କମୁଛି ନଦୀ ଜଳ, ହେଲେ ବଢୁଛି ଦୁର୍ଦ୍ଦଶା । ବିପଦ ସଂକେତ ତଳେ ପ୍ରବାହିତ ହେଉଛି ବୈତରଣୀ ନଦୀର ବନ୍ୟା ଜଳ । ବିଭିନ୍ନ ସ୍ଥାନରୁ ଆସିଛି ଏଭଳି ଦୃଶ୍ୟ। ଆଖୁଆପଦା ଆନିକଟଠାରେ ବିପଦ ସଂକେତ ୧୮.୩୩ ରହିଥିବା ବେଳେ ସକାଳ ୬ଟା ସୁଦ୍ଧା ୧୭.୯୭ ମିଟର ବନ୍ୟା ଜଳ ପ୍ରବାହିତ ହେଉଛି । କିନ୍ତୁ ସତର୍କ ସଂକେତ ଉପରେ ପ୍ରବାହିତ ହେଉଛି ବନ୍ୟା ଜଳ । ସେପଟେ ଧାମନଗର ହସନବାଦ ପଞ୍ଚାୟତ ଅନୁଳୁଡିହ ଗାଁରେ ପଶିଛି ବନ୍ୟା ପାଣି। ପାଣି ଘେରରେ ରହିଛନ୍ତି ଲୋକେ । ଧୂଷୁରୀରୁ ଯାଜପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତା ଉପରେ ୩ ଫୁଟ ଉଚ୍ଚରେ ବନ୍ୟା ଜଳ ପ୍ରବାହିତ ହେଉଛି । ଫଳରେ ଯୋଗାଯୋଗ ବିଚ୍ଛିନ୍ନ ହୋଇଯାଇଛି ।

ଧାମନଗର ପଧାନୀ ପଞ୍ଚାୟତ ସଇଲ ଗାଁ ନିକଟରେ ବୈତରଣୀର ଶାଖା ନଦୀ କୋଚିଳା ନଦୀରେ ଦୁର୍ବଳ ହୋଇ ରହିଛି ନଦୀ ବନ୍ଧ । ଏନେଇ ଭୟଭୀତ ଅବସ୍ଥାରେ ସ୍ଥାନୀୟ ଲୋକ ରହିଥିବା ବେଳେ ବିଭାଗ ଅଧିକାରୀ ତରଫରୁ ମରାମତି ହୋଇଛି । ସେପଟେ ଏନେଇ ସ୍ଥାନୀୟ ବାସିନ୍ଦାଙ୍କ ପ୍ରତିକ୍ରିୟା । ବନ୍ୟା ଆଣିଛି ଦୁଃଖ । କାଣୀ ନଦୀରେ ଦଶରଥପୁର ବ୍ଲକ ଅହିୟାସ ପଞ୍ଚାୟତର ବଙ୍ଗାଳାବାଡିରେ ଏକ ଘାଇ ସୃଷ୍ଟି ହୋଇଥିବାରୁ ୨୦ଟି ପଞ୍ଚାୟତ ଏବଂ ଯାଜପୁର ବ୍ଲକର ଗୋଟିଏ ପଞ୍ଚାୟତ ଜଳବନ୍ଦୀ ହୋଇଛି । ଦଶରଥପୁର ବ୍ଲକର କଷପା, ମଲିକାପୁର, ତରପଦା, ସୁଶୁଆ, ଦୁଦୁରାଅଣ୍ଟା, ନିଜାମପୁର, ଦତ୍ତପୁର, କୟାଁ, କମରଡିହ, ଖାନନଗର, ଛଚିଣା, ମଙ୍ଗଳପୁର, ଯୟନ୍ତରା, କଟିକଟା ପଞ୍ଚାୟତ ବନ୍ୟାଜଳରେ ପ୍ରଭାବିତ ହୋଇଛନ୍ତି ।

ଯାଜପୁର ଜିଲ୍ଲା ପ୍ରଶାସନ ପକ୍ଷରୁ ରିଲିଫ ଓ ଉଦ୍ଧାର କାର୍ଯ୍ୟ ଜାରି ରହିଛି । ସେହି ୨୧ଟି ପଞ୍ଚାୟତର ୧୮ ହଜାର ୪୩୩ ଜଣ ଲୋକ ପ୍ରଭାବିତ ହୋଇଛନ୍ତି । ୬ ହଜାର ୧୯୧ଜଣ ଲୋକଙ୍କୁ ଆଶ୍ରୟସ୍ଥଳୀକୁ ସ୍ଥାନାନ୍ତରିତ କରାଯାଇଛି । ୧୪ଟି ରିଲିଫ ସେଣ୍ଟର ଖୋଲା ଯାଇ ପ୍ରଭାବିତ ଲୋକଙ୍କୁ ଶୁଖିଲା ଓ ରନ୍ଧା ଖାଦ୍ୟ ପ୍ରଦାନ କରାଯାଉଛି । ଆମ୍ବୁଲାନ୍ସ ସହିତ ୨ଟି ମେଡିକାଲ ଟିମ୍ ଓ ୯ଟି ଭେଟନାରୀ ଟିମ୍ ନିୟୋଜିତ ହୋଇଛନ୍ତି । ରିଲିଫ ଓ ଉଦ୍ଧାର କାର୍ଯ୍ୟରେ ୨ଟି ଓଡ୍ରାଫ୍ ଓ ଗୋଟିଏ ଅଗ୍ନିଶମ ଟିମ୍ ନିୟୋଜିତ ହୋଇଛନ୍ତି ।

ଅଧିକ ପଢ଼ନ୍ତୁ ଓଡ଼ିଶା ଖବର:

Argus News | argus news | Odisha Latest News, Breaking News, Trending News, Live TV