ଅନୁଗୁଳ କଣିହାଁ ନାଲମ ଗାଁରେ ଜନ୍ମ ହୋଇଥିଲେ ଦେବେନ୍ଦ୍ର ପ୍ରଧାନ । କଟକ ଏସସିବିରୁ ଏମବିବିଏସ ଡିଗ୍ରୀ ହାସଲ ପରେ ମାତ୍ର ୬ବର୍ଷ ପାଇଁ କରିଥିଲେ ଚାକିରି । ୧୯୮୦ରେ ରାଜନୀତିରେ ଏଣ୍ଟ୍ରି ମାରିଥିଲେ ଦେବେନ୍ଦ୍ର । ୧୯୮୮ରୁ ୯୦, ୯୦ରୁ ୯୩ ଏବଂ ୯୫ରୁ ୯୭ ଯାଏଁ ସାଜିଥିଲେ ରାଜ୍ୟ ବିଜେପିର ମଙ୍ଗୁଆଳ । ବାଜପେୟୀଙ୍କ ମନ୍ତ୍ରିମଣ୍ଡଳରେ କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀ ଭାବେ କରିଥିଲେ କାର୍ଯ୍ୟ ।

ବୋଧହୁଏ କେବେକେବେ ନିଜକୁ ଭୋଗିବା ଭୁଲିଯାଇଥିବା, ନିଜକୁ ଭାବିବା ଭୁଲିଯାଉଥିବା କିଛି ଲୋକ ଧରାକୁ ଆସନ୍ତି । ଯେଉଁମାନେ କେବେ ଦୀପ ହୋଇ ଜଳୁଥାନ୍ତି ତ ଆଉ କେବେ ଦୀପ ଜାଳୁଥାନ୍ତି । ନିଜ ସୁଖଠୁ ଛୁଟି ନେଇ ଆସି ଗରିବ, ମଳିମୁଣ୍ଡିଆ, ସାଧାରଣ ମଣିଷଙ୍କ ବୋଝ ବୋହିବା ପାଇଁ ଯେଉଁମାନେ କାନ୍ଧରୁ ଷ୍ଟେଥୋସ୍କୋପ ଓହ୍ଲାଇ ଦିଅନ୍ତି ଓ ରାଜନୀତି ମାଧ୍ୟମରେ ଜନସେବାର ଭାରକୁ କାନ୍ଧରେ ଉଠାନ୍ତି । କାହିଁକି ନା ରାଜନୀତି, ସେମାନଙ୍କ ପାଇଁ ଗୋଟେ ବୃତ୍ତିର ନାଁ ନୁହେଁ, ସ୍ୱପ୍ନର ନାଁ ବି । ଜନସେବା, କେବଳ ଗୋଟେ ଜୟପାଠର ନାଁ ନୁହେଁ, ଜୟଯାତ୍ରାର ବି । ହେଲେ ସେ ସ୍ୱପ୍ନକୁ ପ୍ରତି ମୁହୂର୍ତ୍ତରେ ଜୀଉଁଥିବା ସୌଦାଗର ଆଉ ସେ ଜୟଯାତ୍ରାରେ ଜୟପାଠ କରୁଥିବା ମଣିଷ ଜଣକ କିନ୍ତୁ ଆଜି ସେପାରିର ଅତିଥି ।

ନିର୍ଭେଜାଲ ବ୍ୟକ୍ତିତ୍ୱ ସାଙ୍ଗକୁ ସୌମ୍ୟ ସ୍ମିତହାସ୍ୟ, ଶାଣିତ ସ୍ୱର । କହିବାକୁ ଗଲେ ଓଡ଼ିଶା ବିଜେପିର ନିଅଁ ରଖିଥିବା ଦେବେନ୍ଦ୍ର ପ୍ରଧାନଙ୍କ ଜନ୍ମ ୧୬ ଜୁଲାଇ ୧୯୪୧ରେ ଅନୁଗୁଳ କଣିହାଁ ନାଲମ ଗାଁରେ । ତାଳଚେରର ଯୁବରାଜ ହାଇସ୍କୁଲ ଓ ପରେ ଅନୁଗୁଳ କଲେଜରୁ ଇଣ୍ଟରମିଡିଏଟ୍ ବିଜ୍ଞାନ ପଢ଼ିବା ପରେ କଟକ ଏସସିବିରୁ ଏମବିବିଏସ ଡିଗ୍ରୀ ହାସଲ କରିଥିଲେ । ଡାକ୍ତର ହେବା ସମସ୍ତଙ୍କର ସ୍ୱପ୍ନ । ହେଲେ ସ୍ୱପ୍ନକୁ ପର କରି ୧୯୬୭ରୁ ମାତ୍ର ୬ ବର୍ଷ ପାଇଁ ଚାକିରି କରି ୧୯୭୩ରେ ସରକାରୀ ଡାକ୍ତରୀ ପେଶାରୁ ସ୍ବେଚ୍ଛାକୃତ ଅବସର ନେଇଥିଲେ ।

୧୯୮୦ ଜାନୁଆରୀ ୧୦ରେ ବିଜେପିରେ ସାମିଲ ହେବା ପରେ ତାଙ୍କ ରାଜନୀତିର ମଇଦାନରେ ବିଧିବଦ୍ଧ ଏଣ୍ଟ୍ରି ହୋଇଥିଲା । ଦକ୍ଷ ଆଉ ସଂଘର୍ଷକୁ ପାଥେୟ କରି ମାଟିରୁ ଆକାଶ ଯାଏଁ ରାଜନୈତିକ ଯାତ୍ରାର ପଥିକ ଥିଲେ ଦେବେନ୍ଦ୍ର । ୧୯୮୦-୮୩ ବିଜେପିର ତାଳଚେର ମଣ୍ଡଳ ସଭାପତି, ୧୯୮୩-୮୮ ଅବିଭକ୍ତ ଢେଙ୍କାନାଳ ଜିଲ୍ଲାର ସଭାପତି ଭାବେ କାର୍ଯ୍ୟ କରି ଓଡ଼ିଶାରେ ବିଜେପି ସଙ୍ଗଠନକୁ ଆଗକୁ ନେବାରେ ନେଇଥିଲେ ପ୍ରମୁଖ ଭୂମିକା । ପରେ ୧୯୮୮ରୁ ୯୦, ୯୦ରୁ ୯୩ ଏବଂ ୯୫ରୁ ୯୭ ଯାଏଁ ସାଜିଥିଲେ ରାଜ୍ୟ ବିଜେପିର ମଙ୍ଗୁଆଳ । ଓଡ଼ିଶାରେ ବିଜେପିର ଇତିହାସରେ ସିଂହଭାଗ ଭୂମିକା ଡାକ୍ତର ପ୍ରଧାନଙ୍କର ଥିଲା । ଓଡ଼ିଶାର ଘରେ ଘରେ ବିଜେପିକୁ ପହଞ୍ଚାଇବାରେ ତାଙ୍କର ସକ୍ରିୟ ଭୂମିକା ପାଇଁ ତାଙ୍କୁ ରାଜ୍ୟ ବିଜେପିର ଭୀଷ୍ମ ପିତାମହ ବୋଲି ମଧ୍ୟ କୁହାଯାଏ ।

ଜନସେବା ପ୍ରତି ତାଙ୍କର ପ୍ରତିବଦ୍ଧତା ତଥା ନିଷ୍ଠା ଓ ସମର୍ପଣ ପାଇଁ ଦେବଗଡ଼ରୁ ୧୯୯୮ ନିର୍ବାଚନ ଜିତି ଲୋକସଭା ଯାଇଥିଲେ ଦେବେନ୍ଦ୍ର । ଏହି ସମୟରେ ବାଜପେୟୀଙ୍କ ମନ୍ତ୍ରିମଣ୍ଡଳରେ ସେ କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀ ଭାବେ କାର୍ଯ୍ୟ କରିଥିଲେ । ୧୯୯୯ରେ ସେ ପୁନଃ ନିର୍ବାଚିତ ହୋଇଥିବା ବେଳେ କୃଷି ରାଷ୍ଟ୍ରମନ୍ତ୍ରୀ ଭାବେ ତାଙ୍କୁ ଅତିରିକ୍ତ ଦାୟିତ୍ବ ଦିଆଯାଇଥିଲା । ୨୦୦୧ରେ ସେ ବିଜେପି ରାଷ୍ଟ୍ରୀୟ ଉପସଭାପତି ଭାବେ ନିଯୁକ୍ତି ପାଇବା ସହ କେନ୍ଦ୍ରରେ ନିଜ ସ୍ଥିତି ମଜବୁତ କରିପାରିଥିଲେ ।

ଦେବେନ୍ଦ୍ର ପ୍ରଧାନ ଏମିତି ଆତ୍ମା ଯିଏ ତମାମ ଜୀବନ ଖାଣ୍ଟି ଓଡ଼ିଆଟେ ହେଇ ବଞ୍ଚିଥିଲେ, ଓଡ଼ିଶା ଉପରେ ଧୂଳି ପଡ଼ିଲେ, ଓଡ଼ିଆଙ୍କ ଆଖିରୁ ଲୁହ ଝରିଲେ ଯାହା ଛାତି ବତୁରି ଯାଉଥିଲା । ତମାମ ଜୀବନ ସେ କହୁଥିଲେ ଶାନ୍ତିପୂର୍ଣ୍ଣ ସହାବସ୍ଥାନର କଥା, ପାରସ୍ପରିକ ପ୍ରିୟବୋଧର କଥା, ପରସ୍ପରର ଆସ୍ଥା ଓ ଅସ୍ତିତ୍ବ ପ୍ରତି ସମ୍ମାନବୋଧର କଥା । ସେଥିପାଇଁ ତ ଆଜି ତାଙ୍କ ସମ୍ମାନରେ ବିଜେପି ରାଜ୍ୟ କାର୍ଯ୍ୟାଳୟ ଓ ଭୁବନେଶ୍ବରସ୍ଥିତ ବାସଭବନ ହୋଇଛି ଲୋକାରଣ୍ୟ । ମୋଟାମୋଟି ଓଡ଼ିଶା ବିଜେପିର ବୀଜରୋପଣର ବାଇମୁଣ୍ଡି ଭାବେ ଦେବେନ୍ଦ୍ର ପ୍ରଧାନ ମନେ ରହିବେ ଯୁଗଯୁଗ।