ସୁନ୍ଦରଗଡ଼ ବିସ୍ଫୋରକ ସାମଗ୍ରୀ ଲୁଟ୍‌ ଘଟଣାରେ ଚାଲିଛି ଛାନଭିନ । ନକ୍ସଲ ଲୁଟ କରି ନେଇଥିବା ବିସ୍ଫୋରକ ସାମଗ୍ରୀ ଗୋଦାମର ଛାନଭିନ୍ ଆରମ୍ଭ କରିଛି SIT । ବଡ଼ଗାଁ ଇତମାରେ ପହଞ୍ଚି ତନାଘନା କରିଛି SIT ଟିମ୍ । ଅନ୍ୟପଟେ ଏହି ଲୁଟ୍‌ ଘଟଣାକୁ ନେଇ ଗୃହବିଭାଗ ସଚିବ ବୈଠକ କରିଛନ୍ତି । ପୋଲିସ ଡିଜିଙ୍କ ସହ ବନ ବିଭାଗର ବରିଷ୍ଠ ଅଧିକାରୀଙ୍କ ସହ ମଧ୍ୟ ଆଲୋଚନା ହୋଇଛି ।

ଲୁଟ ପଛରେ ମାଓବାଦୀଙ୍କ ଭୂମିକା ଥିବାରୁ କିଛି କେନ୍ଦ୍ରୀୟ ଫୋର୍ସ ମଧ୍ୟ ସେହି ଅଞ୍ଚଳ ପାଇଁ ମଗାଯାଇଛି । ଏଥିସହ ଝାଡ଼ଖଣ୍ଡ ପୋଲିସ ସହ ମିଳିତ ଭାବେ ମଧ୍ୟ ସମନ୍ବୟ ରଖି ବିସ୍ଫୋରକ ଜବତ ପାଇଁ ପ୍ରୟାସ ଚାଲିଛି । କିଛି ସାମଗ୍ରୀ ମଧ୍ୟ ଠାବ କରାଯାଇଛି । CRPF ଓ ଅନ୍ୟାନ୍ୟ କେନ୍ଦ୍ରୀୟ ସୁରକ୍ଷା ବଳ ଏହି ଅପରେସନରେ ସାମିଲ ଅଛନ୍ତି । ସମସ୍ତ ବିସ୍ଫୋରକ ସାମଗ୍ରୀ ଜବତ ହେବା ପର୍ଯ୍ୟନ୍ତ ଅପରେସନ ଚାଲିବ ।

ବିସ୍ଫୋରକ ସାମଗ୍ରୀ ଠାବ ବେଳେ ମାଓ ଆକ୍ରମଣର ଭୟ ରହିଥିବାରୁ କିପରି ସୁରୁଖୁରୁରେ ଅପରେସନ ହେବ ସେନେଇ ପ୍ରସ୍ତୁତି କରାଯାଉଛି । ବନ ବିଭାଗର ମ୍ୟାପ ଆଧାରରେ କେଉଁ ଅଞ୍ଚଳ ଦୁର୍ଗମ ରହିବ ଓ କିପରି ସେହି ଅଞ୍ଚଳରେ ଅପରେସନ ହୋଇପାରିବ ସେନେ ମଧ୍ୟ ଆଲୋଚନା କରାଯାଉଛି । ବିସ୍ଫୋରକ ସାମଗ୍ରୀ ଲୁଟ ଘଟଣାରେ NIAର ଏକ ଟିମ୍ ଆସି ତନାଘନା କରି ଯାଇଛନ୍ତି ।