ଆତଙ୍କୀ କବଳରେ ଓଡ଼ିଆ ପୁଅ । ପୁଅକୁ ଫେରାଇ ଆଣିବା ପାଇଁ ସରକାରଙ୍କୁ ଗୁହାରି କଲେ ଅସହାୟ ବାପା ମାଆ । ଜଗତସିଂହପୁର ଜିଲ୍ଲା ତିର୍ତ୍ତୋଲ ଅଞ୍ଚଳରୁ ଆସିଛି ଏ ଅଭିଯୋଗ । କୋଟକଣା ଗାଁର ଆଦର୍ଶ ବେହେରା ୨୦୨୨ ମସିହାରେ ପରିବାର ପ୍ରତିପୋଷଣ ପାଇଁ ସୁଦୂର ଆଫ୍ରିକାର ସୁଦାନକୁ ଯାଇଥିଲେ । ସେଠାରେ ଏକ ପ୍ଲାଷ୍ଟିକ କମ୍ପାନୀରେ କାର୍ଯ୍ୟ କରୁଥିଲେ । ସେହି ସ୍ଥାନରେ ୭/୮ ମାସ ଭଲରେ ରହିବା ପରେ ସେଠାରେ ଆରମ୍ଭ ହୋଇଥିଲା ଗୃହଯୁଦ୍ଧ । ଏଭଳି ପରିସ୍ଥିତିରେ ସେ ସରକାର ବିରୋଧୀ ଆର୍‌ଏସ୍‌ଏଫ୍‌ ପକ୍ଷରୁ ଆଦର୍ଶଙ୍କୁ ଅପହରଣ କରାଯାଇ ଏକ ଜଙ୍ଗଲରେ ରଖାଯାଇଛି । ଯାହାର ଏକ ଭିଡିଓ ପରିବାର ଲୋକଙ୍କ ପାଖରେ ପହଂଚିବା ପରେ ସେମାନେ ଭୟଭୀତ ଅବସ୍ଥାରେ ଅଛନ୍ତି ।
ସୂଚନାନୁଯାୟୀ ଉଗ୍ରବାଦୀ ସଙ୍ଗଠନ ଆର୍‌ଏସ୍‌ଏଫ୍‌ ଦ୍ୱାରା ଅପହୃତ ହୋଇଥିବା ଯୁବକ ଜଣକ ହେଉଛନ୍ତି ଆଦର୍ଶ ବେହେରା (୩୬) । ଘର ଜଗତ୍‌ସିଂହପୁର ଜିଲ୍ଲାର ତିର୍ତ୍ତୋଲ ବ୍ଲକ ଅଧୀନ ତରଜଙ୍ଗା ପଞ୍ଚାୟତସ୍ଥିତ କୋଟକଣା ଗ୍ରାମରେ । ଏବେ ତାଙ୍କୁ ଉଗ୍ରବାଦୀମାନେ ସୁଦାନର ଅଲ୍‌ଫସିରରେ ବନ୍ଦୀ କରି ରଖିଛନ୍ତି । ସେଠାରେ ଆର୍‌ଏସ୍‌ଏଫ୍‌ ଉଗ୍ରବାଦୀଙ୍କ ଦବ୍‌ଦବା ଥିବାରୁ ତାଙ୍କୁ ପଣବନ୍ଦୀ ରଖାଯାଇଛି ।
ମୁମ୍ୱାଇରେ କାମ କରିବା ସମୟରେ ଆଦର୍ଶ ଏକ କମ୍ପାନିର ମାଲିକଙ୍କ ପରାମର୍ଶରେ ସୁଦାନର ଏକ ପ୍ଲାଷ୍ଟିକ କାରଖାନାରେ କାମ କରିବାକୁ ଚୁକ୍ତିବଦ୍ଧ ହୋଇଥିଲେ । ସୁଦାନରେ ପ୍ରଥମ ୮ ମାସ ଠିକ୍‌ଠାକ୍‌ ରହିଥିଲା । କିନ୍ତୁ ଯୁଦ୍ଧ ଲାଗିବା ପରେ ସମସ୍ୟାରେ ପଡ଼ିଯାଇଥିଲେ ଆଦର୍ଶ । ବର୍ତ୍ତମାନ ସେ ପଣବନ୍ଦୀ । ଦୁଇ ବର୍ଷ ଧରି ଠିକ୍‌ରେ ଖାଇବାକୁ ପାଉ ନାହାନ୍ତି । ଦୀର୍ଘ ମାସ ଧରି ପରିବାର ସହ କଥା ହୋଇନାହାନ୍ତି । ଏକ ଭିଡିଓ ବାର୍ତ୍ତା ଜାରି କରି ଆଦର୍ଶ ରାଜ୍ୟ ସରକାରଙ୍କୁ ଉଦ୍ଧାର କରିବାକୁ ନିବେଦନ କରିଛନ୍ତି ।
ଗ୍ରାମବାସୀଙ୍କ କହିବାନୁଯାୟୀ, ଆଦର୍ଶ ବେହେରାଙ୍କ ପରିବାର କହିଲେ ବାପା କ୍ଷେତ୍ରବାସୀ ବେହେରା, ମା’ ଆରତୀ, ପତ୍ନୀ ଓ ଦୁଇ ପୁତ୍ର । ଆଦର୍ଶଙ୍କ ସାନ ଭାଇ ଗୁଜରାଟରେ କାର୍ଯ୍ୟ କରୁଥିଲେ । ସେ ଏବେ ନିଜ ପରିବାର ସହ ଗ୍ରାମରେ ରହୁଛନ୍ତି । ବର୍ତ୍ତମାନ ସୁଦାନରେ ଆଦର୍ଶଙ୍କ ସହ ଆଉ ଦୁଇ ଜଣ ଫସି ରହିଥିବା କୁହାଯାଉଛି ।
ପରିବାର ଦେଖାଇଥିବା ଏକ ଭିଡିଓରେ ଆଦର୍ଶ ହାତ ଯୋଡ଼ି ଉଦ୍ଧାର ପାଇଁ ନେହୁରା ହେଉଛନ୍ତି । ସେ କହୁଛନ୍ତି, ‘ଅଲ୍‌ ଫସିର ସହରରେ ମୁଁ ଦୁଇବର୍ଷ ହେଲା ବହୁ କଷ୍ଟରେ ରହୁଛି । ମୋ ପରିବାର ଓ ସନ୍ତାନ ମୋ ପାଇଁ ଚିନ୍ତାରେ ଅଛନ୍ତି । ମୁଁ ଓଡ଼ିଶା ସରକାରଙ୍କୁ ସହାୟତା ଯୋଗାଇବାକୁ ଅନୁରୋଧ କରୁଛି ।