ମାଳତିପାଟପୁରରେ ପ୍ରଥମ କରି ସ୍ଥାପିତ ହୋଇଛି ବାୟୋଫିକ୍ସପ୍ଲାଣ୍ଟ
ପୁରୀ: ପୁରୀ ମାଳତିପାଟପୁରରେ ପ୍ରଥମ କରି ସ୍ଥାପିତ ହୋଇଛି ବାୟୋଫିକ୍ସପ୍ଲାଣ୍ଟ । ତିନି ଟନ୍ କ୍ଷମତା ବିଶିଷ୍ଟ ଏହି ପ୍ଲାଣ୍ଟ ପ୍ରଥମେ ଗ୍ୟାସ ଓ ପରେ ବିଦ୍ୟୁତ୍ ଉତ୍ପାଦନ ସହ ଶେଷରେ ଜୈବିକ ସାର ଉତ୍ପାଦନ କରିବାର କ୍ଷମତା ରଖିଛି । ରାଜ୍ୟ ସରକାରଙ୍କ କୃଷି ବିଭାଗ ଓ ଶ୍ରୀମନ୍ଦିର ପ୍ରଶାସନ ସହଯୋଗରେ ଏହି ପ୍ଲାଣ୍ଟ ବସିଛି । ଶ୍ରୀମନ୍ଦିରର ବର୍ଜ୍ୟବସ୍ତୁ ସବୁକୁ ଏଠାରେ କମ୍ପୋଷ୍ଟ କରାଯାଇ ଜୈବିକ ସାର ପ୍ରସ୍ତୁତ ହୋଇପାରିବ । ମହାପ୍ରଭୁଙ୍କ ପାଇଁ ଏହି ପ୍ଲାଣ୍ଟ ବସିଥିବାରୁ ମହାପ୍ରଭୁଙ୍କ ସେବା କରିବାର ସୁଯୋଗ ମିଳିବ ବୋଲି କହିଛନ୍ତି ପ୍ଲାଣ୍ଟ କର୍ମଚାରୀ । ତେବେ ଶ୍ରୀମନ୍ଦିରରୁ ନିର୍ଗତ ମହାପ୍ରସାଦ ପାଇଁ ଅଲଗା, ଫୁଲ ତୁଳସୀ ଏବଂ ଅନ୍ୟାନ୍ୟ ଦ୍ରବ୍ୟ ପାଇଁ ଅଲଗା ଅଲଗା ମେସିନ୍ ଦ୍ୱାରା ଏହି ପ୍ଲାଣ୍ଟରେ ଜୈବିକ ସାର ଉତ୍ପାଦନ କ୍ଷମତା ବଢ଼ିପାରିବ ବୋଲି ବାୟୋ ଫିକ୍ସର ଯନ୍ତ୍ରୀ ଓ ଅଧିକାରୀ କହିଛନ୍ତି ।
ଏହି ପ୍ଲାଣ୍ଟ ଯୋଗୁଁ ଆଗକୁ ଶ୍ରୀମନ୍ଦିର ପରିସର ଅଧିକ ପରିଷ୍କାର ପରିଚ୍ଛନ୍ନ ରହିବ ବୋଲି ଆଶା କରାଯାଉଛି । ଏହି ପଦକ୍ଷେପକୁ ସ୍ୱାଗତ କରିଛନ୍ତି ସୁଆରମହାସୁଆର ନିଯୋଗ ସଭାପତି । ଆଗକୁ ଜୈବିକ ଚାଉଳରେ ଅମୃତ ଅନ୍ନ ପ୍ରସ୍ତୁତ ହେବାକୁ ଯାଉଥିବା ବେଳେ ଜୈବିକ ସାର ପ୍ରସ୍ତୁତି ପାଇଁ ଏହି ପ୍ଲାଣ୍ଟ ସହାୟକ ହେବ । ଶ୍ରୀମନ୍ଦିର ମୁଖ୍ୟ ପ୍ରଶାସକ ବାଇଓଫିକ୍ସ ପ୍ଲାଣ୍ଟ ପରିଦର୍ଶନରେ ଯାଇ ସ୍ଥିତି ଅନୁଧ୍ୟାନ କରିଛନ୍ତି । ଶ୍ରୀମନ୍ଦିର ରୋଷଶାଳାରୁ ବାହାରୁଥିବା ପରିବା ଚୋପା, ନଡ଼ିଆ କତା, ସଢ଼େଇ ଆଦି ବର୍ଜ୍ୟବସ୍ତୁ ପ୍ରତିଦିନ ସଫା କରାଯିବା ସହ ପ୍ଲାଣ୍ଟକୁ ପଠାଇ ଜୈବିକ ସାର ପ୍ରସ୍ତୁତ ହେବ।
📱 Get Argus News App
✨ଅଧିକ ପଢ଼ନ୍ତୁ ଓଡିଶା ଖବର: