ଭୁବନେଶ୍ଵର: କୋଟି ଓଡ଼ିଆଙ୍କ ମଉଡ଼ ମଣି, ଜଗତର ନାଥ ଶ୍ରୀଜଗନ୍ନାଥ । ଓଡ଼ିଆଙ୍କ ଆରାଧ୍ୟ ଦେବତା, ପ୍ରାଣର ଠାକୁର । ଯାହାକୁ ଦେଖି ଦେଲେ ମନ ଭରି ଯାଏ, ପେଟ ପୁରି ଯାଏ । ସେହି ଜଗତ ନିୟନ୍ତାଙ୍କୁ ଅପମାନିତ କରାଯାଇଛି । କନ୍ଧମାଳର ଏକ ସ୍ଵେଚ୍ଛାସେବୀ ସଂଗଠନରେ କାମ କରୁଥିବା ଇଟାଲିର ଜଣେ ମହିଳା ତାଙ୍କ ଜଂଘରେ ଜଗନ୍ନାଥଙ୍କ ଟାଟୁ ଆଙ୍କିଛନ୍ତି । ଯାହାକୁ ନେଇ ସୃଷ୍ଟି ହୋଇଛି ବିବାଦ ।

ସୂଚନା ଅନୁସାରେ, ସହିଦ ନଗର ଅଞ୍ଚଳରେ ରକି ଟାଟୁ ଷ୍ଟୁଡିଓରେ ବିଦେଶିନୀ ଜଣଙ୍କ ତାଙ୍କ ଜଂଘରେ ଆଙ୍କିଛନ୍ତି ଜଗନ୍ନାଥଙ୍କ ଟାଟୁ । ଯାହା କୋଟି କୋଟି ଓଡ଼ିଆ, ଜଗନ୍ନାଥପ୍ରେମୀଙ୍କୁ ଆଘାତ ଦେଇଛି । ଯେଉଁ ଠାକୁରଙ୍କୁ ପ୍ରତିଟି ଓଡ଼ିଆ ପ୍ରାଣଭରି ଭଲ ପାଆନ୍ତି । ଆଖି ବୁଜିଦେଲେ, ଯାହାଙ୍କ ଛବି ଭାସି ଆସେ । ତାଙ୍କୁ ଜଂଘରେ ଟାଟୁ କରି ପୁଣି ହ୍ଵାଟ୍ସଆପ୍‌ ଷ୍ଟାଟସ୍‌ରେ ରଖା ଯାଇଛି ।

ବିଦେଶିନୀଙ୍କ ଏଭଳି ଟାଟୁ ଓ ଟାଟୁ ଆଙ୍କିଥିବା ରକି ଟାଟୁର ଔଦ୍ଧତାମିକୁ ଚାରି ଆଡ଼ୁ ପ୍ରବଳ ବିରୋଧ ହେଉଛି । ସହିଦ ନଗର ଥାନାରେ ଟାଟୁ କରିଥିବା ବିଦେଶିନୀ ଏବଂ ରକି ଟାଟୁ ନାଁରେ ଏତଲା ଦେଇଛନ୍ତି ଜଗନ୍ନାଥପ୍ରେମୀ । ତେବେ ଘଟଣା ପ୍ରଘଟ ହେବା ପରେ ଭିଡିଓ କରି କ୍ଷମା ମାଗିଛନ୍ତି ରକି ଟାଟୁର ମାଲିକ ।

ମିଳିଥିବା ସୂଚନା ଅନୁସାରେ, ଜଂଘରେ ଟାଟୁ ଆଙ୍କିଥିବା ବିଦେଶିନୀ ଜଣଙ୍କ ଇଟାଲିର ବାସିନ୍ଦା । ସେ ହିନ୍ଦୁ ଧର୍ମାବଲମ୍ବୀ ମଧ୍ୟ ନୁହନ୍ତି । ବିଦେଶିନୀ ଜଣଙ୍କ କନ୍ଧମାଳର ଏକ ସ୍ଵେଚ୍ଛାସେବୀ ସଂଗଠନରେ କାମ କରୁଥିବା ଜଣାପଡ଼ିଛି । ତେବେ କେଉଁ ଉଦ୍ଦେଶ୍ୟ ନେଇ ବିଦେଶିନୀ ତାଙ୍କ ଜଂଘରେ ଶ୍ରୀଜଗନ୍ନାଥ ଟାଟୁ କଲେ ? ଟାଟୁ ଚିତ୍ରଣ କରିଥିବା ରକି ଟାଟୁ କଣ ଜାଣି ପାରିଲାନି ଜଗତର ନାଥଙ୍କୁ ଜଂଘରେ ଆଙ୍କିବା କେତେ ଦୂର ଯଥାର୍ଥ । ଏବେ ବିଦେଶିନୀ ଓ ରକି ଟାଟୁଙ୍କୁ ଗିରଫ କରିବାକୁ ଚାରିଆଡ଼ୁ ଦାବି ହେଉଛି ।

Argus News | argus news | Odisha Latest News, Breaking News, Trending News, Live TV