ସମ୍ବଲପୁରରେ ଫୁଟିଲା ବିଦେଶୀ ଫୁଲ, ପ୍ରଶଂସା କଲେ ଧର୍ମେନ୍ଦ୍ର
Key Points
ରାଜ୍ୟରେ ପ୍ରଥମ ଥର ଫୁଟିଲା ଆମେରିକୀୟ ୟୁଷ୍ଟୋମା ଫୁଲ । ସମ୍ବଲପୁରରେ ଫୁଟିଲା ବିଦେଶୀ ଫୁଲ
ସମ୍ବଲପୁରରେ ଫୁଟିଲା ଆମେରିକୀୟ ଫୁଲ । ସମ୍ବଲପୁର ଜିଲ୍ଲା ଜୁଜୁମୁରା ବ୍ଲକ ସନାତନ ପାଲି ଗାଁରେ ସବୁଜ ସନାତନ ପାଲି ଏଫପିଓ ପକ୍ଷରୁ ପରୀକ୍ଷା ମୂଳକ ଭାବେ ଏହି ଫୁଲ ଚାଷ କରାଯାଇଥିଲା । ସବୁଜ ସନାତନପାଲିର ଏଫପିଓକୁ ୟୁଷ୍ଟୋମା ଫୁୁଲର ୨ ହଜାର ଚାରା ପ୍ରଦାନ କରିଥିଲା CSIR ଲକ୍ଷ୍ନୌ । ଗାଁରେ ନିର୍ମାଣ କରାଯାଇଥିବା ପଲି ହାଉସରେ ଏହି ଚାରା ରୋପଣ କରାଯାଇଥିଲା । ୨୦୨୫ ଅପ୍ରେଲ ୧୪ ତାରିଖରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସନାତନପାଲି ଗାଁକୁ ଗସ୍ତ କରି ପଲି ହାଉସରେ ଏହି ଚାରା ରୋପଣ କରିଥିଲେ । ପ୍ରାୟ ୩ ତିନି ମାସ ମଧ୍ୟରେ ଏହା ସଫଳତା ସହ କଢ଼ ହୋଇ ଫୁଲ ଫୁଟିଛି । ଏବେ ୟୁଷ୍ଟୋମା ଫୁଲର ୫ଟି ପ୍ରଜାତିର ଫୁଲ ଫୁଟିଥିବାବେଳେ ସୋସିଆଲ୍ ମିଡିଆରେ ପୋଷ୍ଟ କରି ଶୁଭେଚ୍ଛା ଜଣାଇଛନ୍ତି କେନ୍ଦ୍ରମନ୍ତ୍ରୀ । ୟୁଷ୍ଟୋମା ଫୁଲ ଓଡିଶାରେ ପ୍ରଥମ ଥର ଫୁଟିବାକୁ ପ୍ରଂଶସା କରିଛନ୍ତି । ଏହି ଫୁଲର ବାଣିଜ୍ୟିକ କୃଷି କଲେ ଚାଷୀଙ୍କୁ ବେଶ୍ ଭଲ ଆର୍ଥିକ ଲାଭ ମିଳିପାରିବ ବୋଲି କହିଛନ୍ତି ଧର୍ମେନ୍ଦ୍ର ପ୍ରଧାନ।
ୟୁଷ୍ଟୋମା ଉତ୍ତର ଆମେରିକୀୟ ଫୁଲ । ମୁଖ୍ୟତଃ ୟୁରୋପ, ଅଷ୍ଟେଲିଆ, ନ୍ୟୁଜିଲାଣ୍ତ, ଜାପାନ ସହ ଆମେରିକାରେ ବ୍ୟବହାର ହୋଇଥାଏ । ଏହି ଫୁଲ ତୋଲିବାର ଦୀର୍ଘ ଦିନ ବି ତାଜା ରହୁଛି । ସନାତନପାଲିର ଯୁବ ଚାଷୀ ଈତିଶ ପ୍ରଧାନ ଏହି ଚାଷର ଦ୍ଵାୟିତ୍ବ ନେଇଛନ୍ତି । ଏବେ ପରୀକ୍ଷା ମୂଳକ ଭାବେ ହୋଇଥିବା ଏହି ଚାଷରେ ଶତାଧିକ ସଂଖ୍ୟାରେ ଫୁଲ ଫୁଟିଛି । ଏହି ବିଦେଶୀ ଫୁଲର ବେଶ୍ ଚାହିଦା ଥିବାରୁ ଫୁଲ ତୋଡ଼ାର ମୂଲ୍ୟ ୧୫ ଶହ ଟଙ୍କା ରହିଛି। ତେବେ ଏହାକୁ ଏବେ ବିକ୍ରି କରାଯିବ ନାହିଁ । ଏହାର ମଞ୍ଜି ସରଂକ୍ଷିତ ରଖାଯିବ ।
ଫୁଲ ଫୁଟିବା ପରେ ଶୁକ୍ରବାର ରାଜ୍ୟ କୃଷି ବିଭାଗର ଯୁଗ୍ମ ନିର୍ଦ୍ଦେଶିକା ଗୀତାଶ୍ରୀ ପାଢୀ ଏକ ଟିମ ସହ ପରିଦର୍ଶନ କରିଛନ୍ତି । ଏହି ଫୁଲ ଚାଷ ଦ୍ବାରା ଚାଷୀଙ୍କୁ ଆର୍ଥିକ ଅଭିବୃଦ୍ଧିରେ ବଡ଼ ସହାୟକ ହେବ ।
