ଯାଜପୁର: ଏକା ସଙ୍ଗେ ଚାଲିଗଲେ ନାତୁଣୀ ଓ ଜେଜେ । ପ୍ରଥମେ ନାତୁଣୀ ଆଉ ତା'ପରେ ଜେଜେଙ୍କ ଦେହାନ୍ତ । ମାତ୍ର କେଇ ଘଣ୍ଟାରେ ଘରୁ ଉଠିଲା ୨ କୋକେଇ । ଏଭଳି ଅଭାବନୀୟ ଘଟଣା ଘଟିଛି ଯାଜପୁର ଜିଲ୍ଲା ବାଲିଚନ୍ଦ୍ରପୁର ଥାନା ଗୋବଣ୍ଡିଆ ଗାଁରେ । ସର୍ପାଘାତରେ ନାତୁଣୀର ମୃତ୍ୟୁ ଖବର ଶୁଣି ଜେଜେଙ୍କ ପ୍ରାଣ ଚାଲି ଯାଇଛି ।

ଖବର ଅନୁସାରେ, ଗୋବଣ୍ଡିଆ ଗାଁର ଦେବେନ୍ଦ୍ର ପରମାଣିକଙ୍କ ଝିଅ ଅଙ୍କିତା ପ୍ରିୟଦର୍ଶିନୀ ଗୁରୁବାର ରାତିରେ ଶୋଇଥିବା ବେଳେ ଏକ ବିଷଧର ସାପ କାମୁଡ଼ିଥିଲା । ବିଳମ୍ବିତ ରାତିରେ ସାପ କାମୁଡ଼ିଥିଲେ ବି କେହି ଜାଣିପାରି ନଥିଲେ । ଶୁକ୍ରବାର ଭୋର ସମୟରେ ଅଙ୍କିତା ପାଟିରୁ ଫେଣ ବାହାରିବା ପରେ ଘର ଲୋକେ ତାକୁ ମାହାଙ୍ଗା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ର ପରେ କଟକ ବଡ଼ ମେଡିକାଲ୍ ନେଇଥିଲେ । ହେଲେ ସେତେବେଳେକୁ ଢ଼େର୍ ବିଳମ୍ବ ହୋଇ ସାରିଥିଲା । ମେଡିକାଲ୍‌ରେ ୧୫ ବର୍ଷୀୟ ଅଙ୍କିତାକୁ ମୃତ ଘୋଷଣା କରିଥିଲେ ଡାକ୍ତର ।

ସର୍ପାଘାତରେ ଅଙ୍କିତାଙ୍କ ମୃତ୍ୟୁକୁ ନେଇ ପୁରା ପରିବାର ମ୍ରିୟମାଣ ହୋଇ ପଡ଼ିଥିବା ବେଳେ ଆଉ ଏକ ଦୁଃଖଦ ଖବର ଆସିଛି । ଗର ପିଣ୍ଢାରେ ବସିଥିବା ଜେଜେ, ନାତୁଣୀର ମୃତ୍ୟୁ ଖବର ଶୁଣି ଟଳି ପଡ଼ିଛନ୍ତି । ନାତୁଣୀର ଦେହାନ୍ତ ଖବର ଜାଣିବା ପରେ ୭୨ ବର୍ଷିଅ ବାବାଜୀଙ୍କୁ ହୃଦଘାତ ହୋଇଥିଲା । ତାଙ୍କୁ ବଡ଼ଚଣା ମେଡିକାଲ୍ ନିଆଯାଇଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଛନ୍ତି ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ

Argus News | argus news | Odisha Latest News, Breaking News, Trending News, Live TV