ଦକ୍ଷିଣ ଓଡ଼ିଶାରେ ଉଚ୍ଚଶିକ୍ଷା କ୍ଷେତ୍ରରେ ମାଇଲଖୁଣ୍ଟ ପାଲଟିବ ଜୟପୁର ବିକ୍ରମଦେବ ବିଶ୍ୱବିଦ୍ୟାଳୟ । ଏଣିକି ଆଉ ପିଲାଙ୍କୁ ଯିବାକୁ ପଡିବ ନାହିଁ ବାହାର ଜିଲ୍ଲାକୁ। ଖୁବଶୀଘ୍ର ଆରମ୍ଭ ହେବ ସ୍ଵତନ୍ତ୍ର କ୍ୟାମ୍ପସ୍ ଓ ନିଯୁକ୍ତି ହେବେ ସ୍ଥାୟୀ ଅଧ୍ୟାପକ । ବିକ୍ରମ ଦେବ ୟୁର୍ନିଭର୍ସିଟି ଯାଇ ସେଠାରେ ଥିବା ସମସ୍ୟା ଓ ଉନ୍ନତି ନେଇ ସମୀକ୍ଷା କରିଛନ୍ତି ରାଜ୍ୟ ଉଚ୍ଚଶିକ୍ଷା ସଚିବ ଅରବିନ୍ଦ ଅଗ୍ରୱାଲ୍ । କେବଳ ବିଶ୍ୱବିଦ୍ୟାଳୟର ମାନ୍ୟତା ଦେଇ ଭୁଲି ଯାଇଥିଲେ ପୂର୍ବ ବିଜେଡି ସରକାର ।

ଆଗକୁ ନିଜ ଜିଲ୍ଲାରେ ମିଳିବ ଉଚିତ ଭିତ୍ତିଭୂମି ସହିତ ସମସ୍ତ ଆନୁସାଙ୍ଗିକ ବ୍ୟବସ୍ଥା । ପୂର୍ଣ୍ଣ ରୂପ ପାଇବାକୁ ଯାଉଛି କୋରାପୁଟ ଜିଲ୍ଲା ଜୟପୁର ସ୍ଥିତ ବିକ୍ରମ ଦେବ ବିଶ୍ଵବିଦ୍ୟାଳୟ ।

୧୯୪୭ ମସିହାରେ ବିକ୍ରମଦେବ ମହାବିଦ୍ୟାଳୟ ସ୍ଥାପିତ ହୋଇଥିବା ବେଳେ ଦୀର୍ଘ ବର୍ଷ ବିତିଥିଲେ ବି ଏହି ଜିଲ୍ଲା, ଉଚ୍ଚ ଶିକ୍ଷାକ୍ଷେତ୍ରରେ ଉନ୍ନତି କରି ପାରିନଥିଲା । ବାରମ୍ବାର ଦାବି ପରେ ୨୦୨୩ ମସିହା ଫେବୃଆରୀରେ ଏହାକୁ ବିଶ୍ଵବିଦ୍ୟାଳୟର ମାନ୍ୟତା ପ୍ରଦାନ କରିଥିଲେ ତତ୍କାଳୀନ ବିଜେଡି ସରକାର । ବିକ୍ରମଦେବ ମହାବିଦ୍ୟାଳୟର ୭୫ ବର୍ଷ ପୂର୍ତ୍ତି ଉତ୍ସବରେ ବିଶ୍ବବିଦ୍ୟାଳୟ ନିୟମ ମୁତାବକ ଏହି କଲେଜର ଉନ୍ନତି ପାଇଁ ପ୍ରତିଶ୍ରୁତି ଦେଇଥିଲେ ।

ମାତ୍ର ଗତ ସରକାରର ଏହି ପ୍ରତିଶ୍ରୁତି ଥିଲା ପାଣିର ଗାର । ଯାହାକୁ ପୂରଣ ପାଇଁ ଅଣ୍ଟା ଭିଡ଼ିଛି ବିଜେପି ସରକାର । ଦୀର୍ଘ ବର୍ଷ ହେଲା ବିଶ୍ବବିଦ୍ୟାଳୟରେ ଥିବା ସମସ୍ୟାର ସମାଧାନ ହେବାକୁ ଯାଉଥିବା ବେଳେ ଏଥିପାଇଁ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ଛାତ୍ରଛାତ୍ରୀ । ଜୟପୁର ବିକ୍ରମଦେବ ବିଶ୍ଵବିଦ୍ୟାଳୟ ଭିତ୍ତିଭୂମିର ବିକାଶ ହେଲେ କୋରାପୁଟ ସମେତ ନବରଙ୍ଗପୁର, ମାଲକାନଗିରି ଓ ରାୟଗଡ଼ା ଜିଲ୍ଲାର ଛାତ୍ରଛାତ୍ରୀ ହୋଇପାରିବେ ଉପକୃତ ।