ଅର୍ଗସ ବ୍ୟୁରୋ: ଓଡିଶାରେ ହେବ ପ୍ରବାସୀ ଭାରତୀୟଙ୍କ ମହାକୁମ୍ଭ । ଅତିଥିଙ୍କ ସ୍ଵାଗତ ଲାଗି ସଜେଇ ହେଉଛି ରାଜଧାନୀ ଭୁବନେଶ୍ଵର । ଜାନୁଆରୀ ୮ରୁ ୧୦ ତାରିଖ ଯାଏଁ ଉତ୍ସବ ମୁଖର ହେବ ସ୍ମାର୍ଟ ସିଟି । ମୁଖ୍ୟ ସମ୍ମିଳନୀ ସ୍ଥଳ ଜନତା ମୈଦାନରେ ସ୍ଵତନ୍ତ୍ର ହ୍ୟାଙ୍ଗର ଗୁଡିକରେ ଓଡ଼ିଶାର କଳା, ସଂସ୍କୃତି, ଐତିହ୍ୟ, ପରମ୍ପରାର ପ୍ରତିବିମ୍ବ ଦେଖିବେ ପ୍ରବାସୀ ଅତିଥି । ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ଆସିବାକୁ ଥିବା ଦେଶ ବିଦେଶର 10 ହଜାର ଅତିଥିଙ୍କ ସତ୍କାର ପାଇଁ କରାଯାଇଛି ବ୍ୟାପକ ବ୍ୟବସ୍ଥା। କିଛି ଅତିଥି ଭୁବନେଶ୍ଵରରେ ପହଞ୍ଚି ସାରିଲେଣି, ଆଉ ରାସ୍ତାରେ ଥିବା ଅନେକ ପ୍ରବାସୀ ବାର୍ତ୍ତା ମାଧ୍ୟମରେ ପରିପ୍ରକାଶ କରିଛନ୍ତି ନିଜ ଉତ୍କଣ୍ଠା । ସେପଟେ ପ୍ରବାସୀ ଭାରତୀୟ ସମ୍ମିଳନୀରେ ଯୋଗଦେବା ପାଇଁ ଆଜି ଭୁବନେଶ୍ଵରରେ ପହଞ୍ଚିଛନ୍ତି କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର । ବିମାନ ବନ୍ଦରରେ ତାଙ୍କୁ ଦିଆଯାଇଛି ସ୍ଵାଗତ ସମ୍ବର୍ଦ୍ଧନା ।

ସେପଟେ ଆଜିଠୁ ଆରମ୍ଭ ହୋଇଛି ଚିଲିକା ବିହଙ୍ଗ ଉତ୍ସବ। ଆସନ୍ତା 12 ତାରିଖ ଯାଏଁ ଚାଲିବାକୁ ଥିବା ଏହି ଉତ୍ସବକୁ ଆଜି ଲୋକସେବା ଭବନ କନଭେନସନ ସେଣ୍ଟରରେ ଉଦଘାଟନ କରିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା । ଚଳିତ ଥର ପ୍ରବାସୀ ଭାରତୀୟ ହେବେ ଚିଲିକା ବିହଙ୍ଗ ଉତ୍ସବର ବ୍ରାଣ୍ଡ ଆମ୍ବାସାଡର । ପ୍ରବାସୀ ଭାରତୀୟ ଦିବସ ପାଇଁ ଓଡ଼ିଶା ଆସିବାକୁ ଥିବା ଅତିଥି ଚିଲିକା ବୁଲି ସୌନ୍ଦର୍ଯ୍ୟ ଉପଭୋଗ କରିବା ସହ ବିଦେଶାଗତ ପକ୍ଷୀଙ୍କୁ ଦେଖିବେ । ଏଥିପାଇଁ ଜଙ୍ଗଲ ବିଭାଗ ଓ ପର୍ଯ୍ୟଟନ ବିଭାଗ ପକ୍ଷରୁ କରାଯାଇଛି ସ୍ଵତନ୍ତ୍ର ବ୍ୟବସ୍ଥା । ଏହା ଦ୍ଵାରା ବିଶ୍ଵରେ ଆହୁରି ହେବ ଚିଲିକାର ପ୍ରଚାର।

ଭୁବନେଶ୍ୱର ବିମାନବନ୍ଦରରେ ବିଜେପି ପକ୍ଷରୁ ପ୍ରବାସୀ ଭାରତୀୟଙ୍କୁ ଦିଆଯିବ ଭବ୍ୟ ସ୍ଵାଗତ ସମ୍ବର୍ଦ୍ଧନା । ସବୁ ସାଂସଦ, ବିଧାୟକ ଓ କାର୍ଯ୍ୟକର୍ତ୍ତାଙ୍କୁ ଆହ୍ଵାନ କରିଛନ୍ତି ରାଜ୍ୟ ସଭାପତି । ପ୍ରବାସୀ ଭାରତୀୟ ମାନେ ଗସ୍ତ କରୁଥିବା ବିଭିନ୍ନ ସ୍ଥାନରେ ସ୍ୱଚ୍ଛ ଭାରତ ଅଭିଯାନ ମାଧ୍ୟମରେ ସଫେଇ କାର୍ଯ୍ୟକ୍ରମ କରିବ ବିଜେପି । ୭ ଓ ୮ ତାରିଖ ରାଜ୍ୟର ସବୁ ଜିଲ୍ଲାରେ ପଦଯାତ୍ରା କରିବ ଦଳ। 8 ତାରିଖ ସନ୍ଧ୍ୟାରେ ବିମାନବନ୍ଦର ପ୍ରଧାନମନ୍ତ୍ରୀଙ୍କୁ ବି ଦିଆଯିବ ଭବ୍ୟ ସ୍ଵାଗତ ସମ୍ବର୍ଦ୍ଧନା। ଜାନୁଆରୀ ୨୮, ୨୯ରେ ହେବାକୁ ଥିବା ଉତ୍କର୍ଷ ଓଡିଶା - ମେକ୍ ଇନ୍ ଓଡିଶା କନକ୍ଲେଭ ଆଗରୁ ପ୍ରବାସୀ ଭାରତୀୟ ସମାରୋହ ରାଜ୍ୟ ପାଇଁ ଆଣିବ ଅପାର ସମ୍ଭାବନା । ଖଣି, ପାଣି ଓ ପ୍ରାକୃତିକ ସମ୍ପଦ ଭରା ଓଡିଶାରେ ପୁଞ୍ଜିନିବେଶ ପାଇଁ ଆଗ୍ରହୀ ହେବେ ପ୍ରବାସୀ ଭାରତୀୟ । ବିକଶିତ ଓଡିଶା ଆଡକୁ ଆଉ ପାଦେ ଆଗକୁ ଯିବ ଆମ ରାଜ୍ୟ ।

Argus News | argus news | -Argusnews Home: Odisha Latest News, Breaking News, Trending News, Live TV and more