ବାଲେଶ୍ଵର, ଭଦ୍ରକ, କଟକ, କେନ୍ଦ୍ରାପଡା, ମାଲକାନଗିରି, ନୂଆପଡା, ସମ୍ବଲପୁରକୁ ଛାଡ଼ି ଦେଲେ ବାକି ସମସ୍ତ ଜିଲ୍ଲାରେ କମିବାରେ ଲାଗିଛି ଭୂତଳ ଜଳସ୍ତର । ରାଜ୍ୟର ୨୩ ଜିଲ୍ଲାରେ ଏପରି ସ୍ଥିତି । ଗଜପତି ଓ ରାୟଗଡ଼ାରେ ସ୍ଥିତି ସଙ୍ଗିନ । ଭୂତଳ ଜଳସ୍ତର ବୃଦ୍ଧି ପାଇଁ କାର୍ଯ୍ୟକାରୀ କରାଯାଉଛି ଦୁଇଟି ଯୋଜନା । ଛାତ ଏବଂ ଅରୁଆ ଯୋଜନା । ଛାତ ଯୋଜନା ମାଧ୍ୟମରେ ରାଜ୍ୟର ୨୭ଟି ସହରାଞ୍ଚଳ ଏବଂ ୫୨ଟି ବ୍ଲକରେ 29ହଜାର 500ଟି ବେସରକାରୀ କୋଠା ଏବଂ ୧୯୨୫ଟି ସରକାରୀ କୋଠାରେ ବର୍ଷା ଜଳର ସଂରକ୍ଷଣ ଯୋଜନା କରାଯାଇଛି ।

ଅରୁଆ ଯୋଜନାରେ ୨୪୦୦ଟି ରିଚାର୍ଜ ସାଫ୍ଟ ମାଧ୍ୟମରେ ବର୍ଷା ଜଳର ସଂରକ୍ଷଣ ପାଇଁ ପଦକ୍ଷେପ ନିଆଯାଇଛି । ସେହିପରି ବିଭିନ୍ନ ନଦୀମାନଙ୍କରେ ଅନ୍ତଃ ନଦୀ ଜଳାଶୟ ପ୍ରକଳ୍ପ ଓ ବିଭିନ୍ନ ପ୍ରାକୃତିକ ନାଳ ଗୁଡିକରେ ଆଡିବନ୍ଧ ତିଆରି କରି ଭୂତଳ ଜଳସ୍ତର ବୃଦ୍ଧି ପାଇଁ ବିଭାଗ ପକ୍ଷରୁ ବିଭିନ୍ନ ଯୋଜନା ହାତକୁ ନିଆଯାଇଛି ।

ଜୟପୁର ଏବଂ ବୋରିଗୁମ୍ମା ଅଂଚଳରେ ବି ଜଳସ୍ତର କମିବା କାରଣରୁ ନଳକୂପ ଖୋଳିଲେ ମଧ୍ୟ ସେଥିରୁ ପାଣି ବାହାରୁନାହିଁ। କେଉଁଠି ନଳକୂପ ଅଛି କିନ୍ତୁ ସେଥିରୁ ପାଣି ବାହାରୁନି । ଆଉ କେଉଁଠି ପାଇପ ଷ୍ଟାଣ୍ଡ ଅଛି କିନ୍ତୁ ସେଥିରେ ପାଣି ଆସୁନି ।

ଗତ ୧୦ ବର୍ଷ ମଧ୍ୟରେ ମୟୂରଭଞ୍ଜ ଜିଲ୍ଲାରେ ଭୂତଳ ଜଳସ୍ତର ୨.୬ ମିଟର ହ୍ରାସ ପାଇଛି। କେନ୍ଦ୍ରୀୟ ଭୂତଳ ଜଳ ବୋର୍ଡର ୨୦୨୪ର ଏକ ରିପୋର୍ଟରୁ ଜଣାପଡିଛି ଯେ ପ୍ରାକ୍ ମୌସୁମୀ ଏବଂ ମୌସୁମୀ ପରବର୍ତ୍ତୀ ଭୂତଳ ଜଳସ୍ତରରେ ଉଲ୍ଲେଖନୀୟ ହ୍ରାସ ଘଟିଛି । ଅତ୍ୟଧିକ ଉତ୍ତୋଳନ, ଅପର୍ଯ୍ୟାପ୍ତ ବୃଷ୍ଟିପାତ ଏବଂ ଘରୋଇ ବ୍ୟବହାର ବୃଦ୍ଧି ମୁଖ୍ୟ କାରଣ ବୋଲି ଦର୍ଶାଯାଇଛି।

ପୁରୀରେ ପ୍ରଦୂଷିତ ହେଉଛି ଭୂତଳ ଜଳ । କ୍ରମାଗତ ଭାବେ କମୁଛି ଜଳସ୍ତର । ଫେଲ୍‌ ମାରିଛି ରିଚାର୍ଜ ପଏଣ୍ଟ ଓ ବର୍ଷା ଜଳ ସଂରକ୍ଷଣ ଯୋଜନା । ହୋଟେଲ ଓ ଆପାର୍ଟମେଣ୍ଟ ଭୂତଳ ଜଳ ଉତ୍ତୋଳନ ନିୟମକୁ କରୁଛନ୍ତି ଉଲ୍ଲଙ୍ଘନ ।

Argus News | argus news | Odisha Latest News, Breaking News, Trending News, Live TV