ରାୟଗଡ଼ାରେ ସମବାୟ ବିଭାଗ ପକ୍ଷରୁ ପଞ୍ଜୀକରଣକୁ ନେଇ ହୋଇଥିବା ସାଟେଲାଇଟ ସର୍ଭେରେ ଜିଲ୍ଲାର ୧୧ ବ୍ଲକ୍‌ରୁ ମୋଟ ୧୩ ହଜାର ୬୦୦ଟି ପ୍ଲଟ୍‌ରେ ଧାନଚାଷ ହୋଇ ନ ଥିବା ଜଣାପଡ଼ିଛି। ଏସବୁ ପ୍ଲଟ୍‌ରେ ପୋଖରୀ, ବଗିଚା, କପାଚାଷ, ଗୋଚର ଜମି, ରାସ୍ତା ଓ ଫାର୍ମ ହାଉସ, ପାମ୍ ବଗିଚା ଆଦି ରହିଥ‌ିବା ସର୍ଭେରେ ଉଠିଥ‌ିବା ଫଟୋରୁ ଧରାପଡ଼ିଛି। ଭାଗଚାଷୀଙ୍କ ଧାନ ବିକ୍ରି କରି ମୁନାଫା କମାଇବା ପାଇଁ କିଛି ଦଲାଲ ଏହି ବେଆଇନ ପଞ୍ଜୀକରଣ କରିଥିବା ଜଣାପଡ଼ିଛି । କେବଳ ଧାନ ନୁହଁ, ମାଣ୍ଡିଆ ଓ କପା ବିକ୍ରି କ୍ଷେତ୍ରରେ ମଧ୍ୟ କେତେଜଣ ଦଲାଲ ଜାଲିଆତିର ସମାନ ବାଟ ଅବଲମ୍ବନ କରିଛନ୍ତି।

ଜିଲ୍ଲାରେ ମୋଟ ୨୧,୫୦୬ ଚାଷୀ ଚାଷଜମି ଦେଖାଇ ପଞ୍ଜିକୃତ କରାଇଥିଲେ। ଫିଲଡ଼ ଭେରିଫିକେଶନରେ ୨,୫୧୭ ଚାଷୀ ଚିହ୍ନଟ ହୋଇଥିଲେ। ପରେ ସାଟେଲାଇଟ ଭେରିଫିକେଶନରେ ୧୫,୬୮୫ଟି ସନ୍ଦେହ ଜନକ ପ୍ଲଟ ଚିନ୍ହଟ ହେଇଥିଲା। ଏହାସହ ୯,୦୮୭ ଅଣ ଧାନ ଚାଷୀ ବା ଭୁତ ଚାଷୀ ବାଦ ପଡ଼ିଛନ୍ତି। ବିଶେଷ କରି କେସିଙ୍ଗିପୁର ରେ ୩,୬୭୨ଟି ପ୍ଲଟ , ରାମନାଗୁଡ଼ାରୁ ୩,୩୪୭ଟି ପ୍ଲଟ ଏବଂ ଗୁଣୁପୁରୁରେ ୨,୧୧୫ ପ୍ଲଟରେ ବିନା ଚାଷରେ ଚାଷ ହୋଇଥିବା ଦର୍ଶାଇ ରେଜିଷ୍ଟେସନ ହୋଇଥିଲା। 

ପଞ୍ଜୀକରଣ ପାଇଁ କୌଣସି ନିୟମ ଓ କଟକଣା ନଥିବାରୁ ଏଭଳି ବେଆଇନ ପଞ୍ଜୀକରଣ ହେଉଥିବା ଚାଷୀ ପ୍ରକାଶ କରିଛନ୍ତି। ପଞ୍ଜୀକରଣ ହୋଇଥିବା ନକଲି ଚାଷୀଙ୍କ ବିରୋଧରେ ସେଭଳି କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ହେଉ ନଥିବାରୁ ଏଭଳି ବେଆଇନ କାର୍ଯ୍ୟକଳାପ ପ୍ରତିବର୍ଷ ବଢ଼ୁଛି । ଫଳରେ ପ୍ରକୃତ ଚାଷୀ ହଇରାଣ ହେଉଛନ୍ତି।