କେନ୍ଦ୍ରାପଡା: କେନ୍ଦ୍ରାପଡ଼ା ଆଳି ନୂଆଗାଁ ସମବାୟ ସମିତିରେ ମଣ୍ଡି ଖୋଲିବାର 10 ଦିନରୁ ଅଧିକ ହେଲାଣି । ହେଲେ ଏଯାଏଁ ଧାନ ଉଠୁନାହିଁ । ଅସ୍ଥାୟୀ ଟେଣ୍ଟ ତଳେ ପଡ଼ିରହିଛି ହଜାର ହଜାର ଧାନ ବସ୍ତା । ପ୍ରତିବାଦରେ ମଣ୍ଡି ଆଗରେ ଧାରଣା ଦେଇଛନ୍ତି ଚାଷୀ । ତହସିଲଦାର ପ୍ରତିଶ୍ରୁତି ଦେଇଛନ୍ତି ଶୀଘ୍ର ଧାନ ଉଠିବ । ବୌଦ୍ଧ ଜିଲ୍ଲାରେ ଧାନ କିଣାରେ ବ୍ୟାପକ ଅବ୍ୟବସ୍ଥା ନଜରକୁ ଆସିଛି । ଜିଲ୍ଲାର ବିଭିନ୍ନ ମଣ୍ଡିରେ 10 ରୁ 15 ଦିନ ହେଲା ଧାନ ପଡ଼ି ରହିଛି । ମିଲର ଆବଶ୍ୟକ ସଂଖ୍ୟକ ଗାଡ଼ି ଯୋଗାଇ ପାରୁନ ଥିବାରୁ ସମସ୍ୟା ହେଉଥିବା କୁହାଯାଉଛି ।

ସେହିପରି ବଲାଙ୍ଗୀର ବଙ୍ଗୋମୁଣ୍ଡା ଅଲଣ୍ଡା ଧାନ ମଣ୍ଡିରୁ ଧାନ ଉଠୁନଥିବାରୁ ଧାରଣା ଦେଇଛନ୍ତି ଚାଷୀ। ଟୋକନ ଲାପ୍ସ ହୋଇଯାଉଥିବାରୁ ବଢୁଛି ଚାଷୀଙ୍କ ଟେନସନ୍। ପ୍ରଶାସନର ଅବହେଳା ବିରୋଧରେ ଚାଷୀ ବର୍ଷିଛନ୍ତି । ଯୋଗାଣମନ୍ତ୍ରୀ କହିଛନ୍ତି, ଏବେ ସୁଦ୍ଧା ୩୪ ଲକ୍ଷ ୨୯ ହଜାର ମେଟ୍ରିକ ଟନ ଧାନ କିଣା ସରିଲାଣି । ଚାଷୀଙ୍କ ଆକାଉଣ୍ଟକୁ ୭ ହଜାର ୨୦୮ କୋଟି ଟଙ୍କା ପଠାଇ ସାରିଲେଣି ସରକାର । ଯେଉଁଠି କଟନୀ ଛଟନୀ ବା ଅନ୍ୟ କୌଣସି ସମସ୍ୟାର ଅଭିଯୋଗ ଆସୁଛି ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉଛି ।

ବର୍ଷକ ଯାକର ପରିଶ୍ରମ ପରେ ଧାନ ବିକ୍ରି କରିବାକୁ ହଇରାଣ ହେଉଥିବାରୁ ବଢୁଛି ଚାଷୀଙ୍କ ଦୂର୍ଦ୍ଦଶା । ସରକାର ତୁରନ୍ତ ପଦକ୍ଷେପ ନେବାକୁ ଦାବି ହେଉଛି ।