ଲଗାଣ ବର୍ଷା ସାଙ୍ଗକୁ ହୀରାକୁଦ ବନ୍ୟାଜଳ ମୁଣ୍ଡଳୀରେ ପ୍ରବେଶ ପରେ ମହନଦୀରେ ବଢୁଛି ଜଳସ୍ତର । ଫଳରେ ତଳିଆ ଅଞ୍ଚଳରେ ପଶିଛି ବନ୍ୟା ପାଣି ଜଗତସିଂହପୁର ଜିଲ୍ଲାର କୋଟକଣା, ତିର୍ତ୍ତୋଲର ମୁଣ୍ଡା, ତଳିଆ ବସ୍ତି ଓ ମଣିଜଙ୍ଗା ସମ୍ପୂର୍ଣ୍ଣ ପାଣି ଘେରରେ । ଜଳବନ୍ଦୀ ଅବସ୍ଥାରେ ୭୦ ପରିବାର। ଅନେକ ଲୋକ କେନାଲ ବନ୍ଧ ଉପରେ ଆଶ୍ରୟ ନେଇଥିବାବେଳେ ପ୍ରଶାସନ ପକ୍ଷରୁ ଶୁଖିଲା ଖାଦ୍ୟ ସାଙ୍ଗକୁ ଚୁଡ଼ା, ଗୁଡ଼ ଦିଆଯାଉଛି । ତିର୍ତ୍ତୋଲ ବିଡ଼ିଓ, ତହସିଲଦାର, ଅଗ୍ନିଶମ କର୍ମଚାରୀ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି ।

ସେପଟେ ବଡମ୍ବା ଭଟ୍ଟାରିକା ବେଢା ଲହଡ଼ି ମାରୁଛି ବନ୍ୟା ଜଳ । ଅଧିକ ପାଣି ବଢିଲେ ମାଆଙ୍କୁ ଗମ୍ଭୀରା ଭିତରୁ ସ୍ଥାନାନ୍ତର କରାଯିବ । ସେହିପରି ନୂଆପଡ଼ା ଜିଲ୍ଲା ସିନାପାଲି ବ୍ଲକ କୁଳିଆପାତର ଗାଁ ନିକଟ ପୋଲ ଉପରେ ୨ ଫୁଟର ଚାଲୁଛି ବର୍ଷା ପାଣି । ଫଳରେ କୁଳିଆପାତର, ରେଙ୍ଗଟାପଡା, ବରଛୀଆ ପଡା, ଖମନିଆପଡ଼ା, ମହୁଲପଡା ଗାଁ ଲୋକଙ୍କ ଯାତାୟାତ ଠପ ହୋଇ ଯାଇଛି । ଏବଂ ସୀମାନ୍ତ ଛତିଶଗଡ଼ ସହ ଯୋଗାଯୋଗ ବିଛିନ୍ନ ହୋଇଛି l

ତୁହାକୁ ତୁହା ବର୍ଷା ଲାଗି ରହିଥିବାବେଳେ ମୟୂରଭଞ୍ଜରେ ସ୍ଥିତି ବେହାଲ୍ ହୋଇପଡିଛି । ରାସ୍ତାଘାଟ, ଗଳିକନ୍ଦିରେ ପାଣି ଜମି ରହିଛି । ସେହିପରି ମାଲକାନଗିରିରେ ସମସ୍ତ ସରକାରୀ, ବେସରକାରୀ ଓ ସରକାରୀ ଅନୁଦାନ ପ୍ରାପ୍ତ ସ୍କୁଲ ବନ୍ଦ ରହିଥିଲା । ସଜାଗ ରହିଛି ପ୍ରଶାସନ । ହେଲ୍ପଲାଇନ ନମ୍ବର ସହ ଦୁଇ ଦିନିଆ କଣ୍ଟ୍ରୋଲ ରୁମ ପ୍ରସ୍ତୁତ ରହିଛି । ରାଜ୍ୟରେ ଲଗାଣ ବର୍ଷାକୁ ଦୃଷ୍ଟିରେ ରଖି ଜଳସମ୍ପଦ ସର୍ବୋଚ୍ଚ ଯନ୍ତ୍ରୀଙ୍କ ସୂଚନା, ମୁଣ୍ଡଳୀରେ ୫ ଲକ୍ଷ ୯୬ କ୍ୟୁସେକ ଜଳ ପ୍ରବାହିତ ହେଉଛି । ମହାନଦୀ ଶାଖା ନଦୀ ଲୁଣା, ପାଇକା, ଚିତ୍ରୋତ୍ପଳା, ଦୟା, ଭାର୍ଗବୀ, କୁଆଖାଇ, କାଠଯୋଡିରେ ବଢିବ ଜଳସ୍ତର । ହେଲେ ଓଡ଼ିଶାର କୌଣସି ସ୍ଥାନରେ ନାହିଁ ବନ୍ୟା ସ୍ଥିତି ।

ବଙ୍ଗୋପସାଗରରେ ଏକ ଲଘୁଚାପ ସକ୍ରିୟ ଥିବାବେଳେ ୩୦ ତାରିଖ ବେଳକୁ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହେବା ସମ୍ଭାବନା ଦେଇଛି ପାଣିପାଗ ବିଭାଗ । ୧ ଅକ୍ଟୋବର ପାଖାପାଖି ଏହା ଲଘୁଚାପ କ୍ଷେତ୍ରରେ ପରିଣତ ହେବ । ପ୍ରଭାବରେ ୪ ଯାଏଁ ରାଜ୍ୟରେ ପ୍ରବଳ ବର୍ଷା ସମ୍ଭାବନା । ଆଗାମୀ ୨୪ ଘଣ୍ଟାରେ ସାରା ଓଡ଼ିଶାରେ ବିଜୁଳି ଘଡଘଡ଼ି ସହ ବର୍ଷା ହଳଦିଆ ଚେତନାନି ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର ।

ଅଧିକ ପଢ଼ନ୍ତୁ ଓଡ଼ିଶା ଖବର: