କିଛି ଦିନ ତଳେ ଦେଶର ସବୁଠ ଉତ୍ତପ୍ତ ଜିଲ୍ଲା ପାଲଟିଥିଲା ବୌଦ୍ଧ । ଗତ କିଛି ଦିନ ହେବ ଲଗାତାର ୪୦ ଡିଗ୍ରୀ ଅତିକ୍ରମ କରୁଛି ତାତି । ଖଇଫୁଟା ଖରାରେ ଆଉଟୁ ପାଉଟୁ ହେଉଛନ୍ତି ଜିଲ୍ଲାବାସୀ । ସକାଳ ୯ଟା ପରେ ଘରୁ ବାହାରିବା ମୁସ୍କିଲ । ବିଗତ ୫ ବର୍ଷର ରେକର୍ଡ ଭାଙ୍ଗିଛି ଚଳିତ ବର୍ଷର ଖରା । ଜିଲ୍ଲାରେ ଅସଂଖ୍ୟ କୋଠା ବାଡ଼ି ନିର୍ମାଣ ସହ ଗଛକଟା, ମହାନଦୀର ଉତ୍ତପ୍ତ ବାଲି ତାପମାତ୍ରା ବୃଦ୍ଧିର ମୂଳ କାରଣ ବୋଲି କହିଛନ୍ତି ପରିବେଶବିତ୍ ।

ପ୍ରବଳ ଖରା, ଗରମ ସାଙ୍ଗକୁ ଜଙ୍ଗଲ ନିଆଁ ଜିଲ୍ଲାବାସୀଙ୍କ କଷ୍ଟକୁ ଦ୍ବିଗୁଣିତ କରିଛି । ପ୍ରତିଦିନ ହୁ ହୁ ହୋଇ ଜଳି ଯାଉଛି ଅନେକ ଜଙ୍ଗଲ । ଦିନକୁ ଦିନ ନିଆଁ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ବ୍ୟାପିବାରେ ଲାଗିଛି । ନିଆଁ ଦାଉରୁ ରକ୍ଷା ପାଇବା ପାଇଁ ବନ୍ୟଜନ୍ତୁ ଗାଁ ମୁହାଁ ହେଉଛନ୍ତି । ବୌଦ୍ଧ ବନଖଣ୍ଡ କଣ୍ଟାମାଲ ଓ ମନମୁଣ୍ଡାର ଅନେକ ଜଙ୍ଗଲରେ ନିଆଁ ଲାଗିଛି । ବନ ବିଭାଗ ପକ୍ଷରୁ ବିଭିନ୍ନ ଗାଁରେ ବନାଗ୍ନି ସଚେତନତା କରିବାକୁ ଦାବି ହୋଇଛି ।