ପ୍ରଚଣ୍ଡ ଖରାରୁ ମିଳିଲା ଆଶ୍ୱସ୍ତ। ପୁରୀରେ କାଳବୈଶାଖୀର ପ୍ରଭାବ। କାଳବୈଶାଖୀ ପ୍ରଭାବରେ ହାଲୁକା ପବନ ସାଙ୍ଗକୁ ପ୍ରବଳ ବର୍ଷା ଜାରି। ପବନ ଓ ବର୍ଷା ଯୋଗୁ ଯାତାୟତ ଠପ୍। କଳାହାଣ୍ଡିଆ ମେଘ ସନ୍ଧ୍ୟାର ଭ୍ରମ ସୃଷ୍ଟି କରିଛି। ପ୍ରବଳ ବର୍ଷା ଯୋଗୁଁ ବଡ଼ଦାଣ୍ଡର ଉଭୟ ପାର୍ଶ୍ଵରେ ଜମା ହୋଇଛି ପାଣି।

ପ୍ରଚଣ୍ଡ ଗରମ ହେତୁ ଜଗା ଦର୍ଶନରେ ବାଧାପ୍ରାପ୍ତ ହେଉଥିଲା । କାହିଁ କେତେ ଦୂରରୁ ଲୋକେ ଜଗା ଦର୍ଶନ କରିବାକୁ ପୁରୀ ଆସୁଥିବାବେଳେ ବହୁତ କଷ୍ଟ ପାଉଥିଲେ । ବର୍ଷା ହେବା ପରେ ଆଶ୍ୱସ୍ତି ମିଳିଛି ।

ସେପଟେ ପୁରୀରେ ବଜ୍ରପାତରେ ଜଣଙ୍କର ମୃତ୍ୟୁ ହୋଇଛି । ମୃତ ବ୍ୟକ୍ତି ଜଣଙ୍କ ହେଲେ ସତ୍ୟବାଦୀ କେତକୀପାଟଣା ପଞ୍ଚାୟତ ପଦ୍ମପୁର ଗାଁର ଦୀପ୍ତି ରଞ୍ଜନ ବାରିକ । ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।

ପ୍ରବଳ ବର୍ଷା ନେଇ ଆଗାମୀ ୩ ଘଣ୍ଟା ପାଇଁ ସତର୍କ କରାଇଛି ପାଣିପାଗ କେନ୍ଦ୍ର । ଖୋର୍ଦ୍ଧା, କଟକ ଓ ଢେଙ୍କାନାଳ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ବର୍ଷା ସହ ୪୦ ରୁ ୫୦ କିମି ବେଗରେ ପବନ ବହିବା ସମ୍ଭାବନା ରହିଛି । ଆଗାମୀ ୪ ଦିନ ରାଜ୍ୟରେ କାଳବୈଶାଖୀ ବର୍ଷା ନେଇ ଆକଳନ କରିଛି ପାଣିପାଗ ବିଭାଗ ।

ହଠାତ୍ ପାଗ ବଦଳିବା ପରେ ସାଧାରଣ ଲୋକେ ଆଶ୍ୱସ୍ତି ପ୍ରକାଶ କରିଛନ୍ତି । ହେଲେ କାଳବୈଶାଖୀ କେଉଁଠି ଉପାଡିଛି ତ କେଉଁଠି ଛେଚିଛି । ବଡ ବଡ ଗଛ ମାନ ଭୂଇଁରେ ଲୋଟି ପଡିଛି । ଫଳରେ ଯାତାୟତ ଠପ୍ ହୋଇଛି ।