ରାୟଗଡ଼ା ଜିଲ୍ଲାର ଏହି ପଥର କୁଁଆଁରିଗୁଡ଼ିକର ନିଲାମ ଅବଧି ସରିଥିଲେ ମଧ୍ୟ ବଡ଼ ବଡ଼ ପାହାଡ଼ ଗୁଡିକରେ ତାର ଖଞ୍ଜି ଜିଲେଟିନ ଲଗାଇ କରାଯାଉଛି ବ୍ଲାଷ୍ଟ। କେହି ରୋକିବାକୁ ନାହାଁନ୍ତି । ପଥର ମାଫିଆ ରୋଚାରେ ପ୍ରତିଦିନ ବୋହିନେଉଛନ୍ତି ଟ୍ରିପ୍ ଟ୍ରିପ୍ ପଥର। କୋଟି କୋଟି ଟଙ୍କାର ରାଜସ୍ବ ହରାଉଛନ୍ତି ସରକାର। ଏହି ବେଆଇନ୍ ବ୍ଲାଷ୍ଟିଂ ଓ ପଥର କୁଆଁରି ଯୋଗୁଁ ସବୁଠୁ ବେଶୀ କ୍ଷତିଗ୍ରସ୍ତ ହଉଛନ୍ତି ଚାଷୀ। ପାହାଡ଼ରେ ବ୍ଲାଷ୍ଟ ହେଲେ ଦୁଇ ଚାରି କିଲୋମିଟର ଯାଏ ପଥର ବିଛାଡ଼ି ହୋଇପଡ଼ୁଛି। ଏଥିଯୋଗୁଁ ଚାଷ ଜମି ତ କ୍ଷତିଗ୍ରସ୍ତ ହେଉଛି। ଲୋକ ଓ ଗୃହ ପାଳିତ ପଶୁ ବି ଅଧିକାଂଶ ସମୟରେ ଆହତ ହେଉଛନ୍ତି। ଫଳରେ ଲୋକେ ଚାଷ କରିବାକୁ ଓ ପାଖ ଜଙ୍ଗଲକୁ ଗୃହପାଳିତ ପଶୁ ଚରାଇବାକୁ ଯିବା ଲାଗି ଡରୁଛନ୍ତି। ମାଫିଆମାନଙ୍କ ଏପରି ଦୌରାତ୍ମ୍ୟ ସତ୍ତ୍ବେ ନିଦା ବିଷ୍ଣୁ ସାଜିଛି ଖଣି ବିଭାଗ।

ରାୟଗଡା ଜିଲ୍ଲାରେ ମୋଟ ୮୮ ଟି ପଥର କୁଆଁରି ଥିବା ବେଳେ କେବଳ ୬୦ କୁଆଁରି କାଗଜପତ୍ର ଠିକ ଅଛି। ଅନ୍ୟ ଗୁଡିକ ବେଆଇନ ଭାବେ ଚାଲିଛି । ଲେକାପାଇରେ ଥିବା ଏହି ପଥର କୁଆଁରି ୨୦୧୮ ମସିହାରେ ନିଲାମ ହୋଇଥିଲା । ୨୦୨୩ରୁ ଏହାର ଅବଧି ସରିଲାଣି। ହେଲେ ପୁନର୍ବାର ନିଲାମ କରୁନି ଖଣି ବିଭାଗ। ଅଥଚ ପଥର ଉତ୍ତୋଳନ ବେଧଡ଼କ ଭାବେ ଚାଲିଛି। ଏଥିସହ ଜିଲ୍ଲାର ଏକଧିକ କ୍ରସର ମଧ୍ୟ ବିନା ଅନୁମିତିରେ ଚାଲିଥିବା ଅଭିଯୋଗ ହୋଇଛି। ଏ ସମ୍ପର୍କରେ ଖଣି ଅଧିକାରୀଙ୍କୁ ପଚାଲିଲେ ସେ ନିଜ ଅସହାୟତା ପ୍ରକାଶ କରୁଛନ୍ତି।

ଯଦି ପଥର ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆନଯାଏ ଜିଲ୍ଲାର ଆଇନ ଶୃଙ୍ଖଳା ପରିସ୍ଥିତି ଉପୁଜିବାର ଆଶଙ୍କା ରହିଛି। ସେପଟେ ଅବଧି ସରିଥିବା କୁଆଁରିଗୁଡ଼କର ସାନି ନିଲାମ କରାନଗଲେ ରାଜ୍ୟ ସରକାରଙ୍କ ରାଜସ୍ବ କ୍ଷତି ଏହିପରି ବଢିବିଢି ଚାଲିବ।