ନୟାଗଡ଼ରେ ଚାଞ୍ଚଲ୍ୟ । ଘର ଭିତରୁ ଫରେଷ୍ଟରଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର । ଆହତ ହୋଇଛନ୍ତି ସ୍ତ୍ରୀ । ନୟାଗଡ଼ ଜିଲ୍ଲା ପଞ୍ଚରିଡା ରେଞ୍ଜ ଫରେଷ୍ଟର ଶିଶିର ସାହୁଙ୍କ ମୃତଦେହକୁ ଟାଉନ ଥାନା ପୋଲିସ ଜବତ କରିଛି । ବାରମାସୀ ଦଣ୍ଡା ସ୍ଥିତ ଶିଶିରଙ୍କ ଘରେ ଏ ଘଟଣା ଘଟିଛି । ଗତକାଲି ବିଳମ୍ବିତ ରାତିରେ ଶିଶିର ଏବଂ ତାଙ୍କ ସ୍ତ୍ରୀ, ପୁଅ ଘରେ ଥିବାବେଳେ ହଠାତ୍ ଘରୁ ନିଆଁ ବାହାରିଥିଲା । ଶିଶିରଙ୍କ ସ୍ତ୍ରୀ ଘରୁ ବାହାରି ଚିତ୍କାର କରି ଡାକିଥିଲେ ଘରେ ନିଆଁ ଲାଗିଯାଇଛି । ଆଉ ସେହି ନିଆଁରେ ଶିଶିର ପୋଡ଼ି ଯାଇଛନ୍ତି, ଘର ଭିତରେ ତାଙ୍କ ମୃତଦେହ ରହିଛି ।

ଖବର ପାଇ ଫାୟାର ଟିମ୍ ନିଆଁଙ୍କୁ ଆୟତ କରିଥିବା ବେଳେ, ଘଟଣାର ତଦନ୍ତ କରୁଛି ପୋଲିସ । ନିଆଁ ଲାଗି ଘରେ ଥ‌ିବା ସ୍କୁଟି ପୋଡ଼ି ଯାଇଥିବା ବେଳେ, ଅନେକ ଆସବାବପତ୍ର ମଧ୍ୟ ପୋଡିଯାଇଛି । ନିଆଁ ଲାଗିବାର କାରଣ ଅସ୍ପଷ୍ଟ ରହିଥ‌ିବାରୁ ଶିଶିରଙ୍କ ମୃତ୍ୟୁ ନେଇ ନାନା ସନ୍ଦେହ ସୃଷ୍ଟି ହୋଇଛି । ପଞ୍ଚରିଡ଼ା ଫରେଷ୍ଟର ଶିଶିର ସାହୁଙ୍କର ଘର ମାନପୁର ହୋଇଥିବା ବେଳେ ସେ ନୟାଗଡ଼ ସହରର ବାରମାସୀଦଣ୍ଡା ସ୍ଥିତ ଅଞ୍ଚଳରେ ଘର କରି ସ୍ତ୍ରୀ ଏବଂ ପୁଅଙ୍କ ସହ ରହୁଥିଲେ । ଟାଉନ ଥାନା ପୁଲିସ ଶିଶିରଙ୍କ ପୁଅଙ୍କୁ ପଚରାଉଚରା କରୁଛି । ଶିଶିର ନିଜ ଦେହରେ ନିଆଁ ଲଗାଇ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ହତ୍ୟା କରିବା ପରେ ତାଙ୍କ ଦେହରେ ନିଆଁ ଲଗାଇ ଦେଇଛି । ନା ଘରେ ନିଆଁ ଲାଗି ତାଙ୍କର ମୃତ୍ୟୁ ହୋଇଛି ।