ଧର୍ମଶାଳା (ଯାଜପୁର): ଭିତରୁ କବାଟ ବନ୍ଦ ଥିଲା । ଯେତେ ଡାକିଲେ ବି ସ୍ଵାମୀ, ସ୍ତ୍ରୀ କେହି ଶୁଣିନଥିଲେ । ପରିବାର ଲୋକଙ୍କ ମନରେ ସନ୍ଦହେ ହେଲା । ଘରର କବାଟ ଭାଙ୍ଗିବା ପରେ ସମସ୍ତଙ୍କ ଗୋଡ଼଼ ତଳୁ ମାଟି ଖସିଗଲା । କାରଣ ସେତେବେଳକୁ ସବୁ ସରି ଯାଇଥିଲା । ଦୁହେଁ ଦୁହିଁଙ୍କ ହାତ ଧରାଧରି ହୋଇ ଫ୍ୟାନରେ ଝୁଲି ପଡ଼ିଥିଲେ ।

ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଜିଲ୍ଲା ଜେନାପୁର ଥାନା ମଧୁପୁରଗଡ଼ ପଞ୍ଚାୟତର କୁକୁଡ଼ାଖାଳେଇ ଗାଁରେ । ଗାଁର ବାବୁଲା ମଲିକଙ୍କ ପୁଅ ଜଜ ମଲିକ ଓ ବୋହୂ ଝରଣା ମଲିକ ଏଭଳି ଭାବେ ଜୀବନ ହାରି ଦେଇଛନ୍ତି । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।

ଏଥିସହ ପଢ଼ନ୍ତୁ: ରାଜଧାନୀରେ ଛାତ୍ରୀଙ୍କୁ ୫ ଘଣ୍ଟା ଅପହରଣ; ବାଇକ୍‌ରେ ଆସି ଉଠାଇନେଲେ ଦୁର୍ବୃତ୍ତ

ତେବେ ସ୍ଵାମୀ, ସ୍ତ୍ରୀ କାହିଁକି ଜୀବନ ହାରିଲେ ? ଆତ୍ମହତ୍ୟାର କାରଣ ପାରିବାରିକ କଳହ ନା ରହିଛି ଆଉ କିଛି ରହସ୍ୟ ? ଏ ଦିଗରେ ପୋଲିସ ଖୋଳତାଡ଼ ଆରମ୍ଭ କରିଛି । ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ବାବୁଲା ମଲିକଙ୍କ ପରିବାରରେ ଗତ କିଛିଦିନ ହେବ କଳହ ଲାଗି ରହିଥିଲା । ଯାହାକୁ ନେଇ ଜଜ ଓ ତାଙ୍କ ସ୍ତ୍ରୀ ଝରଣା ଆତ୍ମହତ୍ୟା କରିଥାଇପାରନ୍ତି ବୋଲି ପୋଲିସ ସନ୍ଦେହ କରୁଛି ।

ସୂଚନା ଅନୁସାରେ, ଗାଁରେ ଅଷ୍ଟପ୍ରହରୀ ନାମଯଜ୍ଞ ଚାଲୁଥିବା ବେଳେ ସୋମବାର ରାତି ପ୍ରାୟ ସାଢେ ୯ଟାରେ ଜଜ୍ ଓ ଝରଣା ଯାଇ ପୂଜାର୍ଚ୍ଚନା କରି ଘରକୁ ଫେରିଥିଲେ । ଘରକୁ ଫେରିବା ପରେ ସ୍ଵାମୀ, ସ୍ତ୍ରୀ ଉଭୟ ଏକାଠି ଖାଇବା ପରେ କବାଟ ବନ୍ଦ କରି ନିଜ କୋଠରୀକୁ ଯାଇଥିଲେ ।

ଏଥିସହ ପଢ଼ନ୍ତୁ: ଅଷ୍ଟମ ଶ୍ରେଣୀ ଛାତ୍ରୀଙ୍କୁ ନୂଆ ଜୀବନ ଦେଲା ମଲା କୁକୁର; ନଦୀକୁ ଡେଇଁ ଜୀବନ ହାରିବାକୁ କରୁଥିଲେ ଉଦ୍ୟମ

କିଛି ସମୟ ପରେ ବାପା ବାବୁଲା ପୁଅ ଜଜଙ୍କୁ ଅଷ୍ଟପ୍ରହରୀକୁ ଯିବା ଲାଗି ଡାକିଥିଲେ । ହେଲେ ଭିତରୁ କବାଟ ବନ୍ଦ ଥିବାବେଳେ କେହି କିଛି ଶୁଣିନଥିଲେ । ଅଘଟଣ ସନ୍ଦେହ କରି ପରିବାର ଲୋକ କବାଟ ଭାଙ୍ଗିଥିଲେ । ଆଉ କବାଟ ଭାଙ୍ଗିବା ବେଳକୁ କିଛି ନଥିଲା ।

ସେତେବେଳକୁ ସ୍ଵାମୀ, ସ୍ତ୍ରୀ ଉଭୟ ଫ୍ୟାନରେ ଝୁଲୁଥିବା ଦେଖିବାକୁ ମିଳିଥିଲା । ଦମ୍ପତିଙ୍କ ଉଦ୍ଧାର କରି ପରିବାର ଲୋକେ ଧର୍ମଶାଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ନେଇଥିଲେ । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି ।