ପୂର୍ବ ସରକାର ଭଳି କେବଳ ଏମଓୟୁ ନୁହେଁ, ଶିଳ୍ପ ପ୍ରତିଷ୍ଠା ଉପରେ ଫୋକସ । ପ୍ରତିଶ୍ରୁତି ନୁହେଁ, କାମରେ କରି ଦେଖାଇବା ଉପରେ ଗୁରୁତ୍ଵ । ବିଜେପି ସରକାରର ବର୍ଷ ପୂର୍ତ୍ତି ଆଗରୁ ଶିଳ୍ପ ମୁଖ୍ୟ ଓ ପ୍ରତିନିଧିଙ୍କ ସହ ଆଲୋଚନା କରି ଏଭଳି ବାର୍ତ୍ତା ଦେଇଛନ୍ତି ମୁଖ୍ୟମନ୍ତ୍ରୀ । ଆଗାମୀ ଦିନ ପାଇଁ ସରକାରଙ୍କ ଯୋଜନା ବାବଦରେ କଲେ ଚର୍ଚ୍ଚା । ସରକାରକୁ ଆସିବାର ବର୍ଷେ ଭିତରେ ଶିଳ୍ପ କ୍ଷେତ୍ରରେ ଓଡ଼ିଶା ହାସଲ କରିଥିବା ସଫଳତାର ରିପୋର୍ଟ ଦେଲେ ମୋହନ । ବର୍ଷକ ମଧ୍ୟରେ 206ଟି ଶିଳ୍ପକୁ ଅନୁମୋଦନ ଦେଇଛନ୍ତି ରାଜ୍ୟ ସରକାର । ଯେଉଁଥିରେ କି 4 ଲକ୍ଷ 50 ହଜାର କୋଟିର ନିବେଶ ଆସିବା ସହ ତିଆରି ହୋଇଛି 2 ଲକ୍ଷ 90 ହଜାର ନିଯୁକ୍ତି ସୁଯୋଗ । ଯାହା ବିଜେଡ଼ି ଅମଳର 5 ବର୍ଷରେ ହୋଇନଥିଲା, ବର୍ଷେ ଭିତରେ ତା ଠାରୁ ଦୁଇଗୁଣ କରି ଦେଖାଇଲା ବିଜେପି ସରକାର । ତେବେ ଉତ୍କର୍ଷ ଓଡ଼ିଶା ମେକ୍ ଇନ୍ ଓଡ଼ିଶା କନକ୍ଲେଭ ହେବାର ମାତ୍ର 4 ମାସ ଭିତରେ ହେଲାଣି 56ଟି ଶିଳ୍ପର ଗ୍ରାଉଣ୍ଡ ବ୍ରେକିଂ । ଯାହାଦ୍ବାରା ରାଜ୍ୟକୁ 1 ଲକ୍ଷ 78 ହଜାର କୋଟିର ପୁଞ୍ଜିନିବେଶ ଆସିବା ସହ ନିଯୁକ୍ତି ପାଇବେ 1 ଲକ୍ଷ 10 ହଜାର ଯୁବକ ଯୁବତୀ ।

କେବଳ ଏତିକି ନୁହେଁ, ଏହା ଭିତରେ 150ରୁ ଅଧିକ ଏମଓୟୁ ସ୍ବାକ୍ଷର ହୋଇଥିବା ବେଳେ ପ୍ରାୟ 17 ଲକ୍ଷ କୋଟି ଟଙ୍କାର ପୁଞ୍ଜିନିବେଶ ପ୍ରସ୍ତାବ ଆସିଛି । ଯାହାଦ୍ବାରା 13 ଲକ୍ଷ ନିଯୁକ୍ତିର ସୁଯୋଗ ମଧ୍ୟ ସୃଷ୍ଟି ହେବ ।

2036 ସମୃଦ୍ଧ ଓଡିଶା ପାଇଁ ପକାଯାଉଛି ଭିତ୍ତି । ଶିଳ୍ପ ଭିତ୍ତିଭୂମି, ରେଳ, ରୋଡ଼ ଭିତ୍ତିଭୂମି, ରାଜ୍ୟରେ ଥିବା 3 ବନ୍ଦରର କ୍ଷମତା ବୃଦ୍ଧି ଏବଂ ଆଉ 3ଟି ବନ୍ଦର ବିକଶିତ କରିବା ପାଇଁ ଆଗକୁ ପଦକ୍ଷେପ ନିଆଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଏହାସହ କିଛି ଜେଟି ଉନ୍ନତି ପାଇଁ ମଧ୍ୟ ପଦକ୍ଷେପ ନିଆଯିବ । ଆଗାମୀ 5 ବର୍ଷ ଭିତରେ ଲକ୍ଷ୍ୟ ଠାରୁ ବି ଅଧିକ କାମ ହେବ । 500 ବିଲିୟନ ଡଲାରର ଅର୍ଥନୀତି ହେବାର ଲକ୍ଷ୍ୟ ରଖି ପ୍ରଗତି ପଥେ ଆଗେଇ ଯାଉଛି ଓଡ଼ିଶା ।।