ଅର୍ଗସ ବ୍ୟୁରୋ: ଏଇ ଗାଁକୁ ରାସ୍ତା ନାହିଁ । ପିଇବା ପାଣି ଆସିନି । ବିଦ୍ୟୁତ ସଂଯୋଗ କଥା ବି ନକହିବା ଭଲ । କେତେବେଳେ ରହୁଛି କେତେବେଳେ ଯାଉଛି କେହି କହିପାରିବେ ନାହିଁ । ଆଉ ବାକି ରହିଲା ସରକାରୀ ଯୋଜନା କଥା । ସରକାରୀ ଯୋଜନା ତ ଏହି ଗାଁ ଲୋକଙ୍କ ପାଇଁ ସତେ ଯେମିତି ସାତ ସପନ । ସ୍ବାଧିନତାର ୭୫ ବର୍ଷ ପରେ ବି ଆଜି ଏଇ ଗାଁ ଲୋକ ମୌଳିକ ସୁବିଧାରୁ ବଞ୍ଚିତ । ପୂର୍ବ ସରକାର ଗରିବ ଆଦିବାସୀଙ୍କ ପାଇଁ ଅନେକ ଯୋଜନା କରିଥିଲେ ଏମାନଙ୍କ ପାଖରେ କିଛି ପହଞ୍ଚିପାରି ନାହିଁ ।

ଅଜ୍ଞା ହଁ... ଆମେ କହୁଛୁ ମାଲକାନଗିରି କାଲିମେଳା ବ୍ଲକ ଭେଜିଙ୍ଗିୱାଡ଼ା ପଞ୍ଚାୟତର ବଦଲିଗୁଡା ଗାଁ । ଏଠାରେ ବସବାସ କରନ୍ତି ୯୦ ଆଦିବାସୀ ପରିବାର । ଜନସଂଖ୍ୟା ୬୦୦ରୁ ଅଧିକ ହୋଇଥିବା ବେଳେ ଆଜି ବି ମୌଳିକ ସୁବିଧାରୁ ବଞ୍ଚିତ ଗାଁ ଲୋକେ । ଗାଁ କହିଲେ ମାଳ ମାଳ କଚ୍ଚା ଘର କେବଳ। ଯେଉଁଥିରେ ରୁହନ୍ତି ଗରିବ ଆଦିବାସୀ ପରିବାର। ଯେଉଁମାନେ ଆବସ ଯୋଜନାରେ ଘର ପାଇବାରୁ ବଞ୍ଚିତ । ତାସହ ଭତ୍ତା, ରାସନ ଆଦି ଯୋଜନା ବି ୟାଙ୍କ ପାଇଁ ସପନ । ଗାଁର ୨୦ ରୁ ଅଧିକ ବୃଦ୍ଧବୃଦ୍ଧା ଯାହାଙ୍କୁ କେଉଁ କାଳୁ ୬୦ ଡେଇଁସାରିଲାଣି । ହେଲେ ସେମାନେ ଏବେ ବି ସରକାରଙ୍କ ବାର୍ଦ୍ଧକ୍ୟ ଭତ୍ତା କ'ଣ ଜାଣି ନାହାନ୍ତି ।

ଅନ୍ୟପଟେ ଗାଁରେ ପାଣିର ସୁବିଧା ବି ନାହିଁ । ପିଇବା ପାଣି ଏଠି ପିଇବା ଯାହା ଦେହକୁ ରୋଗ କିଣିବା ତାହା । ଏହି ଗାଁରେ ପୂର୍ବ ନବୀନ ସରକାରଙ୍କ ବସୁଧା ଯୋଜନା ସମ୍ପୂର୍ଣ୍ଣ ଫେଲ କହିଲେ ଚଳେ। ପାନୀୟ ଜଳ ଯୋଗାଣ ପାଇଁ ୩ଟି ନଳକୂପ ଅଛି ସତ । କିନ୍ତୁ ସେଥିରୁ ଗୋଟିଏ ଖରାପ ହୋଇ ପଡ଼ିଛି, ଆଉ ଅନ୍ୟ ଦୁଇଟିରୁ ଆଇରନ ଯୁକ୍ତ ଗୋଳିଆ ପାଣି ବାହାରୁଛି । ଯାହାକୁ ସୁସ୍ଥ ମଣିଷ ପିଇଲେ ବି ଅସୁସ୍ଥ ହୋଇପଡ଼ିବ । ଏସବୁ ଜାଣିଥିଲେ ବି, ଅନ୍ୟ କିଛି ଉପାୟ ନଥିବାରୁ ଲୋକେ ଗୋଳିଆ ପାଣି ପିଇବାକୁ ବାଧ୍ୟ ହେଉଛନ୍ତି ।

ଯେଉଁଥିପାଇଁ କୁହାଯାଉଛି ଆଜି ବି ଦୁର୍ଗମବାସୀଙ୍କ ପାଇଁ ଉପହାସ ପାଲଟିଛି ସରକାରୀ ଯୋଜନା। ପାହାଡ଼ିଆ ଗାଁ ବୋଲି ଏଠାରେ ବିକାଶ ଅପହଞ୍ଚ। ଯୋଜନା ଆଶାରେ ବନ୍ଧା ପଡିଛି ଲୋକଂକ ଭାଗ୍ୟ ।