Boat Mishap / ଉଚ୍ଚ ଶିକ୍ଷା ମନ୍ତ୍ରୀ ବନ୍ୟାଞ୍ଚଳକୁ ବୋଟରେ ଯାଉଥିବା ବେଳେ ଅଘଟଣ...ଓଲଟିପଡ଼ିଥିବା ଡଙ୍ଗାରୁ ଲୋକଙ୍କୁ ଉଦ୍ଧାର କଲେ

ଭଦ୍ରକର ବନ୍ୟାଞ୍ଚଳରେ ପରିଦର୍ଶନ ବେଳେ ଏକ ବଡ଼ ଅଘଟଣ ଘଟିବାରୁ ଅଳ୍ପକେ ବର୍ତ୍ତି ଯାଇଛି । ଉଚ୍ଚ ଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜ ବନ୍ୟା ପ୍ରଭାବିତ ଅଞ୍ଚଳର ସ୍ଥିତି ପରିଦର୍ଶନ କରିବା ପାଇଁ ଭଦ୍ରକ ଜିଲ୍ଲାର ତିହିଡ଼ି ବ୍ଲକ ଅଧୀନ ବୋଡ଼କ ପଞ୍ଚାୟତରୁ ଓରାଳୀ ଗ୍ରାମକୁ ବୋଟରେ ଯାଉଥିଲେ । ବୋଟରେ ମନ୍ତ୍ରୀଙ୍କ ସହ ପ୍ରାୟ ୧୨ରୁ ଅଧିକ ଲୋକ ଥିଲେ । କିଛି ବାଟ ଯିବା ପରେ ବର୍ଷା ସାଙ୍ଗକୁ ରେବ ନଦୀର ପ୍ରୋଖର ସ୍ରୋତରେ ବୋଟଟି ନିୟନ୍ତ୍ରଣ ହରାଇ ଏପରି ଏକ ଦୁର୍ଘଟଣା ଘଟିଛି।

ପରିସ୍ଥିତି ଅଧିକ ଜଟିଳ ହୋଇପଡ଼ିଥିବା ବେଳେ ପଖରେ ଥିବା ଏକ ଗଛ ଓ ମାଛଧରା ଜାଲ ଦ୍ଵାରା ବୋଟଟି ଅଟକିଯାଇଥିଲା । ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । ଏହି ସମୟରେ ମନ୍ତ୍ରୀ ସୂର୍ଯ୍ୟବଂଶୀ ସୁରଜ ଧୈର୍ଯ୍ୟ ଓ ସାହସର ପରିଚୟ ଦେଇ ବୋଟରୁ ଓହ୍ଲାଇ ବୋଟକୁ ଧରି ସ୍ଥିର କରିବାରେ ସହଯୋଗ କରିଥିଲେ । ପରେ ସ୍ଥାନୀୟ ଲୋକ ଓ ଉଦ୍ଧାରକାରୀ ଦଳଙ୍କ ସହଯୋଗରେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ କୂଳକୁ ଆଣାଯାଇଥିଲା ।

ଏହି ଘଟଣା ପରେ ସ୍ଥାନୀୟ ଲୋକେ ମନ୍ତ୍ରୀଙ୍କ ଉପସ୍ଥିତ ବୁଦ୍ଧି ଓ ସାହସକୁ ପ୍ରଶଂସା କରିଥିଲେ । ତଥାପି ବନ୍ୟା ବିପଦ ସମୟରେ ସତର୍କତା, ତୁରନ୍ତ ପଦକ୍ଷେପ ଓ ପରସ୍ପର ସହଯୋଗ କିପରି ଜୀବନ ବଞ୍ଚାଇପାରେ, ଏହି ଘଟଣା ତାହାର ଏକ ଉଦାହରଣ ଭାବେ ଚର୍ଚ୍ଚାର ବିଷୟ ପାଲଟିଛି ।