ଆଗାମୀ ଦିନରେ କିପରି ରିପିଟ ହେବନାହିଁ ବହି ବିଭ୍ରାଟ । ଯେଉଁଠି ତ୍ରୁଟି ରହିଲା, ତାକୁ କିଭଳି କରାଯିବ ସଂଶୋଧନ । ଏନେଇ କମିଟିର ୧୪ ସୁପାରିଶକୁ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ଅନ୍ୟପଟେ ୨୦୨୪ରେ ନିଲମ୍ବିତ ପୂର୍ବତନ ନିର୍ଦ୍ଦେଶକ ମନୋଜ ପାଢୀଙ୍କ ବିରୋଧରେ ୧୦ରୁ ଅଧିକ ବିଧାୟକ ଲେଖିଥିବା ଚିଠି ବି ସାମ୍ନାକୁ ଆସିଛି । ମୁଖ୍ୟମନ୍ତ୍ରୀ ବି ଷଡ଼ଯନ୍ତ୍ରର ଗନ୍ଧ ବାରିଥିବାରୁ ଏହି ଅଧିକାରୀଙ୍କ ବିରୋଧରେ ଆଉ କି କାର୍ଯ୍ୟାନୁଷ୍ଠାନ ହେଉଛି , ତା ଉପରେ ରହିଛି ନଜର ।
ବହି ବିଭ୍ରାଟ ଘଟଣାରେ ମୁଖ୍ୟମନ୍ତ୍ରୀ କଡ଼ା ଆକ୍ସନ ନେବା ସହ କମିଟିର ୧୪ ସୁପାରିଶକୁ କାର୍ଯ୍ୟକାରୀ କରିବାକୁ ଦେଇଛନ୍ତି ନିର୍ଦ୍ଦେଶ । ଯାହା ଭିତରେ ପ୍ରମୁଖ ରହିଛି, ଅଭେଦ୍ୟ ଚାରିସ୍ତରୀୟ ଯାଞ୍ଚ ବ୍ୟବସ୍ଥା ଓ ଫାଇନାଲ୍ ଲକଡ୍ PDF ମେକାନିଜମ୍ । ଅର୍ଥାତ ବହି ଛପାରୁ ପ୍ରିଣ୍ଟ ପର୍ଯ୍ୟନ୍ତ ୪ ସ୍ତରରେ ଯାଞ୍ଚ ବ୍ୟବସ୍ଥା କରାଯିବ ।

ବହି ଛପାରୁ ପ୍ରିଣ୍ଟ ପର୍ଯ୍ୟନ୍ତ ଚାରି ଥାକିଆ ବ୍ୟବସ୍ଥା
୧- ଭାଷା, ଚିତ୍ର, ତଥ୍ୟ ଓ ମୁଦ୍ରଣଜନିତ ଚୂଡ଼ାନ୍ତ ଏକାଡେମିକ ଅନୁମୋଦନ ବିନା କୌଣସି ପାଠ୍ୟପୁସ୍ତକ ପ୍ରିଣ୍ଟିଙ୍ଗ ପ୍ରେସକୁ ଯାଇପାରିବ ନାହିଁ
୨- ପ୍ରତିଟି ନୂଆ ବହିର ପାଇଲଟ୍ ଟେଷ୍ଟିଂ ଅର୍ଥାତ ବଣ୍ଟାଯିବା ପୂର୍ବରୁ କିଛି କପି ଶିକ୍ଷକମାନଙ୍କୁ ଦିଆଯିବ
୩- ଫାଇନାଲ୍ ଲକଡ୍ PDF ମେକାନିଜମରେ ଚୂଡାନ୍ତ PDFକୁ ଲକ କରାଯିବ ଏବଂ ଅଧିକୃତ ଅଧିକାରୀଙ୍କ ବିନା ଆଉ କେହି ତାକୁ ଆସେସ କରିପାରିବେ ନାହିଁ
୪- ଭୁଲ ଆଉ ତାର ସଂଶୋଧନ ପାଇଁ ପବ୍ଲିକ ଏରଟା ପୋର୍ଟାଲ କରିବେ ସରକାର, ଯେଉଁଥିରେ ସଂଶୋଧିତ ହୋଇଥିବା ବିଷୟଗୁଡିକୁ ଦର୍ଶାଯିବ ଏଭଳି ପଦକ୍ଷେପକୁ ସ୍ଵାଗତ କରିଛନ୍ତି ଶିକ୍ଷାବିତ ।

ଅନ୍ୟପଟେ ନିଲମ୍ବିତ SCERTର ପୂର୍ବତନ ନିର୍ଦ୍ଦେଶକ ମନୋଜ ପାଢ଼ୀଙ୍କ ପାଇଁ ବଢୁଛି ଅଡୁଆ । ସାମ୍ନାକୁ ଆସିଛି ୨୦୨୪ରେ ବିଧାୟକ ମାନେ ମୁଖ୍ୟମନ୍ତ୍ରୀଙ୍କୁ ଲେଖିଥିବା ଚିଠି। ଯେଉଁଥିରେ ରହିଛି ୧୦ରୁ ଅଧିକ ବିଧାୟକମାନଙ୍କ ଦସ୍ତଖତ । ଚିଠିରେ ମନୋଜ ପାଢୀଙ୍କ ଦୁର୍ନୀତି ଏବଂ ସରକାରୀ ଅଧିକାରୀ ଏବଂ କର୍ମଚାରୀଙ୍କ ପ୍ରତି ଧମକପୂର୍ଣ୍ଣ ଏବଂ ସ୍ୱେଚ୍ଛାଚାରୀ ଆଚରଣ କଥା ଉଲ୍ଲେଖ କରିଥିଲେ ବିଧାୟକ ମାନେ ।

ଅଭିଯୋଗ କରିଥିଲେ ନିର୍ଦ୍ଦେଶକ ଥିବା ବେଳେ ମନୋଜ ପାଢୀ ନିଜ କାର୍ଯ୍ୟାଳୟର ଅଦିକାରୀ ଏବଂ କର୍ମଚାରୀମାନଙ୍କୁ ଗାଳିଗୁଲଜ କରୁଛନ୍ତି । ଏହା ସହ SCERT ନିର୍ଦ୍ଦେଶକ ଭାବେ ଦୁଇ ବର୍ଷର ସେବା କାଳରେ, କୌଣସି ଗୁରୁତ୍ୱପୂର୍ଣ୍ଣ କାର୍ଯ୍ୟ ହୋଇନାହିଁ । ଏହା ମଧ୍ୟ ଲେଖାଯାଇଛି ଯେ ପୂର୍ବରୁ, ମୟୁରଭଞ୍ଜ ସାଂସଦଙ୍କ ଚିଠି ପରେ SCERTରେ ତାଙ୍କର ଅତିରିକ୍ତ ଦାୟିତ୍ୱ ପ୍ରତ୍ୟାହାର କରାଯାଇଥିଲା । କିନ୍ତୁ, ଉଚ୍ଚସ୍ତରୀୟ ହସ୍ତକ୍ଷେପ ଯୋଗୁଁ ତାଙ୍କୁ କିଛି ସମୟ ପରେ ସେହି ପଦବୀରେ ପୁନଃସ୍ଥାପିତ କରାଯାଇଛି ।

ଅନ୍ୟପଟେ ମନୋଜ ପାଢୀଙ୍କ ସହ ୩ ସହକାରୀ ନିର୍ଦ୍ଦେଶକଙ୍କୁ ନିଲମ୍ବନ ଏବଂ ୬ ସହକାରୀ ନିର୍ଦ୍ଦେଶକଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ମଧ୍ୟ କରାଯାଇଛି। କିନ୍ତୁ ମୁଖ୍ୟମନ୍ତ୍ରୀ ଷଡଯନ୍ତ୍ରର ଗନ୍ଧ ବାରିଥିବାରୁ ଏହି ଅଧିକାରୀଙ୍କ ବିରୋଧରେ ଅପରାଧିକ ମାମଲା ହେବ କି ନାହିଁ, ତାକୁ ନେଇ ବି ପ୍ରଶ୍ନ ଉଠିଲାଣି।