ରାଜ୍ୟରେ ରୋଗୀସେବା ଯେମିତି ବ୍ୟାହତ ନ ହୁଏ ସେଥିପାଇଁ ନାଲିଆଖି ଦେଖାଇଛନ୍ତି ସରକାର । ସାରାରାଜ୍ୟରେ ଡାକ୍ତରଙ୍କ ୨ ଘଣ୍ଟିଆ OPD ବନ୍ଦ ଆନ୍ଦୋଳନ ବିରୋଧରେ ଲଗାଇଛନ୍ତି ESMA । ତଥାପି ଏହାକୁ ଖାତିର କରିନାହିଁ ଡାକ୍ତରୀ ସଂଘ OMSA । ପୂର୍ବଭଳି ସକାଳ ୯ ରୁ ୧୧ OPDରେ ରୋଗୀ ଦେଖୁ ନାହାନ୍ତି ଡାକ୍ତର । ଫଳରେ ପ୍ରବଳ ହଇରାଣ ହେଉଛନ୍ତି ଦୂରଦୂରାନ୍ତରୁ ଆସୁଥିବା ରୋଗୀ । ଗୁରୁତର ରୋଗୀ OPD ବାହାରେ ଘଣ୍ଟା ଘଣ୍ଟା ଧରି ଛିଡ଼ାହୋଇ ସେବା ପାଉନଥିବାର ବିକଳ ଚିତ୍ରସବୁ ସାମ୍ନାକୁ ଆସିଛି ।

ଆନ୍ଦୋଳନରେ ଡାକ୍ତର/OPD ବାହାରେ ରୋଗୀ । ଏପଟେ ESMA ଲାଗୁ ସତ୍ବେ, ସରକାରଙ୍କ କଟକଣାକୁ ଖାତିର ନକରି ଆନ୍ଦୋଳନ ଜାରି ରଖିଛନ୍ତି ଡାକ୍ତର । ସେପଟେ ସକାଳ ୯ରୁ ୧୧ ଦୁଇଘଣ୍ଟା ଧରି OPD ବାହାରେ ଅପେକ୍ଷା କରିଛନ୍ତି ରୋଗୀ। ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସକାଳ ୮ଟାରୁ ଆସିଥିବା ଶାନ୍ତି ଜେନା, ରୋଗୀ ସେବା ନପାଇ ଅସନ୍ତୋଷ ପ୍ରକାଶ କରିଛନ୍ତି ।

ଆଉଜଣେ ରୋଗୀଙ୍କ ସଂପର୍କୀୟ ପୃଥ୍ବୀରାଜ ମହାରଣା ବି ସେଇ ସମାନ ଅଭିଯୋଗ କରିଛନ୍ତି । ସାଙ୍ଗରେ ସେ ମଧୁମେହ ରୋଗୀଙ୍କୁ ନେଇ ଆସିଥିବାବେଳେ, ଡାକ୍ତରଙ୍କ ଦୁଇ ଘଣ୍ଟିଆ ଆନ୍ଦୋଳନ ଯୋଗୁଁ ସମସ୍ୟାରେ ପଡ଼ିଛନ୍ତି ।

ସେହିଭଳି ବଲାଙ୍ଗୀର ଜିଲ୍ଲା ମୁଖ୍ୟ ଚିକିତ୍ସାଳୟର ବହିର୍ବିଭାଗରେ ଡାକ୍ତରଙ୍କ ଚେୟାର ଖାଲି ପଡ଼ିଛି । ବାହାରେ ରୋଗୀ ଲମ୍ବା ଧାଡ଼ି କରି ଅପେକ୍ଷା କରିଛନ୍ତି । ରୁଦ୍ର ରାଉତ ନାମକ ରୋଗୀଙ୍କ ପଞ୍ଜରାରେ ୟନ୍ତ୍ରଣା ହେଉଛି । OPD ଟିକେଟ କରି ପ୍ରବଳ କଷ୍ଟ ଭିତରେ ୨ ଘଣ୍ଟାରୁ ଅଧିକ ସମୟ ଅପେକ୍ଷା କଲେଣି । କିନ୍ତୁ କେହି ନାହିଁ ସେଠି ତାଙ୍କ ଦୁଃଖ ଶୁଣିବାକୁ ।

ବଲାଙ୍ଗୀର... ଭଦ୍ରକ... ବାଲେଶ୍ବର... ଆଠଗଡ଼... ରାଜ୍ୟର ବିଭିନ୍ନ ସ୍ଥାନରୁ ଆସିଛି ଏଭଳି ରୋଗୀ ହଇରାଣ ହେବାର ଖବର । ଡାକ୍ତରୀ ସଂଘର OPD ବନ୍ଦ ଆନ୍ଦୋଳନ ଫଳରେ ଘଣ୍ଟାଘଣ୍ଟା ଧରି ବାହାରେ ଅପେକ୍ଷା କରି ରହୁଛନ୍ତି ଗୁରୁତର ରୋଗୀ । ସେବା ଅବ୍ୟାହତ ରଖିବାକୁ ESMA ଲଗାଇ ଡାକ୍ତରଙ୍କୁ ନାଲିଆଖି ଦେଖାଇଛନ୍ତି ସରକାର। ହେଲେ ଡାକ୍ତରୀ ସଂଘ ଏହାକୁ ଖାତିର କରିନାହିଁ । ସରକାରଙ୍କ ନିଷ୍ପତ୍ତିକୁ ଦୁର୍ଭାଗ୍ୟଜନକ କହିବା ସହ ୧୦ ଦଫା ଦାବି ପୂରଣ ନ ହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଓମସାର ସାଧାରଣ ସଂପାଦକ ଡକ୍ଟର ସଂଜୀବ ପ୍ରଧାନ କହିଛନ୍ତି । ନିୟମ ଅନୁସାରେ ଚିକିତ୍ସା ଭଳି ଜରୁରିକାଳୀନ ସେବା ପ୍ରଭାବିତ ହେଉଥିବାରୁ ESMA ଲାଗୁ କରିପାରିଛନ୍ତି ରାଜ୍ୟ ସରକାର ।