ଭଦ୍ରକ/ପାରାଦୀପ: ପରିଣତ ବୟସରେ ବି କମିନାହିଁ ଶିକ୍ଷାଦାନର ନିଶା । ଶିକ୍ଷକତା ଚାକିରିରୁ ଅବସର ନେବାର ୨୦ ବର୍ଷ ବିତିଲାଣି କିନ୍ତୁ ଏବେ ବି ଜାରି ରଖିଛନ୍ତି ଶିକ୍ଷାଦାନ । ସ୍କୁଲ୍‌କୁ ଯାଉଛନ୍ତି, ପିଲାଙ୍କୁ ପାଠ ପଢ଼ାଉଛନ୍ତି । ତାହା ପୁଣି ବିନା କୌଣସି ସ୍ୱାର୍ଥରେ, କୌଣସି ପାରିଶ୍ରମିକ ନ ନେଇ । ଏମିତି ଜଣେ ଶିକ୍ଷକ ହେଉଛନ୍ତି କେନ୍ଦ୍ରାପଡ଼ା ଜିଲ୍ଲାର ହରିହର ରାଉତରାୟ ।

ପରିବାରର ସୁଖ ସ୍ୱାଛନ୍ଦ୍ୟ, ଆରାମ ଦାୟକ ଜୀବନ ଛାଡ଼ି, ଘରଠୁ ଦୂରରେ ରହି ପିଲାଙ୍କୁ ମାଗଣାରେ ପାଠ ପଢ଼ାଉଛନ୍ତି । ଆଜି ଗୁରୁ ଦିବସରେ ଜାଣିବା ସେହି ଶିକ୍ଷକଙ୍କ ବାବଦରେ । କେନ୍ଦ୍ରାପଡ଼ା ଜିଲ୍ଲାର ହରିହର ରାଉତରାୟ । ଏବେ ବୟସ ୮୩ ଡେଇଁଲାଣି । ୨୦୦୪ ମସିହାରୁ ଶିକ୍ଷକତା ଚାକିରିରୁ ଅବସର ନେଇଥିବା ହରିହର ଏବେ ବି ଥକି ନାହାନ୍ତି ।

ବୟସ ବଢ଼ିଥିଲେ ବି କମିନି ଶିକ୍ଷାଦାନ ପ୍ରତି ଥିବା ଆଗ୍ରହଣ । ଆଜି ବି ସରକାରୀ ସ୍କୁଲରେ ଜାରି ରଖିଛନ୍ତି ମାଗଣା ଶିକ୍ଷାଦାନ । ପାରାଦ୍ୱୀପ ଅଠରବାଙ୍କୀରେ ଥିବା ମାଆ ଅମ୍ବିକା ଉଚ୍ଚ ବିଦ୍ୟାଳୟରେ ବିନା କୌଣସି ପାରିଶ୍ରମିକରେ ପିଲାଙ୍କୁ ଇଂରାଜୀ ବିଷୟ ପଢ଼ାଉଛନ୍ତି ।

ଶିକ୍ଷକ ହରିହରଙ୍କର ଛଅ ସନ୍ତାନ । ପାଞ୍ଚ ଜଣ ପୁଅ ଓ ଜଣେ ଝିଅ । ସମସ୍ତେ ଉଚ୍ଚ ପ୍ରତିଷ୍ଠିତ । ବଡ଼ ପୁଅ ଦିଲୀପ ରାଉତରାୟ ଭଦ୍ରକ ଜିଲ୍ଲାପାଳ ଅଛନ୍ତି । ଦିଲୀପଙ୍କୁ ମିଶାଇ ତିନି ଜଣ ପୁଅ ପ୍ରଶାସନିକ ସେବା ଅଧିକାରୀ । ଏତେ ଉଚ୍ଚ ପ୍ରତିଷ୍ଠିତ ଓ ସମ୍ପନ୍ନ ପରିବାର ଥାଇ ବି ପରିଣତ ବୟସରେ ଆରମ ଦାୟକ ଜୀବନ ଛାଡ଼ି ଦେଶର ଆଗାମୀ ପିଢ଼ିଙ୍କୁ ଆଦର୍ଶ ଶିକ୍ଷାଦାନ କରିବାରେ ନିଜକୁ ନିମଗ୍ନ ରଖିଛନ୍ତି ଶିକ୍ଷକ ହରିହର ରାଉତରାୟ । ଶିକ୍ଷାଦାନ ସହ ସଙ୍ଗୀତ ଓ ପୁସ୍ତକ ଲେଖିବାରେ ରହିଛି ହରିହରଙ୍କ ରୁଚି ।

ଅସୁସ୍ଥତା ପାଇଁ ଏବେ ବଡ଼ପୁଅ ଭଦ୍ରକ ଜିଲ୍ଲାପାଳଙ୍କ ପାଖରେ ଭଦ୍ରକରେ ଥିବା ହରିହର ସାରଙ୍କୁ ଗୁରୁ ଦିବସ ଅବସରରେ ମନେ ପକାଉଛନ୍ତି ତାଙ୍କ ସ୍କୁଲର ଛାତ୍ରଛାତ୍ରୀ ଓ ସହକର୍ମୀ । ବର୍ତ୍ତମାନର ଅର୍ଥ ସର୍ବସ୍ୱ ଦୁନିଆରେ ଦୁଇ ଦଶନ୍ଧିରୁ ଅଧିକ ସମୟ ଧରି ମାଗଣା ଶିକ୍ଷାଦାନ କରି ନିଆରା ଉଦାହରଣ ସୃଷ୍ଟି କରିଥିବା ଶିକ୍ଷକ ହରିହର ରାଉତରାୟ ସମସ୍ତଙ୍କ ପାଇଁ ପ୍ରେରଣାର ଉତ୍ସ ।