ଓଡ଼ିଶାର ସବୁଠୁ ସ୍ୱଚ୍ଛ ସହର ଆସିକା। ୨୦୨୪-୨୫ ସ୍ୱଚ୍ଛ ସର୍ବେକ୍ଷଣରେ ସର୍ବଭାରତୀୟସ୍ତରରେ ମିଳିଲା ଟାଇଟଲ୍ । ସ୍ବଚ୍ଛତାକୁ ନେଇ ଦେଶରେ ଆସିକା ଦ୍ବିତୀୟ ସ୍ଥାନ ଅଧିକାର କରିଥିବାବେଳେ ଓଡ଼ିଶାରେ ପ୍ରଥମ ସ୍ଥାନ ଅଧିକାର କରିଛି । ଗଞ୍ଜାମ ଜିଲ୍ଲାର ଆସିକା ବିଜ୍ଞାପିତ ଅଞ୍ଚଳ ପରିଷଦ ୧୮ ଟି ୱାର୍ଡକୁ ନେଇ ଗଠନ ହୋଇଛି l ସହରରେ ପ୍ରାୟ ୩୦ ହାଜର ରୁ ଉର୍ଦ୍ଧ୍ବ ଜନସଂଖ୍ୟା ରହିଛି। ଆସିକାକୁ ସ୍ୱଚ୍ଛ ସହର କରିବା ପାଇଁ ନଗରପାଳିକାଙ୍କ ତତ୍ତ୍ବାବଧାନରେ ସ୍ୱଚ୍ଛସାଥୀ ସଫେଇ କର୍ମଚାରୀମାନେ ଦୀର୍ଘ ଦୁଇ ବର୍ଷ ଧରି ପରିଶ୍ରମ କରିଥିଲେ l ପରିମଳ ବ୍ୟବସ୍ଥାଠୁ ଆରମ୍ଭ କରି ଡ୍ରେନେଜ ସଫା, ସହରକୁ ଆବର୍ଜନା ମୁକ୍ତ ପାଇଁ ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ପଦକ୍ଷେପ ନିଆଯାଇଥିଲା।

ଏଥିପାଇଁ ଅଞ୍ଚଳବାସୀମାନେ ମଧ୍ୟ ସମ୍ପୂର୍ଣ୍ଣ ସହଯୋଗ କରିଥିଲେ l ଜାଗା ଜାଗାରେ ସୁନ୍ଦର ସୁନ୍ଦର ପ୍ରତିମୂର୍ତ୍ତି ସହ ଛୋଟ ଛୋଟ ପାର୍କ ନିର୍ମାଣ କରାଯାଇଥିଲା । ତା ସାଙ୍ଗକୁ ସହର ସାରା ଆଲୋକୀକରଣ ମଧ୍ୟ କରାଯାଇଥିଲା। ଯାହାକି ଆସିକାର ଶୋଭା ବଢାଇବା ସହ ଦେଶରେ ସ୍ବଚ୍ଛ ସହର ଭାବେ ରାଷ୍ଟ୍ରପତିଙ୍କଠୁ ପୁରସ୍କୃତ ହୋଇଛି। ନୂଆଦିଲ୍ଲୀ ବିଜ୍ଞାନ ଭବନରେ ଆୟୋଜିତ ଏକ କାର୍ଯ୍ୟକ୍ରମରେ ରାଷ୍ଟ୍ରପତିଙ୍କ ଦ୍ବାରା ପୁରସ୍କୃତ ହୋଇଛି ଆସିକା l ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର, ଏନ୍‌ଏସି ଅଧ୍ୟକ୍ଷା ବିନେତା ସ୍ୱାଇଁ ଓ ଏନ୍‌ଏସି କାର୍ଯ୍ୟନିର୍ବାହୀ ଅଧିକାରୀ ରାଜେଶ ମହାପାତ୍ର ରାଷ୍ଟ୍ରପତିଙ୍କଠାରୁ ଏହି ପୁରସ୍କାର ଗ୍ରହଣ କରିଛନ୍ତି।

ତେବେ ଆସିକା ସର୍ବ ଭାରତୀୟ ସ୍ତରରେ ପୁରସ୍କୃତ ହୋଇ ଫେରିବା ପରେ ଗତ କାଲି ଏକ ସ୍ୱାଗତ ସମ୍ବର୍ଦ୍ଧନା ସଭା କରାଯାଇଥିଲେ l ସଭାରେ ଆସିକା ବିଧାୟକ ସରୋଜ ପାଢ଼ୀ ଯୋଗ ଦେଇ ଆସିକାକୁ ସ୍ୱଚ୍ଛ ରଖିବା ପଛରେ ଯେଉଁ ସବୁ ସ୍ୱଚ୍ଛସାଥୀ ଓ ସଫେଇ କର୍ମଚାରି ମାନଙ୍କ ହାତ ରହିଛି ସେମାନଙ୍କୁ ସମ୍ବର୍ଦ୍ଧନା ଜଣାଇଥିଲେ l ଏହି ପରିପ୍ରେକ୍ଷୀରେ ଆସିକାର ବିଭିନ୍ନ ଅନୁଷ୍ଠାନ ମାନେ ମଧ୍ୟ ବିଜ୍ଞାପିତ ଅଞ୍ଚଳ ପରିଷଦ ଅଧ୍ୟକ୍ଷା ବିନିତା ସ୍ବାଇଁ ଓ କାର୍ଯ୍ୟ ନିର୍ବାହୀ ଅଧିକାରୀ ରାଜେଶ ମହାପାତ୍ରଙ୍କୁ ସ୍ଵାଗତ ସମ୍ବର୍ଦ୍ଧନା ଜଣାଇଥିଲେ l ତେବେ ଆଗାମୀ ଦିନରେ ମଧ୍ୟ ଆସିକାର ଏହି ସ୍ବଚ୍ଛତା ବଜାଇ ରହିବା ସହ ଆଗାମୀ ବର୍ଷରେ ଆସିକାକୁ ସର୍ବ ଭାରତୀୟ ସ୍ତରରେ ପ୍ରଥମ ସ୍ୱଚ୍ଛ ଓ ସୁନ୍ଦର ସହର କରିବାକୁ ଲକ୍ଷ୍ୟ ରଖାଯାଇଛି।