ଆମେରିକାରେ ଓଡ଼ିଆ ଝିଅଙ୍କୁ ନିର୍ଯାତନା ପ୍ରସଙ୍ଗରେ ଟ୍ୱିଷ୍ଟ । ଓଡ଼ିଶା ଫେରିଲେ ନାବାଳିକା । କିନ୍ତୁ ନିର୍ଯାତନା କଥାକୁ କଲେ ଖଣ୍ଡନ । ସେ କହିଛନ୍ତି ତାଙ୍କୁ ଓଡ଼ିଶା ଫେରିବାକୁ ଥିଲା, ତେଣୁ ନିର୍ଯାତନା କଥା କହିଥିଲେ । ଭୁବନେଶ୍ଵର ବିମାନ ବନ୍ଦରରେ ପହଞ୍ଚିବା ପରେ ନାବାଳିକା ଗଣମାଧ୍ୟମ ଆଗରେ କହିଛନ୍ତି ପାଳିତା ମା ବହୁତ ଭଲ । କିଛି ଦିନ ତଳେ ଆମେରିକାରେ ପୋଷ୍ୟ ଭାବେ ରହୁଥିବା ଓଡ଼ିଆ ଝିଅର ସୋସିଆଲ ମିଡିଆ ପୋଷ୍ଟ ଚର୍ଚ୍ଚାର କାରଣ ହୋଇଥିଲା । ତାଙ୍କୁ ସେଠାରେ ନିର୍ଯାତନା ଦିଆଯାଉଥିବା ସେ କହିଥିଲେ ।

ସମ୍ପୂର୍ଣ୍ଣ କାହାଣୀଟି ହେଲା...

ନାବାଳିକା ଜଣକ କହିଛନ୍ତି, 'ଆମେରିକାରେ ୭ ବର୍ଷ ରହିଲି । ମତେ ଆମେରିକା ଭଲ ଲାଗିଲାନି । ମୋ ମାଆ ଭଲ । ଯାହା ମାଗିଛି ଦେଇଛନ୍ତି । ହେଲେ ମତେ ଆମେରିକା ଭଲ ଲାଗିଲାନି । ସେ ଲାଇଫ୍ ଷ୍ଟାଇଲ୍ ମୋର ପସନ୍ଦ ନୁହେଁ । ମତେ ମୋ ନିଜ ଇଚ୍ଛାରେ ବଞ୍ଚିବାର ଅଛି । ମତେ ଓଡ଼ିଶାରେ ରହିବାର ଅଛି । ମୋ ପ୍ରେମ ସହ ବଞ୍ଚିବାର ଅଛି । ସେଥିପାଇଁ ମୁଁ ମୋ ମାଆଙ୍କ ବିଷୟରେ ଯାହା କହିଥିଲି ସବୁ ମିଛ । ମୁଁ ଓଡ଼ିଶା ଆସିବାକୁ ଚାହୁଁଥିଲି ସେଥିପାଇଁ ଏମିତି ଭିଡିଓ ବନେଇଥିଲି ।

ଆମେରିକାରୁ ଓଡିଶା ଫେରିଥିବା ସେଇ ଝିଅର ନାଁ ହେଉଛି ସେଜଲ ଜେନ୍ ଓରଫ୍ ପୂଜା । ପିଲା ବେଳୁ ବାପା ମାଆଙ୍କୁ ହରାଇଛନ୍ତି । ଆମେରିକାର ଏକ ଦମ୍ପତ୍ତି ତାଙ୍କୁ ପୋଷ୍ୟ ଗ୍ରହଣ କରି ଆମେରିକା ନେଇଯାଇଥିଲେ । ସେଠାରେ ସେ ୭ ବର୍ଷ ରହିଲେ । ହେଲେ ବି ପୂଜା ମନେ ମନେ ମାଟି ମାଆକୁ ଝୁରୁଥିଲେ । ନିଜ ପ୍ରେମକୁ ଝୁରୁଥିଲେ । କିଛି ଦିନ ତଳେ ସେଠାରେ ତାଙ୍କୁ ପାଳିତ ବାପା ମା ନିର୍ଯାତନା ଦେଉଥିବା ଭିଡିଓ କରି ଅଭିଯୋଗ କରିଥିଲେ । କିନ୍ତୁ ଏବେ ସେ ନିର୍ଯାତନା ନୁହେଁ ପ୍ରେମ ପାଇଁ ଓଡ଼ିଶା ଆସିଥିବା କହିଛନ୍ତି ପୂଜା ।

ସେ ଚତୁର୍ଥ ପଢିବା ବେଳୁ ଗୋଟେ ପୁଅକୁ ଭଲ ପାଉଥିଲେ । ପୁଅର ଘର ବାଲେଶ୍ୱରରେ । ତାଙ୍କୁ ଜୀବନ ସାଥୀ କରିବାକୁ ଚାହାନ୍ତି ପୂଜା । ପାଳିତ ବାପା ମାଆଙ୍କ ବାରଣ ସତ୍ତ୍ୱେ ଲୁଚି ଲୁଚି ତାଙ୍କ ସହ ସେ କଥା ହୁଅନ୍ତି । ଶେଷରେ ନିଷ୍ପତ୍ତି ନେଲେ ମୁଁ ମୋ ମାଟିକୁ ଫେରିବି । ଏ ଲାଇଫ୍ ଷ୍ଟାଇଲ୍ ମୋ ପାଇଁ ନୁହେଁ । ଅଭିଭାବକଙ୍କ ନିର୍ଯାତନା ନୁହେଁ ବରଂ ନିଜର ପ୍ରେମ ତାଙ୍କୁ ଓଡ଼ିଶା ଟାଣି ଆଣିଥିବା ସେ ସ୍ପଷ୍ଟ କରିଛନ୍ତି ।