ବଲାଙ୍ଗିର ଜିଲ୍ଲା ପାଟଣାଗଡ଼ରେ CRPF ଯବାନଙ୍କ ଝୁଲନ୍ତା ମୃତଦେହ ଉଦ୍ଧାର । ଲରମ୍ଭା ଥାନା ଘସିଆନ ଗାଁ ନିକଟରୁ ମୃତଦେହ ଠାବ ହୋଇଛି । ମୃତକ ଭକ୍ତରାମ ଭୋଇ । ସେ ଝାରଖଣ୍ଡରେ କାର୍ଯରତ ଥିବାବେଳେ ଘରକୁ ଛୁଟିରେ ଆସିଥିଲେ । ଗତ ୧୬ ତାରିଖ ଶୁକ୍ରବାର ଦିନ ନିଜ କାର୍ଯ୍ୟସ୍ଥଳୀକୁ ବାହାରିଥିବାବେଳେ କେହି ଜଣେ ଫୋନ କରି ଡାକିବାରୁ ସେ କେଉଁଆଡେ ବାହାରି ଯାଇଥିଲା । ତାପରଠୁ ନିଖୋଜ ଅଛନ୍ତି ଭକ୍ତରାମ । ପରିବାର ତରଫରୁ ଗତକାଲି ନିଖୋଜ ମାମଲା ରୁଜୁ ହୋଇଥିଲା । ଆଜି ସକାଳୁ ଗ୍ରାମବାସୀ ଶୌଚ ହେବା ପାଇଁ ଯାଇଥିବାବେଳେ ଗାଁ ନିକଟ ଲିମ୍ବ ଗଛରେ ଯବାନଙ୍କ ଝୁଲନ୍ତା ମୃତଦେହ ଦେଖି ପରିବାରକୁ ଖବର ଦେଇଥିଲେ ।

ମୃତଦେହର ଆଣ୍ଠୁ ତଳେ ଲାଗିଥିବାରୁ ପରିବାର ଲୋକ ଆତ୍ମହତ୍ୟାକୁ ବିଶ୍ୱାସ କରିପାରୁନଥିବାବେଳେ ହତ୍ୟା ଅଭିଯୋଗ ଆଣିଛନ୍ତି । ପୂର୍ବରୁ ପ୍ରେମ ସମ୍ପର୍କ ନେଇ ହତ୍ୟା ଧମକ ଦିଆଯାଉଥିବାରୁ ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି କହିଛନ୍ତି ମୃତକଙ୍କ ବାପ ଦୁଲ୍ଲଵ ଭୋଇ । ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ।