ଅନ୍ତର୍ଜାତୀୟ ମହିଳା ଦିବସ ଅବସରରେ ନାରୀ ଶକ୍ତିର ଉତ୍ସବ ମନାଉଛି ଭାରତ । ମହିଳାଙ୍କୁ ନିଜ ଅଧିକାର ପ୍ରତି ସଚେତନ କରିବାକୁ ଉତ୍ସାହର ସହ ପାଳିତ ହେଉଛି ମହିଳା ଦିବସ । ଭୁବନେଶ୍ବର ମହାନଗର ନିଗମ ପକ୍ଷରୁ ମହିଳା ଦିବସରେ ଆୟୋଜିତ ସମ୍ପୂର୍ଣ୍ଣା କାର୍ଯ୍ୟକ୍ରମରେ ନାରୀ ସମାଜକୁ ଦିଆଯାଇଛି ସତେତନତାର ସନ୍ଦେଶ । ହସ୍ତତନ୍ତ ଶାଢୀ ପିନ୍ଧି 500 ଶହରୁ ଅଧିକ ମହିଳା ମାଷ୍ଟର କ୍ୟାଣ୍ଟିନରୁ ବିଏମସି କାର୍ଯ୍ୟାଳୟ ପର୍ଯ୍ୟନ୍ତ ପଦଯାତ୍ରା କରି ସୂର୍ଯ୍ୟକ୍ଷେତ୍ର ଫାଉଣ୍ଡେସନ ଓ ହାଇଟେକ ହସ୍ପଟାଲ ପକ୍ଷରୁ ବ୍ରେଷ୍ଟ କ୍ୟାନସରକୁ ନେଇ ଦିଆଯାଇଛି ସଚେତନତାର ବାର୍ତ୍ତା । କାର୍ଯ୍ୟକ୍ରମରେ ଓଡ଼ିଶା ବିଧାନସଭା ବାଚସ୍ପତି ସୁରମା ପାଢୀ ମୁଖ୍ୟ ଅତିଥି ଭାବେ ଯୋଗଦେଇ ନାରୀମାନଙ୍କୁ ଉତ୍ସାହିତ କରିଥିଲେ। ସୂର୍ଯ୍ୟକ୍ଷେତ୍ର ଫାଉଣ୍ଡେସନ ଓ ହାଇଟେକ ହସ୍ପଟାଲ ପକ୍ଷରୁ ଆୟୋଜିତ ହୋଇଥିଲା ସମ୍ପୂର୍ଣ୍ଣା ସଚତନତା କାର୍ଯ୍ୟକ୍ରମ ।

ଅନ୍ତର୍ଜାତୀୟ ମହିଳା ଦିବସ ଉପଲକ୍ଷେ ପୁରୀରେ ଆୟୋଜିତ ହୋଇଛି ଓମେନ ଟ୍ୟାଲେଣ୍ଟ ସର୍ଚ୍ଚ । ପ୍ରତିଯୋଗିତା ମାଧ୍ୟମରେ ନାରୀଙ୍କ ମନୋବଳ ବୃଦ୍ଧି କରିବାକୁ ଅର୍ପଣ ଚାରିଟେବୁଲ ଟ୍ରଷ୍ଟ ପକ୍ଷରୁ କରାଯାଇଛି ପ୍ରଶଂସନୀୟ ଉଦ୍ୟମ । ସେହପରି କଟକ ଶ୍ରୀଶ୍ରୀ ବିଶ୍ବବିଦ୍ୟାଳୟ, ସତ୍ୟଭାମାପୁରରେ ହେ ବନ୍ଧୁ ବୁଦ୍ଧାଶ୍ରମ ସମେତ ରାଜ୍ୟର ପ୍ରତ୍ୟେକ ଜିଲ୍ଲାରେ ଅନୁଷ୍ଠିତ ହୋଇଛି ସ୍ବତନ୍ତ୍ର କାର୍ଯ୍ୟକ୍ରମ ।

ଅନ୍ତର୍ଜାତିକ ମହିଳା ଦିବସରେ ନୀରୀ ଶକ୍ତିକୁ ନମନ କରିଛନ୍ତି ପ୍ରଧାନମନ୍ତ୍ରୀ ମୋଦି । ଗୁଜରାଟର ନବସାରୀ ଜିଲ୍ଲାରେ ଆୟୋଜିତ ଲକ୍ଷପତି ଦିଦି କାର୍ଯ୍ୟକ୍ରମରେ ସାମିଲ ହୋଇ ୫ ଜଣ ଲକ୍ଷପତି ଦିଦିଙ୍କୁ ପ୍ରମାଣପତ୍ର ଦେଇ ସମ୍ମାନିତ କରିଛନ୍ତି ମୋଦି । କାର୍ଯ୍ୟକ୍ରମରେ ସୁରକ୍ଷା ଦାୟିତ୍ବରେ ନିୟୋଜିତ ହୋଇଥିଲେ କେବଳ ମହିଳା ସୁରକ୍ଷାକର୍ମୀ । ନାରୀଙ୍କ ପାଇଁ ସମର୍ପିତ ଦିନରେ ଓଡ଼ିଶାର ଆଣବିକ ବିଜ୍ଞାନୀ ଏଲିନା ମିଶ୍ରଙ୍କ ସମେତ 7 ଜଣ ମହିଳାଙ୍କୁ ନିଜ ସୋସିଆଲ ମିଡିଆ ହ୍ୟାଣ୍ଡେଲ ସମର୍ପିତ କରିଥିଲେ ମୋଦି । ଦେଶର ମହିଳାଙ୍କୁ ବିଜ୍ଞାନ କ୍ଷେତ୍ରକୁ ଆସିବା ଲାଗି ଆହ୍ୱାନ ଦେଇଛନ୍ତି ପିଏମ ମୋଦି ।

ଚଳିତବର୍ଷ ସମସ୍ତ ମହିଳା ଏବଂ ବାଳିକାମାନଙ୍କ ପାଇଁ ଅଧିକାର-ସମାନତା ଓ ସଶକ୍ତିକରଣ ଥିମରେ ପାଳିତ ହେଉଛି ଆନ୍ତର୍ଜାତିକ ମହିଳା ଦିବସ । ପ୍ରତ୍ୟେକ ମହିଳାଙ୍କୁ ସମାନ ଅଧିକାର, ଶକ୍ତି ଏବଂ ସୁଯୋଗ ପ୍ରଦାନ କରିବାକୁ ଦିଆଯାଇଛି ବାର୍ତ୍ତା ।