କଟକ: ଆସନ୍ତା ୯ରେ ବାରବାଟୀରେ ଖେଳାଯିବ ଭାରତ-ଇଂଲଣ୍ଡ ମଧ୍ୟରେ ଦିନିକିଆ ମ୍ୟାଚ୍ । ଏଥିପାଇଁ ଓସିଏ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି । ଦିନିକିଆ ଦିବାରାତ୍ର ମ୍ୟାଚ୍ ଲାଗି ୫ଟି ସ୍ଥାନରେ ହେବ ଗାଡ଼ି ପାର୍କିଂ ବ୍ୟବସ୍ଥା । ୫ଟି ପାର୍କିଂ ପ୍ଲେସରରେ ୨୫ ହଜାର ଗାଡ଼ି ରଖିବା ଲାଗି ବ୍ୟବସ୍ଥା କରାଯିବ ବୋଲି ଓସିଏ ପକ୍ଷରୁ କୁହା ଯାଇଛି ।

ଗାଡ଼ି ପାର୍କିଂ ସହ ବାରବାଟୀ ଷ୍ଟାଡିୟମ୍ ପରିସରରେ ଦର୍ଶକଙ୍କୁ ଖାଦ୍ୟ ପାନୀୟ ବିକ୍ରି ଉପରେ ଓସିଏ ଆଲୋଚନା କରିଛି । ଉପଯୁକ୍ତ ମୂଲ୍ୟରେ ଖାଦ୍ୟ ପାନୀୟ ବିକ୍ରି ସହ ଖାଦ୍ୟର ମାନ ଉପରେ ନଜର ରଖିବାକୁ ୫ ଜଣ ଅଧିକାରୀଙ୍କ ଦାୟିତ୍ଵ ଦିଆଯାଇଛି ।

ଟିକେଟ ନ ପାଇ ଷ୍ଟାଡିୟମ୍‌ରେ ମ୍ୟାଚ୍ ଦେଖିବାକୁ ବଞ୍ଚିତ ହୋଇଥିବା କ୍ରିକେଟ୍ ପ୍ରେମୀଙ୍କ ଲାଗି ୩ଟି ଫ୍ୟାନ୍ ପାର୍କର ବ୍ୟବସ୍ଥା କରାଯାଉଛି । ତଳ ଓ ଉପର ବାଲିଯାତ୍ରା ପଡ଼ିଆରେ କ୍ରୀଡ଼ାପ୍ରେମୀ ବଡ଼ ଏଲଇଡି ଜରିଆରେ ଭାରତ-ଇଂଲଣ୍ଡ ମ୍ୟ।ଚର ଭରପୂର ମଜ୍ଜା ନେଇ ପାରିବେ ।

ଆଜି କେନ୍ଦ୍ରାଞ୍ଚଳ ରାଜସ୍ଵ ଆୟୁକ୍ତ ଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ବୈଠକରେ ଏ ସବୁ ନିଷ୍ପତ୍ତି ନିଆ ଯାଇଛି । କେନ୍ଦ୍ରାଞ୍ଚଳ ଆରଡିସି ବି. ପରମେଶ୍ଵରନଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ କଟକ ଜିଲ୍ଲାପାଳ, କଟକ ଡିସିପି, ଅତିରିକ୍ତ ପୋଲିସ କମିଶନର ଓ ଓସିଏ ପଦାଧିକାରୀ ଯୋଗ ଦେଇଥିଲେ । ମ୍ୟାଚ୍ ସୁପରିଚାଳନା ସହ ପରିମଳ, ପିଇବା ପାଣି ଉପରେ ଆଲୋଚନା ହୋଇଥିଲା ।

Argus News | argus news | Odisha Latest News, Breaking News, Trending News, Live TV