ଏମିତି ବି ମୃତ୍ୟୁ ଆସେ: ଆଖି ଆଗରେ ଘର ସହ ଜଳିଗଲେ ୪ ଗାଈ, ସେଇଠି ଟଳି ପଡ଼ିଲେ ମାଲିକ
ଏରସମା: ଘରେ ନିଆଁ ଲାଗିଲା । ନିମିଷକେ ଆଖି ଆଗରେ ସବୁକିଛି ଛାରଖାର୍ ହୋଇଗଲା । ୪ ବଖରା ଘର ଜଳିଗଲା । ବାସ ଯିବା ସହ ଚାଲିଗଲା ପେଟକୁ ଦାନା ଯୋଗାଉଥିବା ଗାଈଙ୍କ ଜୀବନ । ଏ ସବୁ ଦେଖି ସହି ପାରିଲେନି ମାଲିକ । ଭୀଷଣ କଷ୍ଟରେ ସେଇଠି ଟଳି ପଡ଼ିଲେ । ଏଭଳି ଅଭାବନୀୟ ଘଟଣା ଘଟିଛି ଜଗତସିଂହପୁରରେ ।
ଏ କଥା ଯିଏ ଶୁଣୁଛି, ସିଏ କହୁଛି... ଏମିତି ବି ମୃତ୍ୟୁ ଆସେ । ବିଳମ୍ବିତା ରାତିରେ ଏରସମା ବ୍ଲକ କୁଞ୍ଜକୋଠି ପଞ୍ଚା।ତ ଲୁଣିପୋଖରୀ ଗାଁରେ ଅଗ୍ନିକାଣ୍ଡ ହୋଇଥିଲା । ରମେଶ୍ଵ ସ୍ଵାଇଁଙ୍କ ୪ ବଖରା ଘର ନିଆଁରେ ପୋଡ଼ି ଯାଇଥିଲା । ଜୀବନ୍ତ ଦଗ୍ଧ ହୋଇ ଯାଇଥିଲେ ୪ ଗାଈ । ଆଉ ଏଥିରେ ଭାଙ୍ଗି ପଡ଼ିଥିଲେ ମାଲିକ ରମେଶ ସ୍ଵାଇଁ ।
ଘଟଣାସ୍ଥଳରେ ହିଁ ସେ ଟଳି ପଡ଼ିଥିଲେ । ହୃଦ୍ଘାତରେ ରମେଶଙ୍କ ମୃତ୍ୟୁ ହୋଥିବା ସୂଚନା ମିଳିଛି । ଖବର ଅନୁସାରେ, ଜୀବନ୍ତ ଦଗ୍ଧ ହୋଇ ଯାଇଥିବା ୪ ଗାଈ ରମେଶଙ୍କ ରୋଜଗାରର ମାଧ୍ୟମ ଥିଲା । ଘର ଜଳିବା ସହ ରମେଶଙ୍କ ସମସ୍ତ ଆସବାବପତ୍ର ଜଳି ଯାଇଛି । ନିଆଁ କେମିତି ଲାଗିଲା ତାହା ସ୍ପଷ୍ଟ ହୋଇ ନାହିଁ । ଅଗ୍ନିକାଣ୍ଡ ଖବର ପାଇଁ ଅଗ୍ନିଶମ ବାହିନୀ ବିଳମ୍ବରେ ପହଞ୍ଚିଥିବା ଅଭିଯୋଗ ହୋଇଛି ।
