ଆଦିବାସୀ ଅଧ୍ୟୁଷିତ ବଣପାହଡ ଘେରା କେନ୍ଦୁଝର ଜିଲ୍ଲା । ପ୍ରକୃତି ଅନେକ କିଛି ସମ୍ଭାର ଏହି ଅଞ୍ଚଳରେ ଭରି ଦେଇଛି । ସେଥିମଧ୍ୟରୁ ସ୍ବାସ୍ଥ୍ୟ ପାଇଁ ଉପକାରୀ ଗିଲିରି ଫୁଲ ଏବେ ସମସ୍ତଙ୍କର ଆଦରର ଖାଦ୍ୟ ପାଲଟିଛି । କେବଳ ଯେ ଲୋକେ ଏହାକୁ ଖାଇବାକୁ ପସନ୍ଦ କରୁଛନ୍ତି , ତାହା ନୁହେଁ ଆଦିବାସୀଙ୍କ ରୋଜଗାରର ମାଧ୍ୟମ ପାଲଟିଛି । ଜଙ୍ଗଲରୁ ଏହି ଫୁଲ ସଂଗ୍ରହ କରି ଆଖପାଖ ବଜାରରେ ବିକ୍ରି କରି ବେଶ ରୋଜଗାର କରିଥାନ୍ତି ସ୍ଥାନୀୟ ଆଦିବାସୀ । ବାହାରୁ ଆସିଥିବା ପର୍ଯ୍ୟଟକ ମଧ୍ୟ ଫେବୃଆରୀ ଏବଂ ମାର୍ଚ୍ଚ ମାସରେ ଏହି ଫୁଲକୁ କ୍ରୟ କରିଥାନ୍ତି । ଗିଲିରି ଫୁଲର ଚାହିଦା ଦିନକୁ ଦିନ ବଢିବାରେ ଲାଗିଛି । କେତେକ ବେପାରୀ ଆଦିବାସୀମାନଙ୍କ ଠାରୁ କମ ଦରରେ କ୍ରୟ କରି ବାହାର ଜିଲାରେ ଏହାକୁ ଅଧ‌ିକ ଦରରେ ବିକ୍ରି କରିଥାନ୍ତି । କେନ୍ଦୁଝର ସହରରେ ଗୋଟିଏ ଚଉତିର ଦର ରହିଛି ୨୦ଟଙ୍କା ।

ବସନ୍ତ ଋତୁରେ ଫୁଟୁଥିବା ଏହି ଫୁଲର ଲାଟିନ୍ ନାମ ଇଣ୍ଡିଗୋଫେରା କାଶିଓଡେସ୍ । ଏହା ଲତାଜାତୀୟ ଗଛରେ ଫୁଟି ଥାଏ ଦିନ ଥିଲା ଏହି ଫୁଲ ବା ଶାଗକୁ ଗରିବ ଲୋକର ପଖାଳ ବେଲାର ସାଥୀ ବୋଲି କୁହାଯାଉଥିଲା । ଏବେ ଆଉ ସେ ସଂଜ୍ଞା ନାହିଁ । ଏହାକୁ କେବଳ ଶାଗ ଭାବି ଲୋକେ ବ୍ୟବହାର କରୁ ନାହାନ୍ତି । ଔଷଧୀୟ ଗୁଣ ପାଇଁ ସମସ୍ତ ଏହି ଶାଗର ଚାହିଦା ବୃଦ୍ଧି ପାଇଛି । ଏଥିରେ ପ୍ରଚୁର ପରିମାଣର ଭିଟାମିନ ସହିତ ଧାତୁସାର ରହିଛି । କୋଷ୍ଠକାଠିନ୍ୟ ଦୂର ହେବା ସହ ଶ୍ବାସ , ଥଣ୍ଡା , କାଶ , ଆଣ୍ଟି ଏଲର୍ଜି ଭଲି ଯାବତୀୟ ରୋଗରୁ ଉପଶମ ଦେଇଥାଏ ଗିଲିରି ଫୁଲ ।

ଜିଲ୍ଲାର ବିଭିନ୍ନ ସ୍ଥାନରେ ଗିଲିରି ଫୁଲ ମିଳୁଥିଲେ ମଧ୍ୟ ବାଂଶପାଳ ବ୍ଲକ ଅଚଂଳର ଝରଣା କୂଳ ଏବଂ ପାହାଡର ଓଦାଳିଆ ସ୍ଥାନରେ ଗିଲିରି ଲତା ଅଧିକା ଦେଖିବାକୁ ମିଳିଥାଏ । ଜଳବାୟୁ ପରିବର୍ତ୍ତନ ଯୋଗୁଁ ଗିଲିରି ଲତା ଧ୍ବଂସ ମୁଖରେ । ବ୍ୟାପକ ଜଙ୍ଗଲ ଧ୍ବଂସ, ଖଣି କାର୍ଯ୍ୟ ପାଇଁ ଜଙ୍ଗଲ ଜମି ଅଣ ଜଙ୍ଗଲ କାର୍ଯ୍ୟରେ ବ୍ୟବହାର ହେଉଥିବାରୁ ଏହି ଗଛ କ୍ରମଶଃ କମିବାରେ ଲାଗିଛି । ଆଦିବାସୀଙ୍କ ଜୀବନଜୀବିକା ଏବଂ ପରିବେଶର ସୁରକ୍ଷା ପାଇଁ ଏହି ଗିଳିରି ଲତା ସୁରକ୍ଷା ଜରୁରୀ ।