ଜଳ ହିଁ ଜୀବନ । ଜଳ ହେଉଛି ଜୀବନର ମୂଳାଧାର । କୁହାଯାଏ, ଜଳ ବିନା ସୃଷ୍ଟି ଅସମ୍ଭବ । ବାରିପଦା ସହରରେ ତିନୋଟି ଛୋଟ ନଦୀ ଏବେ ପୋତି ହେବାରେ ଲାଗିଛି । ଏଗୁଡିକର ପୁନଃଉଦ୍ଧାର ପାଇଁ ବାରମ୍ବାର ଦାବି କରି ଆସୁଛନ୍ତି ଅଂଚଳବାସୀ ।

ମୟୂରଭଞ୍ଜ ଜିଲ୍ଲାର ସଦର ମହକୁମା ବାରିପଦା ସହର। ରାଜତନ୍ତ୍ର ଯୁଗରେ ଏହା ଭଞ୍ଜ ରାଜବଂଶର ଶେଷ ରାଜଧାନୀ ଥିଲା। ଏଠାରେ ଅନେକ ନଦୀ, ନାଳ ଓ ଜଳାଶୟ ଭର୍ତ୍ତିଥିଲା, ଯେଉଁଥିପାଇଁ ଏହାର ନାମ ହୋଇଥିଲା 'ବାରିପଦା' । ବାରି-ଅର୍ଥାତ୍ ପାଣିର ଅଧିକ ଉତ୍ସ ଓ ପଦା- ଅର୍ଥାତ ପଡିଆ । କିନ୍ତୁ ଏବେ ପରିସ୍ଥିତି ବଦଳିଛି। ଅନେକ ଜଳାଶୟ ଲୋପ ପାଇବାକୁ ବସିଛି । ବିଶେଷକରି ସହର ମଧ୍ୟଦେଇ ବହୁଥିବା 'ଜରାଳୀ', 'ସରାଳୀ' ଓ 'ସୁକଯୋଡ଼ା' ନଦୀଗୁଡ଼ିକ ଏବେ ମୃତ୍ୟୁ ଶଯ୍ୟାରେ ।

ଗ୍ରୀଷ୍ମ ଋତୁରେ ଜଳସ୍ତର କମିବା କାରଣରୁ ବାରିପଦା ସହରର ସବୁଠାରୁ ଉତ୍ତପ୍ତ ସହର ଭାବରେ ପରିଗଣିତ ହୋଇଛି । ଏହି ନାଳଗୁଡିକର ଭବିଷ୍ୟତ ନେଇ ବାରିପଦା ବାସୀ ଚିନ୍ତା ପ୍ରକଟ କରିଛନ୍ତି । ଏହାର ସ୍ଥିତିକୁ ନେଇ କ୍ଷୁଦ୍ର ଜଳସେଚନ ବିଭାଗର ସ୍ଥାଣୁତା ଅନେକ ପ୍ରଶ୍ନ ସୃଷ୍ଟିକରୁଛି।

ଦିନେ ବାରିପଦା ସହରର ଲାଇଫଲାଇନ୍ ବୋଲାଉଥିବା ଏହି ତିନି ନଦୀ-ଜରାଳୀ, ସରାଳୀ ଓ ସୁକଜୋଡ଼ା ସହରି ସଭ୍ୟତା ଓ ଜବରଦଖଲ କାରୀଙ୍କ କବଜାରେ ଲୀନ ହେବାକୁ ଯାଉଥିବା ବେଳେ ଏଗୁଡିକର ପୁନରୁଦ୍ଧାର ନହେଲେ ଆଉ କିଛିଦିନ ପରେ ଏହା ମୟୁରଭଞ୍ଜ ମାନଚିତ୍ରରୁ ଲିଭିଯିବା ଆଶଙ୍କା କରାଯାଉଛି ।