ଗଞ୍ଜାମ ଜିଲ୍ଲାରେ ୧୨ ଶିଳ୍ପ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କଲେ ମୁଖ୍ୟମନ୍ତ୍ରୀ । କହିଲେ, ଜିଲ୍ଲାରେ ନିବେଶ ହୋଇଛି ୨୮,୦୮୪ କୋଟି ଟଙ୍କାର ପୁଞ୍ଜି । ସୃଷ୍ଟି ହେବ ୧୫,୪୫୫ରୁ ଅଧିକ ନିଯୁକ୍ତି ସୁଯୋଗ । ଗଞ୍ଜାମ ଯୁବକ ଆଉ ଯିବେ ନାହିଁ ଦାଦନ ଖଟିବାକୁ । ବିକାଶ ପାଇଁ ଆଗାମୀ ଦିନରେ ଏକ ଲକ୍ଷ କୋଟି ଟଙ୍କାର ଅନୁଦାନ ମିଳିବ । ଲୋକଙ୍କୁ ଭକୁଆ ବନାଇଥିଲେ ପୂର୍ବତନ ମୁଖ୍ୟମନ୍ତ୍ରୀ ।

ଦିନିକିଆ ଗଞ୍ଜାମ ଗସ୍ତରେ ମୁଖ୍ୟମନ୍ତ୍ରୀ ମୋହନ ମାଝି । ଛତ୍ରପୁର ଖେଳ ପଡ଼ିଆ ଠାରେ ଆୟୋଜିତ ସଭାରେ ମୁଖ୍ୟମନ୍ତ୍ରୀ ଗଞ୍ଜାମବାସୀଙ୍କ ଶିଳ୍ପ ସ୍ବପ୍ନ କିପରି ସାକାର ହେବାକୁ ଯାଉଛି ସେନେଇ ଦିଗଦର୍ଶନ ଦେଇଛନ୍ତି । ଗଞ୍ଜାମ ଜିଲାରେ ସ୍ଥାପିତ ହେବାକୁ ଥିବା ୧୨ଟି ଶିଳ୍ପ ପ୍ରକଳ୍ପ ଗୁଡିକର ଭିତ୍ତି ପ୍ରସ୍ତର ସ୍ଥାପନ କରିଛନ୍ତି । ଗ୍ରୀନ ହାଇଡ୍ରୋଜେନ, ଗ୍ରୀନ ଆମୋନିଆ, ଏଲ.ଏନ୍‌ ଜି ଟରିମୋନିଆଲ, ସ୍ପେସିଆଲଟି କେମିକାଲସ, ଗ୍ରୀନ ଏନର୍ଜି ଇକ୍ୟୁମମେଣ୍ଟ, ମଲ୍ଟି ମୋଡେଲ ଲଜେସ୍ଟିକ ପାର୍କ, ଏଗ୍ରୋ ପ୍ରସେସିଂ ଭଳି ଶିଳ୍ପ କାରଖାନା ପ୍ରତିଷ୍ଠା ହେବ । ଏହି ଅବସରରେ ମୋହନ କହିଛନ୍ତି, ଓଡିଶା ଶିଳ୍ପ ମାନଚିତ୍ରରେ ଗଞ୍ଜାମ ଜିଲ୍ଲାରେ ୨୮,୦୮୪ କୋଟି ଟଙ୍କାର ପୁଞ୍ଜି ନିବେଶ ହୋଇଛି। ଏହା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ଏହି ପୁଞ୍ଜିନିବେଶ ଦ୍ବାରା ୧୫,୪୫୫ରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ ।

ମୁଖ୍ୟମନ୍ତ୍ରୀ କହିଛନ୍ତି, ଆଜି ଗଞ୍ଜାମ ଜିଲ୍ଲା ପାଇଁ ଐତିହାସିକ ଦିନ। ବିକାଶ ପାଇଁ ନୂଆ ରାସ୍ତା ଫିଟିଛି । ଅର୍ଥନୈତିକ ଦୃଷ୍ଟି କୋଣରୁ ଜିଲ୍ଲା ଅଗ୍ରଣୀ ଭୂମିକା ଗ୍ରହଣ କରୁଛି । ୨୪ ବର୍ଷର ସରକାର ଏ ଅଂଚଳର ବିକାଶ ଦିଗରେ ଗୁରୁତ୍ୱ ଦେଇଥିଲେ ରୋଜଗାର ଦୁଇ ଗୁଣା ହୋଇଥାନ୍ତା । ପୂର୍ବତନ ମୁଖ୍ୟମନ୍ତ୍ରୀ ଲୋକଙ୍କୁ ଭକୁଆ ବନାଇଥିଲେ । ବାପାଙ୍କ ଅଧୁରା ସ୍ବପ୍ନକୁ ବି ପୂରଣ କରି ପାରିଲେ ନାହିଁ । ଶିଳ୍ପ ଭିତ୍ତି ପ୍ରସ୍ତର ହେଲା । ଗଞ୍ଜାମ ଯୁବକ ଆଉ ଦାଦନ ଖଟିବାକୁ ଯିବେ ନାହିଁ । ବିକାଶ ପାଇଁ ଆଗାମୀ ଦିନରେ ଏକ ଲକ୍ଷ କୋଟି ଟଙ୍କାର ଅନୁଦାନ ମିଳିବ । ନୂଆ ସରକାର ଗଠନ ପରେ ବହୁ ବିକାଶ ହୋଇଛି । ୨୪ ବର୍ଷର ସରକାରକୁ ୧୨ ମାସର ସରକାର ସହ ତୁଳନା କରୁଛନ୍ତି ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ପୁରୀ, ମୟୂରଭଞ୍ଜ, ଭଦ୍ରକ, ଦେବଗଡ଼, କଳାହାଣ୍ଡି, ଢେଙ୍କାନାଳବାସୀଙ୍କ ଦାବିକୁ ସମ୍ମାନ ଜଣାଇ କୋଟି କୋଟି ଟଙ୍କା ପ୍ରକଳ୍ପର ଶିଳାନ୍ୟାସ କରିସାରିଛନ୍ତି ମୁଖ୍ୟମନ୍ତ୍ରୀ । ଆଗକୁ ଜୁନ ୧୩ ରେ ବ୍ରହ୍ମପୁର ନାରୀ ଶକ୍ତି ସମ୍ମିଳନୀ, ୧୮ରେ ଢେଙ୍କାନାଳରେ ଯୁବ ଶକ୍ତି ସମାବେଶ, ୧୯ରେ ମୟୂରଭଞ୍ଜରେ ଆଦିବାସୀ ଶକ୍ତି ସମ୍ମିଳନୀ ଓ ୨୦ରେ ବରଗଡ଼ରେ ରାଜ୍ୟସ୍ତରୀୟ କୃଷକ ଶକ୍ତି ସମାବେଶ ଆୟୋଜିତ ହେବାର କାର୍ଯ୍ୟକ୍ରମ ରହିଛି ।