କଳାହାଣ୍ଡି ଜିଲ୍ଲାର ଦୁର୍ଗମ ଆଦିବାସୀ ଅଧ୍ୟୁଷିତ ଅଞ୍ଚଳ ଥୁଆମୂଳ ରାମପୁର । କିନ୍ତୁ ଏହି ବ୍ଲକର ଇନ୍ଦ୍ରାଵତୀ ବୁଡି ଅଞ୍ଚଳବାସୀ ଏବେବି ନବରଙ୍ଗପୁର ଜିଲ୍ଲା ଉପରେ ଭରଷା କରନ୍ତି । ପାଦେପାଦେରେ ବିପଦ ଥିବା ଜାଣି ମଧ୍ୟ କୌଣସି କାମ ପଡ଼ିଲେ ଜଳଭଣ୍ଡାରରେ ଡ଼ଙ୍ଗା ପାର ହେଇ ଯାଉଥିବା ଦୃଶ୍ୟ ସାମ୍ନାକୁ ଆସେ । ବ୍ଲକ ମୁଖ୍ୟାଳୟକୁ ରାସ୍ତା ତ ଦୂରର କଥା ଭାଷା ମଧ୍ୟ ଭୁଲିଗଲେଣି ଏଠାକାର ଆଦିବାସୀ । ପରିତାପର ବିଷୟ କଳାହାଣ୍ଡି ଜିଲ୍ଲାର ସ୍ଵତନ୍ତ୍ର ଭାଷା ଥିବା ବେଳେ ଏହି ବୁଡି ଅଞ୍ଚଳବାସୀ ନବରଙ୍ଗପୁର, କୋରାପୁଟର ଭାଷା କହୁଛନ୍ତି । କେବଳ ଆଧାରକାର୍ଡ ହିଁ ଥୁଆମୂଳ ରାମପୁରବ୍ଲକ ବାସୀଙ୍କ ପରିଚୟ ଦେଉଛି ।

ଥୁଆମୂଳ ରାମପୁର ବ୍ଲକ ମୁଖ୍ୟାଳୟକୁ ଆସିବାକୁ ହେଲେ ଏହି ଅଞ୍ଚଳବାସୀଙ୍କୁ ୬୦ ରୁ ୭୦ କିଲୋମିଟର ଆସିବାକୁ ପଡେ । ଇନ୍ଦ୍ରାବତୀ ବୁଡି ଅଞ୍ଚଳରେ ନା ଡାକ୍ତରଖାନାର ସୁବିଧା ଅଛି ନା ବଜାର ଵ୍ୟଵସ୍ଥାର ସୁବିଧା ଅଛି । ସରକାର ବଦଳୁଛନ୍ତି, ରାଜନେତା ବଦଳୁଛନ୍ତି,ନିର୍ବାଚିତ ପ୍ରତିନିଧି ମଧ୍ୟ ବଦଳୁଛନ୍ତି ହେଲେ ବଦଳି ପାରୁନାହିଁ ବୁଡି ଅଞ୍ଚଳବାସୀଙ୍କ ଭାଗ୍ୟ ।

ସରକାରୀ ସ୍ତରରେ ମଧ୍ୟ ଏହି ଜଳବନ୍ଦୀ ଅଞ୍ଚଳକୁ ଅଣଦେଖା କରାଯାଉଛି । କୌଣସି ରାଜନେତା କି ପ୍ରଶାସନ ଯାଉନଥିବାରୁ ଧୀରେ ଧୀରେ ବଦଳିବାରେ ଲାଗିଛନ୍ତି ବୁଡି ଅଞ୍ଚଳର ଆଦିବାସୀ । ୨୪ ବର୍ଷର ସ୍ଥାୟୀ ବିଜେଡି ସରକାର ବୁଡି ଅଞ୍ଚଳବାସୀଙ୍କ ଦୁଃଖକୁ ବୁଝିପାରିଲା ନାହିଁ । ବର୍ତ୍ତମାନର ନୂଆ ସରକାର ଇନ୍ଦ୍ରାବତୀ ବୁଡି ଅଞ୍ଚଳବାସୀଙ୍କ ଦୁଃଖ ବୁଝିପାରିବେ ବୋଲି ଆଶା ରଖିଛନ୍ତି ଅଞ୍ଚଳବାସୀ।