Argus News - ଓଡ଼ିଶା ପାଇଁ ମୁଁ ଦାଦନ, ରାଜମିସ୍ତ୍ରୀ ହେବି

ଅର୍ଗସ ବ୍ୟୁରୋ: ଓଡ଼ିଆ ଜାତି ବଡ଼ ସ୍ଵାଭିମାନୀ...ସ୍ଥିତି ଯାହା ବି ହେଉ କାହା ସାମ୍ନାରେ ମୁଣ୍ଡ ନୂଆଇଁବା ଏ ଜାତିର ଲକ୍ଷଣ ନୁହେଁ । କିନ୍ତୁ ଏ ବିଜେଡି ସରକାର ଲାଗି ବିପଦରେ ଆଜି ଓଡ଼ିଶା...୨୫ ବର୍ଷର ସ୍ଥିର ସରକାର କିନ୍ତୁ ମୌଳିକ ସୁବିଧା ଦେବାରେ ପୂରା ପଛରେ ରାଜ୍ୟ ସରକାର । ପିଇବା ପାଇଁ ପାଣି ନାହିଁ, ଚାଲିବାକୁ ରାସ୍ତା ନାହିଁ । ନାହିଁ ନାହିଁରେ ଚାଲୁଛି ସରକାର । ଏତେ ସବୁ ଅବ୍ୟବସ୍ଥା ଥିବା ପରେ ବି ସରକାରଙ୍କୁ ସତେ ଯେମିତି କିଛି ଦିଶୁନି । ସେଇଥି ଲାଗି ରାଜ୍ୟ ସରକାରଙ୍କୁ ଟାର୍ଗେଟ୍‌ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । 

ମନେଥିବ ନିଶ୍ଚୟ, ଏଇ ତିନିମାସ ତଳେ ପିଇବା ପାଣି ଲାଗି ନାହିଁନଥିବା ଅସୁବିଧାର ସାମ୍ନା କରିଥିଲେ ହୀରାକୁଦବାସୀ । ଖାଲି ଅସୁବିଧା ସାମ୍ନା କରିଥିଲେ ତାହା ନୁହେଁ ବରଂ ପ୍ରାଣ ବି ହରାଇଥିଲେ । ଖାଲି ଏ ସମସ୍ୟା ନୁହେଁ ବରଂ ରାଜ୍ୟରେ ଦାଦନ ସଂଖ୍ୟା ଏବେ ହୁହୁ ହୋଇ ବଢିଲାଣି । ବାହାର ଜିଲ୍ଲା କଥା ଛାଡ, ଖୋଦ ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ଏବେ ଲକ୍ଷାଧିକ ଲୋକ ଦାଦନ ଯାଉଛନ୍ତି ପରିବାର ପୋଷିବାକୁ ।  କିନ୍ତୁ ୨୫ ବର୍ଷ ସରକାରରେ ରହିବା ପରେ ଓଡିଆ ଲୋକ କାହିଁକି ବାହାରକୁ କାମ ପାଇଁ ଯାଉଛନ୍ତି ?  କଂଗ୍ରେସ ଯେମିତି ବିଭିନ୍ନ ରାଜ୍ୟରେ ନିଶ୍ଚିହ୍ନ ହୋଇଗଲାଣି, ଠିକ୍ ସେମିତି ଅବସ୍ଥା ବିଜେଡିର ହେବ । ୨୫ ବର୍ଷରେ ବିକାଶ କରିଛନ୍ତି ବୋଲି ରାଜ୍ୟ ସରକାର କହୁଛନ୍ତି, ହେଲେ ଇଏ କେଉଁ ଓଡିଶା ବୋଲି ପ୍ରଶ୍ନ କରିଛନ୍ତି ଧର୍ମେନ୍ଦ୍ର । 

ବିକାଶ ତଥା ଓଡିଆ ଅସ୍ମିତାକୁ ନେଇ କେନ୍ଦ୍ରମନ୍ତ୍ରୀ କହିଛନ୍ତି ଆଉ 12 ବର୍ଷ ପରେ ଭାଷା ଭିତ୍ତିକ ସ୍ୱତନ୍ତ୍ର ରାଜ୍ୟ ଭାବେ ଓଡିଶାକୁ 100 ବର୍ଷ ପୁରିବ । ହେଲେ ଜାତୀୟ ସ୍ତରରେ ଶିଶୁମୃତ୍ୟୁ ହାରରେ ଓଡିଶା 2 ନମ୍ବର ସ୍ଥାନରେ ରହିଛି । ଜାତୀୟ ସ୍ତରରେ ମୁଣ୍ଡ ପିଛା ଚିକିତ୍ସା ଖର୍ଚ୍ଚ ୨୦୧୪ଟଙ୍କା ରହିଥିବାବେଳେ ଓଡିଶାରେ ଏହା 1449 ଟଙ୍କା । ଯେଉଁମାନଙ୍କ ହାତରେ ଶାସନ ଭାର ଅଛି ସେମାନଙ୍କୁ ଲକ୍ଷ୍ୟ କରି ଧର୍ମେନ୍ଦ୍ର କହିଛନ୍ତି ମାଙ୍କଡ ହାତରେ ଶାଳଗ୍ରାମ । ଭାଷାଭିତ୍ତିକ ରାଜ୍ୟ ଭାବେ ଓଡିଶା 100 ବର୍ଷ ପାଳିବାକୁ ଯାଉଥିବାବେଳେ ନ ଅଙ୍କ ଦୁର୍ଭିକ୍ଷ ସ୍ଥିତି ଆଡକୁ ଯିବା ନା 1 ନମ୍ବର ରାଜ୍ୟ ହେବା ତାହା ଓଡିଶାବାସୀ ସ୍ଥିର କରିବେ ।