ଫୁଲୁଛି ସୁବର୍ଣ୍ଣରେଖା। ବିପଦ ସଙ୍କେତ ଉପରେ ଗତି କରୁଛି। ଜଳ ବନ୍ଦୀ ଭିତରେ ଓଡ଼ିଶା ଓ ଝାଡ଼ଖଣ୍ଡ ସିମାବର୍ତ୍ତି ଅଞ୍ଚଳ ସାରସକଣା ବ୍ଲକର ନେଦା ଗାଁ। ଚଳିତ ବର୍ଷର ଏହା ହେଉଛି ପ୍ରଥମ ବନ୍ୟା। ନଦୀରେ ଜଳ ସ୍ତର ବଢିବା ପରେ ନେଦା ଗ୍ରାମକୁ ଯୋଗାଯୋଗ ବିଛିନ୍ନ ହୋଇଛି । ଝାଡଖଣ୍ଡ ଗାଲୁଡିହି ବ୍ୟାରେଜରୁ ପାଣି ଛାଡିବା ଯୋଗୁଁ ସୁବର୍ଣ୍ଣରେଖା ନଦୀରେ ବନ୍ୟା ପରିସ୍ଥିତି ସୃଷ୍ଟି । ୩ଦିନ ଧରି ଅଧିକ ବୃଷ୍ଟିପାତ ଯୋଗୁଁ ଅଧିକ ପାଣି ଆସିବା କାରଣରୁ ଏକାସାଙ୍ଗରେ ୧୩ଟି ଗେଟ ଖୋଲାଯାଇଛି ଯାହାଫଳରେ ୭୬୦୦ କ୍ୟୁସେକ ଜଳ ସୁବର୍ଣ୍ଣରେଖା ନଦୀରେ ପ୍ରବାହିତ ହେଉଛି ।

ଗତକାଲି ସନ୍ଧ୍ୟାରୁ ମୟୂରଭଞ୍ଜ ଜିଲ୍ଲା ସାରସକଣା ବ୍ଲକ ନେଦା ଗ୍ରାମରେ ବନ୍ୟା ପ୍ରଭାବ ଯୋଗୁଁ ତଳିଆ ଅଞ୍ଚଳର ଲୋକଙ୍କୁ ସ୍ଥାନାନ୍ତର କରାଯାଇଛି । ସେହିପରି ରାସଗୋବିନ୍ଦପୁର ବ୍ଲକର ଟିକାୟତପୁର ଅଞ୍ଚଳରେ ଆଜି ବନ୍ୟା ଜଳ ପ୍ରବେଶ କରିବା ଫଳରେ ତଳି ଅଞ୍ଚଳରେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯିବା ସହ ଜିଲ୍ଲା ପ୍ରଶାସନ ପକ୍ଷରୁ ଖାଦ୍ୟ ଯୋଗାଇ ଦିଆଯାଉଥିବା କଥା ମୟୂରଭଞ୍ଜ ଜିଲ୍ଲାପାଳ କହିଛନ୍ତି।