ରାଜ୍ୟରେ ଲଘୁଚାପ ପ୍ରଭାବରେ ଜାରି ରହିଛି ବର୍ଷା । ଖାସ୍ କରି ଉତ୍ତର ଓଡ଼ିଶାରେ ପ୍ରବଳ ବର୍ଷା ନେଇ ଆକଳନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଗତ ୨୪ ଘଣ୍ଟାରେ ଅଧିକାଂଶ ଜାଗାରେ ହାଲୁକାରୁ ମଧ୍ୟମ ଧରଣର ବର୍ଷା ରେକର୍ଡ ହୋଇଛି । ଆସନ୍ତା ୨୪ ଘଣ୍ଟା ପାଇଁ ମୟୂରଭଞ୍ଜ, କେନ୍ଦୁଝରରେ ଅତ୍ୟନ୍ତ ପ୍ରବଳ ବର୍ଷା ପାଇଁ ରେଡ୍ ଆଲର୍ଟ ଜାରି ହୋଇଛି । ସୁନ୍ଦରଗଡ଼, ଝାରସୁଗୁଡା, ସମ୍ବଲପୁର, ଦେବଗଡ଼, ଅନୁଗୁଳ, ବାଲେଶ୍ବରରେ ପ୍ରବଳରୁ ଅତି ପ୍ରବଳ ବର୍ଷା ପାଇଁ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ ବିଜ୍ଞାନ କେନ୍ଦ୍ର । ସେହିପରି ବରଗଡ଼, ସୋନପୁର, ଢେଙ୍କାନାଳ, ଯାଜପୁର, ଭଦ୍ରକ ଜିଲ୍ଲାରେ ପ୍ରବଳ ବର୍ଷା ହେବ । ଗୁରୁବାର ପାଇଁ କୌଣସି ଜିଲ୍ଲାକୁ ରେଡ୍ ଆଲର୍ଟ ନାହିଁ । ୨୪ ତାରିଖ ଯାଏ ବର୍ଷା ଲାଗି ରହିବ । ବିଜୁଳି ଘଡ଼ଘଡ଼ି ସହ ଝଟକା ପବନ 30ରୁ 40 କିମି ବେଗରେ ବହିବ ।

କେନ୍ଦୁଝର ଜିଲ୍ଲାରେ ପ୍ରବଳ ବର୍ଷା ଲାଗି ରହିଛି । ବଡ଼ବିଲ ଓ ଯୋଡ଼ାରେ ଲଗାଣ ବର୍ଷା ଯୋଗୁ ତଳି ଅଞ୍ଚଳରେ ପଶିଛି ପାଣି । ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ । ପ୍ରବଳ ବର୍ଷା ଯୋଗୁ କିଛି ଲୋକଙ୍କ ଘର ମଧ୍ୟ ଭାଙ୍ଗିଛି । କିଛି ଲୋକଙ୍କ ଘରର ଆସବାବପତ୍ର ପାଣିରେ ବୁଡ଼ି ନଷ୍ଟ ହୋଇଛି । ସେହିପରି ଯୋଡ଼ା ପୌରପାଳିକାର କମାରଯୋଡ଼ା ଓ ବାଂଶପାଣି ଅଞ୍ଚଳରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି ।

ସାମାନ୍ୟ ବର୍ଷାରେ ଭୁଷୁଡ଼ିଲା ୨୫ କୋଟି ଟଙ୍କାର ନିର୍ମାଣଧିନ ଗାର୍ଡୱାଲ୍ । ଗଂଜାମ-କନ୍ଧମାଳକୁ ସଂଯୋଗ କରୁଥିବା କଳିଙ୍ଗା ଘାଟିର ପ୍ରଶସ୍ତୀକରଣ କାର୍ଯ୍ୟ ଚାଲିଥିବା ବେଳେ ବିରାଟ ଗାର୍ଡୱାଲ ଧସି ପ୍ରାୟ ୨୦୦ ଫୁଟ ତଳକୁ ଖସିଯାଇଛି । କାମରେ ଲାଗିଥିବା ଦୁଇଟି ଜେସିବି ମେସିନ ମଧ୍ୟ ତଳକୁ ଖସି ଯାଇଛି । ଅଳ୍ପକେ ବର୍ତ୍ତି ଯାଇଛନ୍ତି ଦୁଇ ଅପରେଟର । ଲଘୁଚାପ ପ୍ରଭାବରେ ଭଦ୍ରକ ଜିଲ୍ଲାରେ ବି ଜାରି ରହିଛି ବର୍ଷା ସହ ପବନ । ବର୍ଷା ପ୍ରଭାବରେ ଲୋକେ ଘରୁ ବାହାରିବା ଅସମ୍ଭବ ହୋଇପଡ଼ିଛି । ଧାମନଗର ଓ ଭଣ୍ଡାରିପୋଖରୀ ଅଞ୍ଚଳରେ ବି ଲାଗି ରହିଛି ବର୍ଷା ।