ଭୁବନେଶ୍ଵର: ବିଜେଡି ବିଗାଡ଼ି ଦେଇଛି ଶିକ୍ଷା ବ୍ୟବସ୍ଥା । ଏ କଥା ଆମେ କହୁନୁ, ବିଦ୍ୟାଳୟ ସ୍ତରରୁ ନେଇ ବିଶ୍ଵବିଦ୍ୟାଳୟ ପର୍ଯ୍ୟନ୍ତ ଅବ୍ୟବସ୍ଥା କହୁଛି ବିଜେଡି ସରକାରରେ ଥିବା ବେଳେ କେମିତି ସବୁକିଛି ବିଗିଡ଼ି ଥିଲା । ଆଜି ବିଧାନସଭାରେ ପ୍ରଶ୍ନୋତ୍ତରରେ ଏସବୁ ଉପରୁ ପରଦା ହଟିଛି ।

ବିଧାୟକ ଚକ୍ରମଣି କହଁରଙ୍କ ପ୍ରଶ୍ନର ଲିଖିତ ଉତ୍ତରରେ ସାଘାଂତିକ ତଥ୍ୟ ରଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ଅଷ୍ଟମ ଶ୍ରେଣୀ ପିଲା ଜାଣି ନାହାନ୍ତି ଫେଡାଣ, ହରଣ । ୬୮.୫ ପ୍ରତିଶତ ପିଲା ଜାଣି ନାହାନ୍ତି ଫେଡାଣ ଏବଂ ୪୫.୮ ପ୍ରତିଶତ ପିଲା ଜାଣିନାହାନ୍ତି ହରଣ । ଏହି ସଂଖ୍ୟା ପ୍ରତିବର୍ଷ ବଢି ବଢି ଚାଲିଛି ।

୨୦୧୪ରେ ୬୩.୪ ପ୍ରତିଶତ ପିଲା ଫେଡାଣ ଜାଣି ନଥିବା ବେଳେ ୨୦୨୪ରେ ତାହା ବଢି ୬୯.୫ ପ୍ରତିଶତରେ ପହଞ୍ଚିଥିବା ରିପୋର୍ଟ ଆସିଛି । ସେହିପରି ୨୦୧୪ରେ ୩୭.୯ ପ୍ରତିଶତ ପିଲା ହରଣ ଜାଣି ନଥିବା ବେଳେ ୨୦୨୪ରେ ତାହା ବଢି ୪୫.୮ ପ୍ରତିଶତରେ ପହଞ୍ଚିଛି ।

ବିଦ୍ୟାଳୟରେ ପିଲା ଫେଡ଼ାଣ, ହରଣରେ ଦୁର୍ବଳ ଥିବା ବେଳେ ବିଶ୍ଵବିଦ୍ୟାଳୟରେ ନାହାନ୍ତି ସ୍ଥାୟୀ ଅଧ୍ୟାପକ । ଅତିଥି ଅଧ୍ୟାପକଙ୍କ ଭରସାରେ ଚାଲିଛି ରାଜ୍ୟର ନାମକରା ବିଶ୍ଵବିଦ୍ୟାଳୟ । ୧୭ଟି ବିଶ୍ଵ ବିଦ୍ୟାଳୟରେ ପାଠ ପଢ଼ାଉଛନ୍ତି ୯୬୩ ଜଣ ଗେଷ୍ଟ ଫ୍ୟାକଲ୍‌ଟି । ଉତ୍କଳ ବିଶ୍ଵବିଦ୍ୟାଳୟରେ ୫୯, ରେଭେନ୍ସାରେ ୮୯, ସମ୍ବଲପୁରରେ ୬୪, ରାଜେନ୍ଦ୍ର ବିଶ୍ଵ ବିଦ୍ୟାଳୟରେ ୧୧୩, ବିକ୍ରମ ଦେବରେ ୭୮, ଗଙ୍ଗାଧର ମେହେର ୬୧, ଖଲିକୋଟରେ ୬୩, ରମାଦେବୀ ରେ ୮୧ ଜଣ ଗେଷ୍ଟ ଫ୍ୟାକଲଟି କରୁଛନ୍ତି ଶିକ୍ଷାଦାନ ।

୧୭ଟି ବିଶ୍ଵବିଦ୍ୟାଳୟରେ ଖାଲି ପଡ଼ିଛି ୧ ହଜାର ୩୦୭ ପ୍ରଫେସର ପଦବୀ । ଉତ୍କଳ ବିଶ୍ଵବିଦ୍ୟାଳୟରେ ୧୩୬, ରେଭେନ୍ସାରେ ୧୫୭, ଖଲିକୋଟରେ ୧୧୨, ରାଜେନ୍ଦ୍ରରେ ୧୦୬, ଧରଣୀଧର ବିଶ୍ଵବିଦ୍ୟାଳୟରେ ଖାଲି ପଡ଼ିଛି ୧୧୧ ପ୍ରଫେସର ପଦବୀ । ବିଧାୟକ ଅରବିନ୍ଦ ମହାପାତ୍ରଙ୍କ ପ୍ରଶ୍ନରେ ଲିଖିତ ଉତ୍ତର ରଖିଛନ୍ତି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ।

କେବଳ ଶିକ୍ଷା ବ୍ୟବସ୍ଥା ନୁହେଁ, ପୂର୍ବ ବିଜେଡି ସରକାରରେ ଇଞ୍ଜିନିୟରିଂ ପଢ଼ିଲା ପରେ ନଥିଲା ନିଯୁକ୍ତି ସୁଯୋଗ । ପିଲା ପାଠ ପଢୁଥିବା ବେଳେ ଚାକିରି ନାହିଁ । ୧୦ ବର୍ଷ ମଧ୍ୟରେ ଇଞ୍ଜିନିୟରିଂ ପାଠ ପଢି ପାସ୍ ହୋଇଛନ୍ତି ୩୪ ହଜାର ୪୭୧ ପିଲା ହେଲେ, ଚାକିରି ପାଇଛନ୍ତି ମାତ୍ର ୧୫ ହଜାର ୨୮୯ ଜଣ ପିଲା ।

ରାଜ୍ୟରେ ବର୍ତ୍ତମାନ ୧୯ ହଜାର ୧୮୨ ଇଞ୍ଜିନିୟରିଂ ପଢି ବେକାର ବସିଛନ୍ତି । ସେହିପରି ଡିପ୍ଲୋମାରେ ସ୍ଥିତି ଆହୁରି ସାଂଘାତିକ । ୧୦ ବର୍ଷ ମଧ୍ୟରେ ଡିପ୍ଲୋମା ପଢି ପାସ କରିଛନ୍ତି ୫୪ ହଜାର ୧୮୯ ଜଣ ପିଲା । ଚାକିରି ପାଇଛନ୍ତି ମାତ୍ର ୨୦ ହଜାର ୯୬ ଜଣ ପିଲା । ବର୍ତ୍ତମାନ ରାଜ୍ୟରେ ୩୪ ହଜାର ୫୧ ଜଣ ଡିପ୍ଲୋମା ପଢି ବେକାର ବସିଛନ୍ତି । ବିଧାୟକ ପବିତ୍ର ସାଉଁଟାଙ୍କ ପ୍ରଶ୍ନରେ ଲିଖିତ ଉତ୍ତର ରଖିଛନ୍ତି ଦକ୍ଷତା ବିକାଶ ମନ୍ତ୍ରୀ ସମ୍ପଦ ସ୍ଵାଇଁ ।

Argus News | argus news | -Argusnews Home: Odisha Latest News, Breaking News, Trending News, Live TV and more