ହ୍ୟୁମାନ୍ ମୃତ୍ୟୁ ଉପରୁ ଉଠିବ ପରଦା । ମାମଲା ରୁଜୁ କରି ତଦନ୍ତ ଆରମ୍ଭ କଲା କମିଶନରେଟ ପୋଲିସ । ମାଆଙ୍କ ଏତଲା ଆଧାରରେ ରୁଜୁ ହେଲା ମାମଲା । ଅତିରିକ୍ତ ଡିସିପି ଅମରେନ୍ଦ୍ର ପଣ୍ଡାଙ୍କ ସୂଚନା । ଏତଲା ଭୁକ୍ତ ସଭିଙ୍କୁ ସମନ କରି ପଚରାଉଚରା କରିବ ପୋଲିସ ।

ରବିବାର କଟକ ମର୍କତନଗର ଥାନାରେ ଦେଇଛନ୍ତି ଏତଲା । ଯେଉଁଥିରେ ଶେଫାଳି ସୁନା ହ୍ୟୁମାନଙ୍କୁ ନିର୍ଯାତନା, ମାନହାନି ମକଦ୍ଦମା ଓ ପରିବାରରୁ ଅଲଗା ହେବା କଥା ଉଠାଇଛନ୍ତି । ଏସବୁ ଦିଗରେ ପୋଲିସ ତଦନ୍ତ କରିବାକୁ ଅନୁରୋଧ କରିଛନ୍ତି ଶେଫାଳି ।

ଏତଲାରେ ଲେଖିଛନ୍ତି, "ହଠାତ୍ ବୋହୂ ଶ୍ରେୟା ମିଶ୍ର, ହ୍ୟୁମାନ୍ ଓ ମୋ ବିରୋଧରେ ଏକାଧିକ ଅଭିଯୋଗ ଆଣିଥିଲେ । ସେ ସବୁ ଅଭିଯୋଗ ମଛ ଥିଲା, ତାର କୌଣସି ପ୍ରମାଣ ନାହିଁ । ଯାହାକି ଅତ୍ୟଧିକ ମାନସିକ ଚାପ ସହ ସମାଜ, ବୃତ୍ତିଗତ, ଭାବାତ୍ମକ ଏବଂ ଶାରିରୀକ ଭାବେ ହ୍ୟୁମାନ ଓ ମୋତେ ଅସ୍ଥିର କରିଥିଲା ।"

ସେ ସମୟରେ ଅନେକ କଥା ମିଡିଆରେ ଆସିଲା । ଅନେକ ସାକ୍ଷାତକାର ଦିଆଗଲା । ସେ ସବୁକୁ ପୋଲିସ ଦେଖି ତଦନ୍ତ କରୁ । ଏପରିକି ହ୍ୟୁମାନଙ୍କୁ ତାଙ୍କ ଝିଅ ନ୍ୟୁ ଆଙ୍ଗେଲ୍ ସାଗରଙ୍କ ସହ ଭେଟିବାକୁ ଦିଆ ଯାଉ ନଥିଲା । ଯାହା ହ୍ୟୁମାନ ଓ ଶେଫାଳିଙ୍କୁ ଗଭୀର ଆଘାତ ଦେଇଥିଲା । ସେ ଦିଗରେ ତଦନ୍ତ ଦାବି କରିଛନ୍ତି ଶେଫାଳି ।

ହ୍ୟୁମାନଙ୍କ ବୃତିଗତ ଜୀବନ ସହ ୩ରୁ ୪ ବର୍ଷ ଭିତରେ ଶଂଶ୍ଲିଷ୍ଟ ଥିବା ତାଙ୍କ ପତ୍ନୀ ଶ୍ରେୟା ମିଶ୍ର ଏବଂ ପରିବାରକୁ ଶେଫାଳି ବିବାଦକୁ ଟାଣିଛନ୍ତି । ହ୍ୟୁମାନଙ୍କ ଚିକିତ୍ସା କରୁଥିବା ଡାକ୍ତର ଶୁଭେନ୍ଦୁ ମିଶ୍ରଙ୍କୁ ତଦନ୍ତ ପରିସର ଭୁକ୍ତ କରିବାକୁ ଏତଲାରେ ଦାବି କରିଛନ୍ତି ।

ଏଥିସହ ଅର୍ପିତା ଚୌଧୁରୀ ଓ ପରିବାର, ସୋମେଶ ଶତପଥି, ଦିନେଶ ବେହେରା, ଏମଡି ଅବିଦ (ବବଲୁ), ପ୍ରଶାନ୍ତ ବେହେରା, ଲୁଲୁ ମହାନ୍ତି, ଜଗଦୀଶ ମହାନ୍ତି ଆଦିଙ୍କ ସମ୍ପୃକ୍ତି ନେଇ ପୋଲିସ ତଦନ୍ତ କରୁ । ସେମାନେ ହ୍ୟୁମାନଙ୍କ ସହ କଣ କଥା ହୋଇଛନ୍ତି, ଇମେଲ୍‌ରେ କଣ ପଠାଇଛନ୍ତି, କେତେ ଟଙ୍କାର ଦେଣନେଣ ହୋଇଛି, କେତେଥର ଭେଟିଛନ୍ତି ସେ ସବୁ ଦିଗରେ ଯାଞ୍ଚ ପାଇଁ ଦାବି କରିଛନ୍ତି ଶେଫାଳି ସୁନା ।

ଅର୍ପିତାଙ୍କ ନାଁରେ ହ୍ୟୁମାନଙ୍କ ସମ୍ପତ୍ତି !
ଏତଲାରେ ହ୍ଯୁମାନଙ୍କ ସମ୍ପତ୍ତି ଓ ଆର୍ଥିକ କାରବାର କଥା ଲେଖିଛନ୍ତି ଶେଫାଳି । ନୂଆ କରି ହ୍ୟୁମାନ କରିଥିବା ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତି ଅର୍ପିତା ଚୌଧୁରୀ ଓ ତାଙ୍କ ପରିବାର ସହ ଜଡ଼ିତ। ଅର୍ପିତାଙ୍କ ସହ ସୋମେଶ ସତପଥିଙ୍କ ସମ୍ପର୍କ ରହିଠି । ଭୁବନେଶ୍ଵରରେ ଥିବା ଷ୍ଟୁଡିଓରେ ଲାଗିଥିବା ଟଙ୍କା କଥା ଉଠାଇଛନ୍ତି ହ୍ୟୁମାନଙ୍କ ମାଆ।