ପବିତ୍ର ବିଜୟା ଦଶମୀରେ ସୁବର୍ଣ୍ଣ ବେଶରେ ଦର୍ଶନ ଦେଉଛନ୍ତି ଚତୁର୍ଦ୍ଧାମୂର୍ତ୍ତି । ଶ୍ରୀମନ୍ଦିର ସମ୍ପନ୍ନ ହୋଇଛି ଆୟୁଧ ପୂଜା ନୀତି। ଶ୍ରୀଭୂଜ ଶ୍ରୀପୟର ଲାଗି ଶଙ୍ଖ ଚକ୍ର ଧାରଣ କରିଛନ୍ତି କଳା ଠାକୁର ,ବଡ ଭାଇଙ୍କ ହାତରେ ହଳ ମୁଷଳ । ଦେବୀ ସୁଭଦ୍ରା ଧାରଣ କରିଛନ୍ତି ତଡ଼ାଗି । ଦଶହରାରେ ଦୁର୍ଲଭ ସୁନାବେଶ ଦର୍ଶନ ପାଇ ବେଶ ଭବବିହ୍ଵଳ ଶ୍ରଦ୍ଧାଳୁ ।

ପବିତ୍ର ବିଜୟାଦଶମୀ ଅର୍ଥାତ ଦଶହରା ପର୍ବ । ପୀଠରୁ ମଣ୍ଡପ ସବୁଠି ଚାଲିଛି ମା ଙ୍କ ଆରାଧନା । ତେବେ ଆଜି ପବିତ୍ର ବିଜୟା ଦଶମୀ ବା ଦଶହରାରେ ଶ୍ରୀମନ୍ଦିରରେ ହୋଇଛି ସ୍ଵତନ୍ତ୍ର ନୀତି । ଶ୍ରୀମନ୍ଦିରରେ ମହାପ୍ରଭୁଙ୍କ ରାଜ୍ ରାଜେଶ୍ୱରୀ ବେଶ ଦର୍ଶନ କରି ଭାବବିହ୍ୱଳ ହୋଇଛନ୍ତି ଶ୍ରଦ୍ଧାଳୁ । କିରିଟି,ଚୂଳ,ଚନ୍ଦ୍ରିକା,ଆଡକାନି,ଚନ୍ଦ୍ରସୂର୍ଯ୍ଯ, ଶ୍ରୀଭୁଜ, ଶ୍ରୀପୟର, ଘାଗଡା ମାଳି ଆଦି ସ୍ୱର୍ଣ୍ଣାଳଙ୍କାରରେ ବିଭୁଷିତ ହୋଇଛନ୍ତି ଜଗତ ଠାକୁର । ସକାଳ ଧୂପ ପରେ ଆୟୁଧମାନଙ୍କର ମାଜଣା ପୁଜା ସରିବା ପରେ ମହାପ୍ରଭୁ ଆୟୁଧ ଧାରଣ କରିଛନ୍ତି । ଶ୍ରୀମନ୍ଦିରରେ ଅବକାଶ ନୀତି ପରେ ଶ୍ରୀଜୀଉଙ୍କର ସୁନାବେଶ ଅନୁଷ୍ଠିତ ହୋଇଛି । ମହାପ୍ରଭୁଙ୍କର ଏହି ସୁନାବେଶ ଦର୍ଶନ କଲେ କୋଟି ଜନ୍ମର ପୁଣ୍ଯ ମିଳିଥାଏ ବୋଲି ବିଶ୍ୱାସ ରହିଛି ।

ସକାଳ 5 ଟା 50 ରୁ ହୋଇଥିଲା ଦ୍ଵାର ଫିଟା । 6 ଟା 30 ରେ ମଙ୍ଗଳ ଆଳତି ହେବାପରେ 7 ଟା 40 ସୁଦ୍ଧା ସରିଥିଲା ଅବକାଶ ନୀତି । ଆଉ ତାପରେ ଅନୁଷ୍ଠିତ ହୋଇଥିଲା ସୁନାବେଶ ପାଇଁ ପ୍ରକ୍ରିୟା । ପରମ୍ପରା ଓ ବିଶ୍ୱାସ ଅନୁଯାୟୀ ମତ ରହିଛି ଯେ ମହାପ୍ରଭୁ ମହିଷ ମର୍ଦ୍ଦୀନିଙ୍କୁ ନିଜ ଆୟୁଧ ଦେଇଥିଲେ ଶତ୍ରୁ ବିନାସନ ପାଇଁ । ସେଥିପାଇଁ ମହାସପ୍ତମୀ ଠାରୁ ଭଣ୍ଡାର ଘରେ ପୂଜା ପାଇଥାନ୍ତି ଆୟୁଧ । ଦଶମୀ ଦିନ ପୁଣି ଅସ୍ତ୍ର ଲେଉଟାଇ ଥାନ୍ତି ମାଆ । ତେଣୁ ପୁଣି ଆୟୁଧ ଧାରଣ କରନ୍ତି ବିଶ୍ଵନିଅନ୍ତା । ପୀଙ୍ଗଣ ରେ ଆୟୁଧ ରଖାଯାଇ ଭିତର ପରିକ୍ରମା ହୁଏ । ପରେ ତାହା ଧାରଣ କରିଥାନ୍ତି ଚତୁର୍ଦ୍ଧା ମୂର୍ତ୍ତି । ତେଣୁ ଦିବ୍ୟ ଦୁର୍ଲଭ ଦର୍ଶନ ପାଇ ଭାବ ବିହ୍ବଳ ହୋଇଥାନ୍ତି ଭକ୍ତ ।

ସେପଟେ ପରମ୍ପରା ମୁତାବକ କାକୁଡିଖାଇଙ୍କୁ ଆଜି ବିସର୍ଜନ କରାଯିବ । ଆସନ୍ତାକାଲି ଏକାଦଶୀ ତିଥିରେ ହେବ ଗୋଷାଣି ଯାତ୍ରା । ଅନ୍ୟପଟରେ ଆସନ୍ତାକାଲି ଠାରୁ ମଧ୍ୟ ଶ୍ରୀମନ୍ଦିରରେ ଆରମ୍ଭ ହେବ କାର୍ତ୍ତୀକ ନିତୀ । ହାବିଶ୍ୟାଳିଙ୍କ ଆଗମନରେ ଶ୍ରୀକ୍ଷେତ୍ରରେ ଲାଗିବ ଗହଳି ଚହଳି ।