କଥାରେ ଅଛି ରଖେ ହରି ତ ମାରେ କିଏ ? ନିଖୋଜର ୫ ଦିନ ପରେ ମୁମୂର୍ଷୁ ଅବସ୍ଥାରେ ଜଣେ ଶିଶୁକୁ ଉଦ୍ଧାର କରାଯାଇଛି । ଶିଶୁର ବୟସ ହେଉଛି ମାତ୍ର ତିନି ବର୍ଷ । ରୁଗୁଡି ଥାନା ଦଲକୋ ସାହିର ସୁବାସ ମୁଣ୍ଡାଙ୍କ ପୁଅ ଗତ ୨୧ ତାରିଖରେ ଘର ବାହାରେ ଖେଳୁଥିବା ବେଳେ ନିଖୋଜ ହୋଇଯାଇଥିଲେ । ପରିବାର ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ କୌଣସି ପତ୍ତା ମିଳି ନଥିଲା ।

ପରେ ରୁଗୁଡି ଥାନାରେ ଲିଖିତ ଅଭିଯୋଗ କରିଥିଲେ । ଆଜି ରେଙ୍ଗାଳବେଡ଼ା ଜଙ୍ଗଲକୁ କିଛି ଲୋକ ଜଙ୍ଗଲ ଜାତ ଦ୍ରବ୍ୟ ଆଣିବାକୁ ଯାଇଥିବା ବେଳେ ନାଳ ନିକଟରେ ଶିଶୁଟି ଚେତାଶୂନ୍ୟ ଅବସ୍ଥାରେ ପଡ଼ିଥିଲା । ଶିଶୁଟିକୁ ଉଦ୍ଧାର କରି ସେମାନେ ପରିବାର ଓ ପୋଲିସକୁ ଜଣାଇଥିଲେ । ଉଦ୍ଧାର ଶିଶୁର କେତେକ ସ୍ଥାନରେ ଆମ୍ପୁଡା ଦାଗ ରହିଛି । ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଶିଶୁର ସ୍ବାସ୍ଥ୍ୟାବସ୍ଥା ସ୍ଥିର ରହିଛି । କିନ୍ତୁ କେଉଁ ପରିସ୍ଥିତିରେ ଶିଶୁଟି ନିଖୋଜ ହୋଇଗଲା ସେନେଇ ପୋଲିସ ଛାନଭିନ୍ କରୁଛି ।