ଯାଜପୁର ପରେ ଭଦ୍ରକ ଜିଲ୍ଲାରେ ଝାଡ଼ାବାନ୍ତି ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି । ପ୍ରଥମେ ଭଣ୍ଡାରିପୋଖରୀ ଏବେ ଧାମନଗରରେ ଝାଡ଼ାବାନ୍ତି ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି । ଭଣ୍ଡାରିପୋଖରୀ ବ୍ଲକର ଷୋଳମପୁର ପଞ୍ଚାୟତର 3 ଟି ଗାଁରେ 15 ଜଣରୁ ଅଧିକ ଲୋକେ ଚିକିତ୍ସିତ ହୋଇ ଘରକୁ ଫେରୁଛନ୍ତି । ଧାମନଗରର ବିଭିନ୍ନ ପଞ୍ଚାୟତର 15 ଜଣରୁ ଅଧିକ ଆକ୍ରାନ୍ତ ହୋଇ ଧାମନଗର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସିତ ହୋଇଛନ୍ତି । 10 ଜଣ ଚିକିତ୍ସିତ ହୋଇ ଘରକୁ ଫେରିଥିବା ବେଳେ 5 ଜଣ ଧାମନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି ।

ପରିସ୍ଥିତିର ମୁକାବିଲା ଲାଗି ସ୍ବତନ୍ତ୍ର ବ୍ୟବସ୍ଥା କରାଯାଇଛି । ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ସ୍ୱାସ୍ଥ୍ୟ ବିଭାଗ ଓ ପୌର ପ୍ରଶାସନ ପକ୍ଷରୁ ଭଦ୍ରକ ସହରରେ ମୁଖ୍ୟ ଚିକିତ୍ସାଳୟରେ ଥିବା ହୋଟେଲ ମାନଙ୍କ ଉପରେ ଚଢ଼ାଉ କରାଯାଇଛି । ଚଢ଼ାଉ ସମୟରେ ଖାଦ୍ୟ ଓ ପାନୀୟ ଜଳର ମାନ ଯାଞ୍ଜ କରାଯାଇଛି ।

ସେପଟେ ଅବହେଳା ପାଇଁ 3 ଟି ଦୋକାନରେ 5 ହଜାର ଲେଖା ଫାଇନ କଟା ଯାଇଛି । ଉଠା ଠେଲା ଦୋକାନୀ ମାନଙ୍କ ଉପରେ ବି ଚଢ଼ାଉ କରାଯାଇଛି । ଜିଲ୍ଲାରେ ମୋଟ 35 ଜଣ ଆକ୍ରାନ୍ତ ଚି଼ହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ 30 ଜଣ ସୁସ୍ଥ ହୋଇଥିବା ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି । ସେହିପରି ଜିଲ୍ଲା ପ୍ରଶାସନ ପକ୍ଷରୁ ଜଳଖିଆ ଦୋକାନ ଉପରେ ଚଢ଼ାଉ କରିବା ସହ ଫାଇନ କଟାଯାଉଛି । ଜିଲ୍ଲାବାସୀ ମାନେ ବାହାର ଖାଦ୍ୟକୁ ବର୍ଜନ କରନ୍ତୁ, ସମସ୍ତେ ପାଣିକୁ ଫୁଟାଇ ପିଅନ୍ତୁ ବୋଲି କହିଛନ୍ତି ଉପଜିଲ୍ଲାପାଳ ।

ଯାଜପୁରରେ ହଇଜା ବ୍ୟାପିବା ପ୍ରସଙ୍ଗରେ ସ୍ୱାସ୍ଥ୍ୟ ସଚିବଙ୍କ ବଡ଼ ସୂଚନା । ପାଣି ମାଧ୍ୟମରେ ବ୍ୟାପୁଛି ସଂକ୍ରମଣ, ପାଣି ହେଉଛି ମୁଖ୍ୟ କାରଣ । ହଇଜା ସଂକ୍ରମଣକୁ ଚେକ୍‌ ଦେବାକୁ ଆଜିଠୁ ଷ୍ଟପ ଡାଇରିଆ ଅଭିଯାନ ଆରମ୍ଭ । ୩୦ ଜିଲ୍ଲା ପାଇଁ ଦିଆଯାଇଛି ସମାନ ନିର୍ଦ୍ଦେଶନାମା । ଯାଜପୁରରେ ୭ଜଣଙ୍କ ହେଲାଣି ମୃତ୍ୟୁ । ... ଗତକାଲି ୨୪୪ ରହିଥିବା ବେଳେ ଆଜି ଜ଼ିଲ୍ଲାରେ ୨୫୯ ରୋଗୀ ଚିକିତ୍ସିତ ହୋଉଛନ୍ତି ।

ଆଜି ଦିନକରେ ଜ଼ିଲ୍ଲାରେ ୧୫ ଜଣ ନୂଆ ରୋଗୀ ଚି଼ହ୍ନଟ ହୋଇଛନ୍ତି। ଗତକାଲି ୨ ଜଣଙ୍କ ଝାଡା ବାନ୍ତି ରେ ମୃତ୍ୟୁ ଘଟିଥିଲା ଏଯାଏଁ ୭ଜଣଙ୍କ ମୃତ୍ୟୁ ହୋଇଛି । ୧୪ ଜଣିଆ କେନ୍ଦ୍ରୀୟ ଟିମ ଗତ କାଲି ଠାରୁ ଯାଜପୁର ରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ବର୍ତ୍ତମାନ ସୁଦ୍ଧା ୧୧ଟି ନମୂନା ହଇଜା ପଜିଟିଭ୍ ଚିହ୍ନଟ ହୋଇଛି । ସ୍ଥିତିକୁ ଦେଖି ଯାଜପୁର ବରିରେ ମଧ୍ୟ ବନ୍ଦ ହୋଇଛି ସମସ୍ତ ହୋଟେଲ, ଢାବା । ସେହିପରି ଷ୍ଟ୍ରିଟ୍ ଫୁଡ ଗୁପଚୁପ, ଚାଟ, ଆଇସକ୍ରିମ କାରଖାନା, ଜଳଖିଆ ଦୋକାନ, ପାଣି ପାଉଚ କାରଖାନା ଏବଂ ପାଣି ପ୍ୟାକେଜିଙ୍ଗ କାରଖାନା ଦୁଇ ସପ୍ତାହ ବନ୍ଦ ପାଇଁ ନିର୍ଦ୍ଦେଶ ଦେଇଛନ୍ତି ବରୀ ତହସିଲଦାର ।