଗତ ବନ କର୍ମଚାରୀ ପ୍ରହ୍ଲାଦ ପ୍ରଧାନଙ୍କ ପରିବାର କୁ ଅନୁକମ୍ପା ମୂଳକ ୩୦ ଲକ୍ଷ ଟଙ୍କା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଶୋକ ପ୍ରକାଶ କରିଛନ୍ତି । ପ୍ରହ୍ଲାଦଙ୍କ ବିୟୋଗ ଏକ ଅପୂରଣୀୟ କ୍ଷତି । ଏହି ଦୁଃଖଦ ସମୟରେ ମହାପ୍ରଭୁ ପରିବାର ବର୍ଗଙ୍କୁ ଅସୀମ ଧୈର୍ଯ୍ୟ ଓ ସାହସ ପ୍ରଦାନ କରନ୍ତୁ ବୋଲି ଧର୍ମେନ୍ଦ୍ର ପ୍ରଧାନ ସୋସିଆଲ ମିଡିଆ ଏକ୍ସରେ ଲେଖିଛନ୍ତି। ଢେଙ୍କାନାଳ ସାଂସଦ ରୁଦ୍ର ନାରାୟଣ ପାଣି , ହିନ୍ଦୋଳ ବିଧାୟିକା ସୀମା ରାଣୀ ନାୟକ, ବନ ବିଭାଗର ବରିଷ୍ଠ ଅଧିକାରୀଙ୍କ ସମେତ ଅନୁଗୁଳ ଏସପି ଓ ବନ କର୍ମଚାରୀ ସଂଘ ର କର୍ମକର୍ତା ମାନେ ଅନୁଗୁଳ ମୁଖ୍ୟ ଚିକିତ୍ସାଳୟରେ ପହଞ୍ଚି ମୃତ ପ୍ରହ୍ଲାଦଙ୍କ ଶେଷ ଦର୍ଶନ କରିବା ସହ ତାଙ୍କ ପରିବାରକୁ ସମବେଦନା ଜଣାଇଥିଲେ ।

ପୂର୍ବରୁ ୨୦୨୩ ମସିହାରେ ଶିମିଳିପାଳ ଅଭୟାରଣ୍ୟରେ ଯେତେବେଳେ ଶିକାରୀମାନେ ମାତିଥିଲେ ସେତେବେଳେ କଡା ଆକ୍ସନ ନିଆଯାଇଥିଲା ଜଏଣ୍ଟ ଟାସ୍କଫୋର୍ସ ଗଠନ କରି ବିପୁଳ ପରିମାଣର ବନ୍ଧୁକ ଓ ମାରଣାସ୍ତ୍ର ସହ ଅନେକ ଶିକାରୀଙ୍କୁ ମଧ୍ୟ ଗିରଫ କରାଯାଇଥିଲା । ଆଉ ଏବେ ଢେଙ୍କାନାଳରେ ଶିକାରୀଙ୍କୁ ଦମନ କରିବାକୁ କଠୋର ଆଭିମୁଖ୍ୟର ଆବଶ୍ୟକତା ଥିବା କହିଛନ୍ତି ମୟୂରଭଞ୍ଜ ଜିଲ୍ଲାର ପୂର୍ବତନ ଅବୈତନିକ ବନ୍ୟପ୍ରାଣୀ ତତ୍ବାବଧାରକ ଭାନୁମିତ୍ର ଆଚାର୍ଯ୍ୟ ।

Argus News | argus news | Odisha Latest News, Breaking News, Trending News, Live TV