ଭୁବନେଶ୍ଵର: ସରକାରୀ ନିର୍ଦ୍ଦେଶନାମାକୁ ମାନୁ ନଥିବା କଲେଜ ଅଧ୍ୟକ୍ଷଙ୍କ ଉପରେ ଆକ୍ସନ୍ । ବନ୍ଦ ହେଲା ୬୩ କଲେଜ ଅଧ୍ୟକ୍ଷଙ୍କ ଦରମା । ସରକାରୀ ନିର୍ଦ୍ଦେଶକୁ ଖାତିର କରୁ ନଥିବା କଲେଜ ଅଧ୍ୟକ୍ଷଙ୍କ ଦରମା ବନ୍ଦ କରି ବଡ଼ କାର୍ଯ୍ୟାନୁଷ୍ଠାନ ନେଇଛି ଉଚ୍ଚଶିକ୍ଷା ବିଭାଗ । ୬୩ଟି ବେସରକାରୀ ଅନୁଦାନ ପ୍ରାପ୍ତ କଲେଜ ଅଧ୍ୟକ୍ଷଙ୍କ ଦରମା ଜାନୁଆରୀ ମାସରୁ ବନ୍ଦ ହେବ ।

ଉଚ୍ଚଶିକ୍ଷା ବିଭାଗର ବାରମ୍ବାର ତାଗିଦ୍ ସତ୍ତ୍ଵେ ରାଜ୍ୟର ୬୩ଟି ବେସରକାରୀ ଅନୁଦାନ ପ୍ରାପ୍ତ କଲେଜ ଅଧ୍ୟକ୍ଷ ନିଜ କଲେଜ ଆକାଉଣ୍ଟକୁ କାପା ପୋର୍ଟାଲରେ ଅପଡେଟ୍ କରି ନାହାନ୍ତି । ୨୦୨୪-୨୫ ଶିକ୍ଷା ବର୍ଷ ପାଇଁ କଲେଜ ଆକାଉଣ୍ଟ ଅପଡେଟ୍ କରିବାକୁ ନିର୍ଦ୍ଦେଶ ରହିଛି । ତଥାପି ଏସବୁ କଲେଜ ଅଧକ୍ଷ ଅପଡେଟ୍ ନ କରିବାରୁ ଉଚ୍ଚ ଶିକ୍ଷା ବିଭାଗ ଅସନ୍ତୋଷ ପ୍ରକାଶ କରି ପଦକ୍ଷେପ ନେଇଛି ।

ଚଳିତ ମାସ ଠାରୁ ଅନିର୍ଦ୍ଦିଷ୍ଟ ସମୟ ଯାଏ ବିଭାଗ ଦରମା ବନ୍ଦ ରଖିଛି । ଯାଜପୁର ଜିଲ୍ଲାର ସର୍ବାଧିକ ୧୧ଟି କଲେଜ ଅଧ୍ୟକ୍ଷ ଙ୍କ ଦରମା ବନ୍ଦ ହୋଇଥିବା ବେଳେ ବାଲେଶ୍ୱର ଓ କଟକର ୪ଟି, ଗଞ୍ଜାମର ୭ଟି, ଜଗତସିଂହପୁରର ୫ଟି, ଖୋର୍ଦ୍ଧାର ୮ଟି ଏଭଳି ୬୩ଟି କଲେଜ ଅଧ୍ୟକ୍ଷଙ୍କ ଦରମା ବନ୍ଦ ନେଇ ବିଭାଗ ନିର୍ଦ୍ଦେଶନାମା ଜାରି କରିଛି ।