ପାନୀୟ ଜଳ ପ୍ରକଳ୍ପରେ ଆଉ ଚଳିବନି ଠିକା କମ୍ପାନୀର ମନମାନି, ସମୟରେ କାମ ନହେଲେ ହେବେ ବ୍ଲାକ୍ ଲିଷ୍ଟେଡ୍

ଭୁବନେଶ୍ଵର: ଖରା ଆସିଲାଣି, ଜଳକଷ୍ଟ ବି ବଢ଼ିଲାଣି । ହେଲେ କଣ୍ଟ ସରିବା ସତ୍ତ୍ଵେ ସରୁନି ବିଭିନ୍ନ ପାନୀୟ ଜଳ ପ୍ରକଳ୍ପର ନିର୍ମାଣ କାର୍ଯ୍ୟ । ଏହାକୁ ନେଇ ଆଜି ବିଧାନସଭା ପ୍ରଶ୍ନକାଳରେ ଆଲୋଚନା ହୋଇଥିବା ବେଳେ କଡ଼ା ଆଭିମୁଖ୍ୟ ପୋଷଣ କରିଛନ୍ତି ପଞ୍ଚାୟତିରାଜ ଓ ପାନୀୟ ଜଳ ମନ୍ତ୍ରୀ ରବି ନାୟକ । ମନ୍ତ୍ରୀ କହିଛନ୍ତି, ନୂଆ ସରକାର ଆସିବା ବେଳକୁ ଠିକା କମ୍ପାନୀ କାମ ସାରିବର ସମୟ ପଳାଇଥିଲା ।

କାମ ସାରିବା ଲାଗି ଠିକା କମ୍ପାନୀ ସହ ଏକାଧିକ ବାର ଆଲୋଚନା କରିଛୁ । ଏପରିକି ଜରିମାନା ବି କରାଯାଇଛି । ଶେଷ ନିଷ୍ପତ୍ତି ନେଇଛୁ, କମ୍ପାନୀ ମୁଖ୍ୟଙ୍କୁ ୭ ଦିନ ଭିତରେ ଡାକିବୁ । କାମ ନ କଲେ ସେମାନଙ୍କୁ ବ୍ଲାକ ଲିଷ୍ଟେଡ୍ କରାଯିବ । ଅନ୍ୟ କାହାରି ମାଧ୍ୟମରେ ଅସମ୍ପୂର୍ଣ୍ଣ ପ୍ରକଳ୍ପକୁ ବିଭାଗ ସାରିବ ବୋଲି କହିଛନ୍ତି ପଞ୍ଚାୟତିରାଜ ମନ୍ତ୍ରୀ । ପାନୀୟ ପ୍ରକଳ୍ପ ସମୟରେ ନ ସରିଲେ ଆଉ ସମୟ ବଢ଼ା ଯିବନି । ବରଂ ଆବଶ୍ୟକତା ସ୍ଥଳେ ଏଫ୍‌ଆଇଆର୍ ଦିଆଯିବ ବୋଲି କହିଛନ୍ତି ମନ୍ତ୍ରୀ ।

ଧିମା ଗତିରେ ପାନୀୟ ପ୍ରକଳ୍ପର କାର୍ଯ୍ୟ ଚାଲୁଥିବା ନେଇ ପ୍ରଶ୍ନ କରିଥିଲେ ବିଜେଡି ବିଧାୟକ ରମେଶ ବେହେରା । ଊତ୍ତର ରଖି ପାନୀୟ ଜଳ ସମସ୍ୟାକୁ ନେଇ ମନ୍ତ୍ରୀ ଉଦ୍‌ବେଗ ପ୍ରକାଶ କରିଥିଲେ । କହିଥିଲେ, ପ୍ରକଳ୍ପ ଧିମା ହେବାର କାରଣ ପୂର୍ବ ସରକାର । ଯେଉଁମାନେ ଚୁକ୍ତି ସ୍ଵାକ୍ଷର କରିଥିଲେ, ନୂଆ ସରକାର ଆସିବା ପରେ ଏହାର ସମୟ ସୀମା ପଳେଇଥିଲା ।

ବିଗତ ସରକାରରେ ପାଇପ୍ ଥିଲା, ପାଣି ନ ଥିଲା । ଏବେ ପ୍ରତି ଘରେ ଜଳ ନ ପହଞ୍ଚିଲେ କାମ ସମାପ୍ତ ହୋଇଛି ବୋଲି ଧରା ଯିବନି । ପାନୀୟ ପ୍ରକଳ୍ପ ଧିମେଇ ଥିବା ବିଭାଗ ଅବଗତ ଅଛି । ୨୦୨୫ ମାର୍ଚ୍ଚ ସୁଦ୍ଧା ୭୨ ପ୍ରତିଶତ ପ୍ରକଳ୍ପ ସରିବାର ଥିଲା, ୫୨ଟି ସରିଛି । ଜୁନ୍ ସୁଦ୍ଧା ୭୨ଟି ସାରିବାକୁ ଲକ୍ଷ୍ୟ ରଖିଛୁ । ୨୦୨୬ ସୁଦ୍ଧା ଆଉ ୪୦ଟି ପ୍ରକଳ୍ପ ସାରିବୁ । ପାହାଡ଼ିଆ ଅଞ୍ଚଳର ଲୋକ ଯେମିତି ପାଣି ପାଇବେ ସେ ନେଇ ବିଭାଗ କାମ କରୁଛି ।

ସେପଟେ ମହାନଦୀ ଅବବାହିକାରେ ମୋହନ ସରକାର ୭ଟି ବ୍ୟାରେଜ କରିବେ ବୋଲି ଗୃହରେ ପଞ୍ଚାୟତିରାଜ ମନ୍ତ୍ରୀ ସୂଚନା ଦେଇଛନ୍ତି । ଏଥିସହ ପାଣି ଆସିବା ନେଇ ଉଦୟପୁର ଠାରେ ଛତିଶଗଡ଼ ମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ଏବଂ ଉଭୟ ରାଜ୍ୟର କମିଶନର ବସି ଆଲୋଚନା କରିଥିବା କହିଛନ୍ତି ପଞ୍ଚାୟତିରାଜ ଓ ପାନୀୟ ଜଳ ମନ୍ତ୍ରୀ ।