ଅର୍ଗସ ବ୍ୟୁରୋ: ପୁଣି ଅଡୁଆରେ ପୂର୍ବତନ ମନ୍ତ୍ରୀ ପ୍ରତାପ ଜେନା । ପୁଣି ଆଇନ ଜାଲରେ ଛନ୍ଦି ହୋଇଛନ୍ତି ମାହାଙ୍ଗାର ପୂର୍ବତନ ବିଧାୟକ । ମାହାଙ୍ଗା ଡବଲ ମର୍ଡର ଘଟଣାରେ ପ୍ରତାପଙ୍କୁ ନୋଟିସ୍ ଜାରି କରିଛନ୍ତି ସୁପ୍ରିମକୋର୍ଟ । ଚାରି ସପ୍ତାହ ପରେ ମାମଲାର ଶୁଣାଣି ହେବାକୁ ଥିବାବେଳେ ନିମ୍ନ ଅଦାଲତରେ ରେକର୍ଡ ହୋଇଥିବା ସାକ୍ଷୀଙ୍କ ବୟାନ ସତ୍ୟପାଠ ଜରିଆରେ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ହାଇକୋର୍ଟ ପ୍ରତାପ ଜେନାଙ୍କୁ ଦେଇଥିବା କ୍ଲିନଚିଟକୁ ବିରୋଧ କରି ସୁପ୍ରିମକୋର୍ଟ ଯାଇଛନ୍ତି ମୃତକ କୁଳମଣି ବରାଳଙ୍କ ପୁଅ ରଞ୍ଜିତ ବରାଳ ।

2021 ମସିହା ଜାନୁଆରୀ 2ରେ ମାହାଙ୍ଗାର ନୃତଙ୍ଗରେ ଘଟିଥିଲା ନାରକୀୟ କାଣ୍ଡ। ଦୁଇ ବିଜେପି ନେତା କୁଳମଣି ବରାଳ ଓ ଦିବ୍ୟସିଂହ ବରାଳଙ୍କୁ ନିର୍ମମ ଭାବେ ହତ୍ୟା କରିଥିଲେ ଦୃବୁର୍ତ୍ତ । 12 ଜଣଙ୍କ ସହ ମୁଦାଲା ନମ୍ବର 13 ଥିଲେ ସେତେବେଳର ଆଇନ ମନ୍ତ୍ରୀ ପ୍ରତାପ ଜେନା । ପ୍ରତାପଙ୍କ ଇସାରାରେ ଏହି ଜଘନ୍ୟ କାଣ୍ଡ ହୋଇଥିବା ଅଭିଯୋଗ କରିଥିଲେ ପରିବାର। କିଛି ଦିନ ପରେ ମୁଖ୍ୟ ଅଭିଯୁକ୍ତ କାବୁଆ ଓରଫ୍ ପ୍ରଫୁଲ୍ଲ ବିଶ୍ବାଳର ମୃତ୍ୟୁ ବଢ଼ାଇଥିଲା ସନ୍ଦେହ । ପ୍ରତାପ ଜେନାଙ୍କ ପରିବାର ମାଲିକାନାରେ ଥିବା ଦୁଃଶାସନ ଜେନା ୟାର୍ଡ ନିକଟରୁ ମିଳିଥିଲା କାବୁଆର ମୃତଦେହ ।

ପ୍ରମାଣ ନଷ୍ଟ ପାଇଁ କାବୁଆକୁ ମର୍ଡର କରାଯାଇଥିବା ଅଭିଯୋଗ ଭିତରେ ପୁଣି ବିବାଦକୁ ଆସିଥିଲେ ପ୍ରତାପ ଜେନା। ତେବେ ଚାର୍ଜସିଟରୁ ତାଙ୍କ ନାଁ କାଟିଦେଲା ପୋଲିସ । ଅଦାଲତରେ ମାମଲାର ଶୁଣାଣି ବେଳେ ସାମ୍ନାକୁ ଆସିଥିଲା ସାଂଘାତିକ ତଥ୍ୟ। ପ୍ରତାପ ଜେନା ଓ ତାଙ୍କ ସହଯୋଗୀମାନେ ମୁଖ୍ୟ ଅଭିଯୁକ୍ତ କାବୁଆକୁ ଫୋନ୍ କରିଥିବା କଥା ଜଣାପଡ଼ିଥିଲା। ସାଲେପୁର କୋର୍ଟ ପ୍ରତାପଙ୍କ ବିରୋଧରେ ଦଫା 302ରେ ମାମଲା ଚଲାଇବା ପାଇଁ ନିର୍ଦ୍ଦେଶ ଦେଇଥିଲେ । ତା ପରେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ ପ୍ରତାପ ଜେନା । ହାଇକୋର୍ଟ ତାଙ୍କୁ କ୍ଲିନଚିଟ୍ ଦେବା ସହ ମାମଲା ରଦ୍ଦ କରିଥିଲେ । ଯାହା ବିରୋଧରେ ସୁପ୍ରିମକୋର୍ଟ ଯାଇଥିଲେ କୁଳମଣି ବରାଳଙ୍କ ପୁଅ।

ମାହାଙ୍ଗା ଡବଲ୍ ମର୍ଡରକୁ ନେଇ ରହିଛି ଅନେକ ପ୍ରଶ୍ନ। ହତ୍ୟାକାଣ୍ଡ ପଛର ଉଦ୍ଦେଶ୍ୟ କଣ ? ଆବାସ କେଳେଙ୍କାରୀର ଖୁଲାସା କଲେ ବୋଲି କୁଳମଣିଙ୍କୁ କରାଗଲା କି ହତ୍ୟା ? କେଉଁ ପ୍ରମାଣ ଆଧାରରେ ଚାର୍ଜସିଟରୁ ପ୍ରତାପଙ୍କ ନାଁ କାଟି ଦେଇଥିଲା ପୋଲିସ ? ହତ୍ୟା ଅଭିଯୁକ୍ତ କାବୁଆର କେମିତି ହେଲା ମୃତ୍ୟୁ ? ପ୍ରତାପ ଜେନାଙ୍କ ପରିବାରର ଷ୍ଟକୟାର୍ଡ ନିକଟରୁ ଶବ ମିଳିବା ବଢ଼ାଉନାହିଁ କି ସନ୍ଦେହ ? ପ୍ରତାପ ଜେନା କାବୁଆକୁ କଲ୍ କରିଥିବା ସତ ନା ନୁହେଁ ? ପ୍ରତାପଙ୍କ ସହଯୋଗୀ ମାନେ କାହିଁକି କାବୁଆକୁ ବାରମ୍ବାର କଲ୍ କରିଥିଲେ ? କାହିଁକି ଏନେଇ କେବେ ମୁହଁ ଖୋଲିନାହାନ୍ତି ପ୍ରତାପ ? ମାମଲାରେ 151 ପୃଷ୍ଠାର ଦସ୍ତାବିଜ୍ ଦାଖଲ ହୋଇଥିବାବେଳେ ସୁପ୍ରିମକୋର୍ଟଙ୍କ ରାୟ ସ୍ଥିର କରିବ ପ୍ରତାପଙ୍କ ଭାଗ୍ୟ ।

ମାହାଙ୍ଗା ଡବଲ୍ ମର୍ଡର - ପ୍ରତାପ - ଅନେକ ପ୍ରଶ୍ନ

ମାହାଙ୍ଗା ଡବଲ୍ ମର୍ଡର ପଛର ମୋଟିଭ୍ କଣ ?
ଆବାସ କେଳେଙ୍କାରୀର ଖୁଲାସା କଲେ ବୋଲି କୁଳମଣିଙ୍କୁ ମାରିଦେଲେ କି ?
କେଉଁ ପ୍ରମାଣ ଆଧାରରେ ଚାର୍ଜସିଟରୁ ପ୍ରତାପଙ୍କ ନାଁ କାଟି ଦେଇଥିଲା ପୋଲିସ ?
ହତ୍ୟା ଅଭିଯୁକ୍ତ କାବୁଆର କେମିତି ହେଲା ମୃତ୍ୟୁ ?
ପ୍ରତାପ ଜେନାଙ୍କ ପରିବାରର ଷ୍ଟକୟାର୍ଡ ନିକଟରୁ ଶବ ମିଳିବା ବଢାଉନି କି ସନ୍ଦେହ ?
ପ୍ରତାପ ଜେନା କାବୁଆକୁ କଲ୍ କରିଥିବା ସତ ନା ନୁହେଁ ?
କାବୁଆକୁ କାହିଁକି ବାରମ୍ବାର କଲ୍ କରିଥିଲେ ପ୍ରତାପଙ୍କ ସହଯୋଗୀ ?
କାହିଁକି ଏନେଇ କେବେ ମୁହଁ ଖୋଲିନାହାନ୍ତି ପ୍ରତାପ ?

ଅଧିକ ପଢ଼ନ୍ତୁ ରାଜନୀତି ଖବର:

Argus News | argus news | Odisha Latest News, Breaking News, Trending News, Live TV